1 Kunantaj, mana Cristopi creejkunamanta parlani.

2 Qhawaychis, ¿Jamoj p’unchaypi creenkichischu? Señor jamojtin, arí, chay jatun p’unchaypi kay pacha papel jina mayt’ukojtin, tukuy imataj jatun ruphaywan unuyajtin, arí, jatun p’unchaypi maypachachus Diospa Corderompa ñawpaqempi sayanaykichispaj pusasqa kankichis — ¿Chay p’unchaypi mana Dios kanchu nispa niwajchischu?

3 ¿Chaypachataj manaña Cristota negankichischu, mana chayrí Diospa Corderonta qhawayta atiwajchischu? ¿Juchachasqa kasqaykichista yachaspa paywan tiyakunaykichista piensankichischu? ¿Paypa kamachisqasninta p’akisqaykichisrayku juchachasqa kasqaykichista yachaspa chay k’anchayniyoj Kajwan kasiypi tiyakuyta atinaykichista piensankichischu?

4 K’anchayniyoj, cheqa Dioswan tiyay, paypa ñawpaqempi ch’ichi kasqaykichista yachaspa, chay aswan muchunaykichispaj kanman ukhu pachapi jark’asqa runaswan tiyaymantaqa, chayta nishaykichis.

5 Diospa ñawpaqempi q’ala kasqaykichis rikukojtintaj, Dios k’anchayniyoj kasqanta, Jesucristo llimphu kasqantawan rikojtiykichistaj mana thasnukoj ninata qankunapi lawrachenqa.

6 Chayrayku mana creejkunaqa Diosman kutiriychis; Dios Tatata sumajta wajyakuychis Jesuspa sutimpi, ichapis mana ch’ichiyoj, llimphu, k’acha, yuraj, Corderompa yawarninwan mayllasqas kanaykichispaj jatun qhepa p’unchaypi.

7 Watejmantataj Diospa rikuchiyninkunata negajkunaman parlaykichis, pikunachus chaykuna tukukusqantaña ninku, manaña rikuchiykunas, sut’inchaykunapis, qoykunas, thañichiykunapis, ni waj parlaykunapi parlaykunapis, nitaj waj parlaykunasta entiendechiykunapis kanchu, nispa;

8 Pichus kaykunata negan, Cristoj evangelionta mana rejsinchu, chayta niykichis; arí, payqa escriturasta mana leenchu; leen chayrí, mana chaykunata entiendenchu.

9 ¿Chaywampis manachu leenchis Dios kikillampuni qayna, cambiasqanta, nitaj paypi ima llanthullapis kuyurej kasqanta, manachu chayta llenchis?

10 Qankunachus yuyankichis Dios cambiasqanta, pipitajchus llanthu cambiakuy kasqanta ninkichis chayqa, yuyankichis uj diospi mayqenchus mana milagrosmanta dioschu.

11 Ñoqa milagrota ruwaj Diosta qhawachisqaykichis, Abrahampa Diosninta, Isaacpa Diosninta, Jacobpa Diosnintapis; kikin Diostaj, pichus janaj pachatak, kay pachatawan, tukuy chaykunapi cosastawan ruwarqa.

12 Adanta ruwarqa, Adannejtataj runaj wañuynin kan. urmasqanraykutaj Jesucristo jamun, Tatapis Wawapis; Jesucristoraykutaj juchamanta kacharichiy jamun.

13 Runa kacharichisqa kasqanraykutaj, imachus Jescristonejta jamorqa, chayrayku tukuyninku Señorpa ñawpaqenman kutichisqas kanku; arí, kaypi tukuy runas kacharichisqas kanku, imaraykuchus Cristoj wañuynin kawsarichimuyta ruwan, imachus mana tukukuyniyoj puñuymanta kacharichin, mayqen puñuymantachus, pututu waqachisqa kajtin, tukuy runas rijch’arichisqas kanqanku Diospa atiyninnejta; ñawpajmantaj jamonqanku, juch’uykuna jatunkunawan, juzgana tiyanampa ñawpaqempitaj sayarenqanku, wañuypa wiñay watayninmanta, mayqen wañuychus kay kawsaymanta wañuy, chaymanta kacharichisqas, paskasqastaj kanqanku.

14 Chaymantarí Ajllasqampa juicion paykunaman jamonqa; chaytaj ch’ichi runa ch’ichillampiraj kashajtin kanqa; sumaj runataj sumajta ruwashajtin kanqa; kusikoj runataj kusikuypiraj kashajtin kanqa; mana kusikoj runataj mana kusikuypiraj kanqa.

15 Kunantaj, tukuy mana milagrota ruwaj diosta yuyajkuna, tapuykichis, ¿Tukuy kaykuna, imamantachus parlani, chaykuna pasankuñachu? ¿Tukukuy jamunñachu? Niykichis, Mana; milagrota ruwaj Diostaj kawsashanraj.

16 ¿Manachu Diospa ruwasqasnin ñawinchispaj sumajkuna? Arí, ¿Pitaj Diospa t’ukuchinapaj ruwasqasninta entiendeyta atinmanri?

17 ¿Pitaj ninman mana milagro kasqanta nisqannejta janaj pacha, kay pachawan ruwasqas kasqankuta, nisqampa atiyninnejtataj kay jallp’amanta runa ruwasqa kasqanta, nisqampa atiyninnejtataj milagros ruwasqas kasqantawan, pitaj chaykunata mana milagrochu ninmanri?

18 ¿Pitaj ninman, Jesucristo jatun milagrosta mana ruwarqachu, nispa? Jiná ashkha jatun milagros ruwasqas karqanku apostolespa makisninkunejta.

