1 Kunantaj, kay llajtaj mana wañuchisqa puchunman uj chhikanta parlayta munayman, jinataj Dios nisqasniyta paykunaman qon chayqa, tatasninkoj ruwasqasninkumanta yachayta atinkuman; arí, Israelpa wawasnimpa puchun, kaytataj parlaykichis:

2 Israelpa wawasnin kasqaykichista yachaychis.

3 Mana Diosman kutirinkichischu chayqa, mana salvasqaschu kankichis, chayta yachaychis.

4 Maqanakunasta pampaman churanaykichista manaña chaykunata oqharinaykichispaj, manaña yawar jich’aypi kusikunaykichispaj, chaykunata yachaychis; maypachachus Dios kamachisunkichis, chaypachalla chaykunata oqhariwajchis.

5 Yachaychis tatasniykichismanta yachayman jamunaykichista, jinapis tukuy juchasniykichismanta, sajra ruwasqaykichismantawan kutirinaykichista, jinapis Jesucristopi creenaykichista, Diospa Wawan kasqanta, judiokunanejta wañuchisqa kasqanta, Dios Tataj atiyninnejtataj watejmanta kawsarichisqa kasqanta, pinejtachus sepulturata atipan, chaykunata yachaychis; jinataj paypi wañuypa atiynenqa mana kanchu.

6 Jinataj wañusqamanta kawsarimuyta churan, chaynejtataj runas kawsarichisqas kanqanku juzgana tiyanampa ñawpaqempi sayarinankupaj.

7 Mundota kacharichillantaj, chayrayku juzgana p’unchaypi mana juchayoj runaman qosqa Diospa ñawpaqempi, reinompipis tiyakunampaj mana tukukuyniyoj kawsaypi kaspa janaj pachapi takejkunawan mana tukukuyniyoj takiykunata Dios Tataman, Wawaman, Santo Espirituman ima takinampaj, pikunachus uj Dioslla kanku.

8 Chayrayku Diosman kutiriychis, Jesuspa sutimpi bautizakuychistaj, Cristoj evangelionta, imachus ñawpaqeykichispi churasqa kanqa, mana kay escribisqallapichu, astawanqa judiokunamanta gentilkunaman jamoj escribisqapi, mayqen escribisqachus gentilkunanejta qankunaman jamonqa.

9 Kayqa escribisqa chayta creenaykichispaj; chayta creenkichistaj chayqa, kaytawan creenkichis; kayta creenkichistaj chayqa, tatasniykichismanta yachankichis, jinataj paykunapaj Diospa atiyninnejta t’ukuna ruwasqasmantawan yachankichis.

10 Jinataj Jacobpa wawasnimpa puchun kasqaykichista yachankichis; chayrayku ñawpaj tratomanta runaswan yupasqas kankichis; Cristopi creenkichis, bautizakunkichistaj ñawpajta yakuwan, chantá ninawan, Santo Espirituwan ima, Salvadorninchispa ruwasqanta qhatispa, kamachiwasqanchisman jina chayqa, juzgana p’unchaypi allin qankunata risonqachis. Amen.