Svun Mormon

1 Ja’ jech tana ti vu’un, Mormonune, ta jts’iba ti c’usi la jquile xchi’uc ti c’usi la jca’aye, ja’ ta xcac’be sbiin svun Mormón.

2 Ja’tic sba ta sc’ac’alil ti c’alal la snac’ poco’ lo’iletic Ammaron ta sventa Cajvaltique, tal ta jtojolal (oyvan quich’oj lajunebuc jabil, ti c’alal japo xchanel ti c’usi sna’ojanic jteclumale) xchi’uc jech la jyalbun Ammaron: Ta xquil ti yu’un ja’ lequil queremote, xchi’uc ti a valojbe a vo’nton sq’uelele.

3 Ja’ jech, ti c’alal me a ta chanib xcha’vinic 24 a jabilale, ta jc’an ti ac’o xa na’ to ta a vo’nton ti c’usitic aviloj ta sventa li’ jteclumale, ti c’alal me a ta a jabilal jech va’aye, batan te ta Antum banamil, ta jun vits ti ja’ ta sbiin Shime; ja’ te cac’oj ta sventa Cajvaltic scotol ti ch’ul ts’ibiletic ti ja’ ta xal ta sventa li’ jteclume.

4 Xchi’uc ja’ te cha tsac achi’uc ti staq’uin vuntac Nefie, ti yantique ja’ te cha comtsan ti te ta yabil buoyique, xchi’uc ta sba staq’uin vuntac Nefi cha ts’iba scotol ti c’usitic lavil ta sventa li’ jteclume.

5 Jech ti vu’un, Mormonun, ti ja’un snitililun Nefie, (yu’un ti sbi jtote ja’ Mormón) xchi’uc la jt’ab ta co’nton ti c’usitic la spasun ta mantal Ammarone.

6 Ja’ o jech ti c’alal quich’oj buluchib jabile, ti jtote la jyic’un batel te ta banamil ta xocon smaleb c’ac’al, jech c’alalto ta sbanamil Zarahemla.

7 Scotol sba banamil nojem com ta muc’tiquil na, jech ti yajvaltaque tu j ech’em epic jech chac c’u cha’al syi’altac nab.

8 Ja’ o jech ti li’ ta sjabilale sjapoic pas c’op ti Nefitaetique, ti ja’ic Nefitaetique xchi’uc Jacobitaetique xchi’uc Josefitaetoque xchi’uc Zoramitaetique, ti va’ay pas c’ope ja’ no’ox ta Nefitaetic, xchi’uc jlamanitaetic, xchi’uc jlemuelitaetic xchi’uc Ismaelitaetic.

9 Jech, ti jlamanitaetique, ti jlemuelitaetique xchi’uc ti Ismaelitaetique ja’ to ox sbiic jlamanitaetic, ti va’ay cha’ tsopique ja’ic to ox nefitaetic xchi’uc jlamanitaetic.

10 Ja’ jech c’ot ta pasel ti pas c’op ta stojolalic te ta sts’ac Zarahemla te nopol xil vo’etic Sidóne.

11 Jech ti nefitaetique te xa ox stsobojic epal viniquetic, ti jech ech’em van ta lajuneb xcha’vinic ta mile (30,000), jech ti va’ay ta sjabilale ep c’ot ta pasel pas c’op, ti bu la spas ta canal jlamanitaetic li’ nefitaetique xchi’uc ti bu ep la jyich’ic milele.

12 Ja’ o jech ti jlamanitaetique la sjelta sbaic, ja’ jech ayin lequilal ta banamil, jech ti lequilale jalijvan chanibuc (4) jabil ti jech muyuc mal ch’ich’e.

13 Jech te tsal yu’nic ti c’usi chopol ta sba scotol banamile; jech ti Cajvaltique la sloq’ues ti yajchanc’optac bu lec sc’anoje, xchi’uc laj o ti boch’o ta spas sq’uelubil tsatsalil laval sbae, xchi’uc ti coltaele, ti va’aye ja’ ta sventa ti sbolilic jteclume.

14 Xchi’uc muyuc x ayin slequilal Cajvaltic, xchi’uc ti Ch’ul Espíritue muyuc xyaltal ta stojolalic junucal yu’nic, ja’ ta sventa ti sbolilique xchi’uc ti c’usi chopol tspasique.

15 Ti c’alal ja’ o jta vu’un ti vo’lajuneb jabile, xchi’uc ti jech tsots co’ntone, ja’ jech la svu’lanun ti Cajvaltique, jech la jpas ta poroval xchi’uc la jcotquin ti slequil yo’nton Jesuse.

16 Xchi’uc la jcac’ persa xcholbel c’op ti li’ jteclume, jech la jquich’ macbel ti quee, xchi’uc muyuc xquich’ ac’bel jchol c’op, ja’ o jech, te tsots ilinic ta stojolal Srioxic, jech ti yajchanc’optac lec sc’anoje la jyich’ic loq’uesel ta banamil, ja’ ta sventa ti sbolilic jteclume.

17 Jech ti vu’une te oyun o ti ta stojolalique, ja’ jech muyuc xquich’ ac’bel jchol c’op ta sventa ti stsatsal yo’ntonique, xchi’uc ja’ ta sventa stsatsal yo’ntonic ti jech yich’ pasel ta chopol banamil ti banamil ta sventaique.

18 Ti va’ay j eleq’uetic yu’un Gadianton ti te oyic ta stojolalic jlamanitaetique, te ta soquesic ti banamile, xchi’uc ti jech sjapoic sq’uelel sc’ulejalic ta banamile, xchi’uc pasic ta muyuc stuic, yu’un ti Cajvaltique la spas ta chopol ti banamil, ti jech mu xa xu’ sq’uelic lec xchi’uc ti jech mu xa xu’ c’uxi xu’ xcha’ pasic ta leque.

19 Xchi’uc jech ayinic jt’un chameletic xchi’uc j ac’ chameletic xchi’uc ti c’usi tu jlec’ ya’yique, jech ti stsatsal pucuje epaj ta scotol sba banamil, ja’ to ti c’uxi c’ot ta pasel ti c’usi yaloj Abinadie, xchi’uc ti Samuel jlamanita vinique.