19 Milagros ruwasqas kajtenqa, ¿Imarayku Dios manaña milagrota ruwaj Diosman tukunman, mana cambiaj Kaj kaspalla? Mana ni jayk’ajpis cambiasqanta nishaykichis; cambianman chayqa, manaña Dioschu kanman; chaywampis mana Dios kayta saqenchu, milagrota ruwaj Diosqa kallashampuni.

20 Payqa runaspa wawasninku ukhupi manaña milagrota ruwanchu mana creeyman urmasqankurayku, cheqa ñanmanta t’aqakusqankurayku, confianankupaj Diosta mana rejsisqankuraykutaj.

21 Niykichis, pichus Cristopi creen, mana ni imapipis iskay sonqoyoj kaspa chayqa, imatapis Dios Tatamanta mañakunman, Jesucristoj sutimpi, payman qosqa kanqa; kaytaj tukuypaj, jallp’aj kantusninkama.

22 Kay jinamantataj Jesucristoqa, Diospa Wawan, nerqa quedakojkuna ajllasqasninman, arí, tukuy uyarej runa ukhupi ajllasqasninman nerqa: Riychis tukuy mundoman, evangeliota willamuychis tukuy runasman;

23 Pichus creej, bautizakojtaj, salvasqa kanqa; mana creejtajrí wañuypaj juchachasqa kanqa;

24 Creejkunataj kay señalesta ruwanqanku — sutiypi supaykunata qharqonqanku; mosoj parlaykunata parlanqanku; makisninkuwan katarista oqharenqanku; venenota ujyaspapis mana wañonqankuchu; onqosqasman makisninkuta churaspapis thañichenqanku.

25 Pichus sutiypi creej, mana imapi iskay sonqoyoj kaj, payman tukuy nisqasniyta sinchita sayarichisaj, jallp’aj kantusninkama.

26 Kunantaj, ¿Pitaj Señorpa ruwaynimpa contrampi sayayta atinmanri? ¿Pitaj Señorpa kallpayoj atiynimpa contranman jatarenqa? ¿Pitaj Señorpa ruwayninta neganqari? ¿Pitaj Cristoj wawasninta neganqari? Qhawariychis tukuy Señorpa ruwayninkunata negajkuna, imaraykuchus t’ukunkichis, wañunkichistaj.

27 Chayrayku ama negaychischu, amataj t’ukuychischu, astawanqa Señorpa nisqasninta kasuychis, Dios Tatamanta, jesuspa sutimpi, tukuy munasqaykichista mañakuychis. Ama iskay sonqo kaychischu, astawanqa creespalla kaychis, unay p’unchaykunapi jinataj qallariychis, tukuy sonqowan Señorman jamuychis, manchachikuspa, kharkatitispataj, paypa ñawpaqempi salvasqa kanaykichispaj ruwaychis.

28 Kusukojchus manachus qhawachikunaykichispaj p’unchayniykichispi yachaysapa kaychis; tukuy ch’ichi kajkunamanta llimphuchakuychis; ama mañakuychischu aychaykichispa munayninta junt’anaykcihispaj, astawanqa mana ni mayqen juchaman urmanaykichista mañakuychis cheqa kawsaj Diosta sirvinaykichispaj.

29 Bautizakoj jina kaspa sumajta qhawakuychis mana llimphuchasqa kaspa mana bautizachikunaykichispaj; mana chaypaj kaspataj sumajta qhawakuychis mana Cristoj santa cenanta mikhunaykichispaj; astawanqa tukuy imatapis llimphu kaspa ruwaychis, chaykunata Jesucristoj, kawsaj Diospa Wawampa, sutimpi ruwaychistaj; kayta ruwankichis, tukukuykama sumajta sayankichistaj chayqa, mana jawaman wijch’usqaschu kankichis.

30 Wañusqakunamanta jina parlashaykichis; parlayniyta uyarinaykichista yachani.

31 Mana cabal kasqayrayku ama juchachawaychischu, amataj tatayta juchachaychischu mana cabal kasqanrayku, amataj paymanta ñawpajta escribejkunata juchachaychischu; astawanqa Diosta agradeceychis mana cabal kasqaykuta qhawachisusqaykichismanta, ñoqayku kasqaykumanta astawan yachaysapa kayta amañanaykichispaj.

32 Kunantaj, yachasqaykumana jina, kay escriturata escribiyku, ñoqayku ukhupi allinchasqa egipcio sutichasqa letraswan escribillaykutaj, chaykuna ñoqaykumanta cambiasqa karqanku parlayniykuman jina.

33 Planchasniyku jatuchas kankuman karqa chayqa, hebreopi escribiykuman karqa; chaywampis hebreotapis cambiarqayku; hebreopi escribiykuman karqa chayqa, escribisqaykupi mana pantayniyoj kaykumana karqa.

34 Señorqa, imatachus escribiyku, chayta yachan, mana ni mayqen waj llajtapis parlayniykuta yachasqantapis yachallantaj; chayrayku kayta tijrasqa kanampaj ñanta wakichin.

35 Kaykunaqa escribisqas kanku, hermanosniyku, pikunachus mana creeyman urmarqanku, paykunaj yawarninmanta p’achasniyku llimphuchasqas kanankupaj.

36 Kaykunataj, hermanosniykupaj munasqaykupis, arí, Cristomanta yachayman mosojyachisqas kanankutapis, tukuy kay jallp’api tiyakoj allin kawsajkunaj Diosmanta mañakusqasninkumana jina kanku.

37 Feninkuman jinataj Señor Jesucristoqa Diosmanta mañakusqasninkunata junt’achichun; Dios Tataj Israelpa wawasninwan ruwasqa tratonta yuyarichun; Jesucristoj sutimpi fenejta paykunata wiñaypaj wiñaynimpaj bendecillachuntaj. Amen.