Mormompa Libron

1 Kunantaj ñoqa, Mormon, rikusqaymanta, uyarisqaymantawan escribini, kaytataj sutichani Mormompa Libron.

2 Ammaronqa escribisqasta Señorman p’ampaspa jina ñoqaman jamorqa (chaypachataj chunka watayoj jinalla karqani, llajtaypa yachayninman jinataj yachayniyoj kayta qallarerqani) Ammarontaj ñoqaman niwarqa: Allin sonqoyoj wawa kasqaykita rikuni, sumaj qhawaj kayniykitapis rikullanitaj.

3 Chayrayku, iskay chunka tawayoj watayoj jina kajtiyki kay llajtamanta rikusqaykita yuyarinaykita munayman. Chay chhika watayoj kaspataj Antum jallp’aman riy, orqoman, mayqen orqochus Shim wajyasqa kanqa, chay orqoman riy; jaqaypitaj Señorman tukuy kay llajtamanta sata escriturasta p’amparqani.

4 Nefij planchasninta qanwan apanki, puchoj planchastataj jaqayllapi saqenki: Nefi planchasnimpirí tukuy kay llajtamanta rikusqasniykita escribinki.

5 Ñoqataj, Mormon Nefij mirayninmanta kani, (tataypa sutintaj Mormon karqa). Ñoqa Ammarompa kamachinwasqanta yuyarqani.

6 Jinataj chunka ujniyoj watayoj kajtiy tatay ura jallp’aman, Zarahemla nisqa jallp’aman pusawarqa.

7 Tukuy llajtantintaj jatuchas wasiswan llajtachasqa karqa, runastaj qhochaj t’iyusnin as jina ashkhas karqanku.

8 Jinataj kay watapi nefitakunawan maqanakuy qallarerqa, nefitakunapurapi nefitakuna, jacobitakuna, josefitakuna, zoramitakunawan karqanku; kay maqanakuytaj lamanitakunawan, lemuelitakunawan, ismaelitakunawan ima karqa.

9 Jiná lamanitakuna, lemuelitakunawan, ismaelitakunawan ima tukuyninku lamanitas nispa sutichasqas karqanku, chay iskay t’aqastaj nefitakuna, lamanitakunataj karqanku.

10 Jinataj paykuna Zarahemla jallp’aj kantumpi, Sidon nisqa yakusnejpi, maqanakuyta qallarerqanku.

11 Jinataj nefitakuna ancha ashkha runasta tantacherqanku, kinsa chunka waranqa runasmanta astawanraj tantacherqanku. Kay kikin watapitaj ashkha maqanakuykuna karqa, chaypitaj nefitakuna lamanitakunata atiparqanku, ashkhatataj paykunamanta wañucherqanku.

12 Jinataj lamanitakuna munayninkuta qonqarqanku, jallp’apitaj sonqo tiyay karqa; tawa watapaj sonqo tiyay kajtintaj mana yawarta jich’ay karqachu.

13 Chaywampis sajra ruwaykuna jallp’antimpi karqa, chayrayku Señorqa kinsa munasqa ajllasqasninta qhechorqa, llajta sajra kasqanraykutaj milagros, thañichiykunawan manaña karqachu.

14 Señormanta mana ni ima bendiciompis karqachu, sajra kasqankurayku, mana creesqankuraykutaj Santo Espiritu mana ni pimampis jamorqachu.

15 Ñoqataj, chunka phishqayoj watayoj karqani, allin yuyayniyojtaj karqani, chayrayku Señorqa watukamuwarqa, Jesuspa k’acha kayninmantataj yacharqani.

16 Kay llajtaman Diosmanta willayta munarqani, chaywampis simiy wisq’achisqa karqa, paykunaman willanaymantataj jark’asqa karqani; paykunaqa munaspalla Diosninkoj contrampi jatarikorqanku; sajra kasqankuraykutaj munasqa ajllasqas kay jallp’amanta qhechusqas karqanku.

17 Paykunawan quedakorqani, chaywampis rumi sonqoyoj kasqankurayku paykunaman willanaymanta jark’asqa karqani; rumi sonqoyoj kasqankuraykutaj paykunapaj jallp’a maldecisqa karqa.

18 Gadiantompa suwasnintaj, pikunachus lamanitakunawan karqanku, paykuna jallp’api aywerqanku, chayrayku jallp’api tiyakojkunaqa kapuyninkunasta pampapi pakayta qallarerqanku; kapuyninkunarpi llusk’ayarqanku, Señor jallp’ata maldecisqanrayku kapuyninkunata mana jap’inankupaj, chaykunata mana tarinankupajtaj.

19 Jinataj layqanakuykuna, pakaypi ruwaykuna ima karqa, llajtantimpitaj sajra kajpa atiynin karqa, Abinadij, lamanita Samuelpawan nisqasninku junt’akunankukama.