1 Jech tana, ta lajes xa ti ca’yej ta sventa ti c’u x elan la jyich’ic vuq’uesel jteclumal ti ja’ nefitae, xchi’uc ti jech li xanocutic ta canal ta satic ti jlamanitaetique.

2 Jech ti vu’un Mormonune, la jts’iba ti c’u x elan ya’yej sts’ibaoj ajvalil yu’nic jlamanitaetique, xchi’uc la jc’anbe ti ac’o yac’ jtsobvanej xchi’uc jteclumal te ta sbanamil Cumorahe, te ta o’lol vits sbiinoj Cumorahe, yu’un ja’ te ti xu’ ta jpascutic milbaile.

3 Ja’ o jech ti ajvalil yu’nic jlamanitaetique, la jyac’ jpas ti c’usi la jc’anbe ta jpase.

4 Ja’ o jech japocutic batel xanubal ti te ta sbanamil Cumorahe, xchi’uc la jpascutic jnacutic ta poc’ ti te ta xocontac vits Cumorahe, xchi’uc oy ep vo’etic ti tee, xchi’uc uc’umetic xchi’uc loq’uem vo’etic, xchi’uc ja’ li’ la jmalacutic jlamanitaetic ti c’uxi xu’ jpascutic ta canale.

5 Ti c’alal jelo xa ox oxib ciento xchi’uc chanib yo’vinic (384) jabile, ti vu’ncutique laj xa ox jtsobcutic scotol ti scomelal jteclumalcutic ti te ta sbanamil Cumorahe.

6 Ja’ o jech ti c’alal laj xa ox jtsobcutic ta jun no’ox ti jteclumalcutic te ta sbanamil Cumorahe, ja’ o jech ti vu’un Mormonune, te xa ta japo malubel, xchi’uc jna’oj ti ja’ xa slajeb pas c’op ta sventa jteclumale, xchi’uc la spasun ta mantal Cajvaltic ti ac’o mu xcac’ jelouc batel ta sc’obic jlamanitaetic, ti ch’ul poco’ lo’iletic bu la jyac’buncutic jtotcutique, (yu’un ti jlamanitaetique ta soquesic) la jpas jech ta jmoj ti staq’uin vuntac Nefie, Xchi’uc te la jnac’ ta svitsal Cumorah scotol ti poco’ lo’iletic bu la jyac’bun ta sc’ob Cajvaltique, ja’ xa no’ox jayibuc ti taq’uin vunetic la jcac’be ta sc’ob jnich’on Moronie.

7 Ja’ o jech ti jteclumale, xchi’uc yajnilic xchi’uc ti xnich’onique, jech te talic ta stojolal yaj soltarotac jlamanitaetic ti jech te xa chtal ta stojolalique, jech ti c’u x elan xibal sba xi’elal lajele chnojesat yo’ntonic scotol ti boch’otic muyuc lequique, la smalaic ac’o c’oticuc.

8 Ja’o jech talic ta pas c’op ta jcontracutic vu’ncutic, xchi’uc scotol ch’ulelal nojic ta xi’el ta sventa ti yu’un tu j ech’em yepalique.

9 Ja’ o jech c’otic ta stojolal jteclumal xchi’uc xmachitaic xchi’uc s arcoic xchi’uc st’ilub te’ic, xchi’uc yeq’uelic, xchi’uc scotol ta chop yabtejebic ti ta sventa pas c’ope.

10 Ja’ jech la slajesic scotol ti jvinictaque, jech, lajunmilic ti te oyic jchi’uque, ti vu’une te li yal ta lum ta o’lol ta stojolalic yu’un li tuch’esat; xchi’uc te jeloic ti te bu oyune, jech muyuc bu la smilicun.

11 Ti c’alal jeloic ta o’lol xchi’uc ti la soquesic scotol ti li’ jteclumale, ja’ xa no’ox chanib xcha’vinic li comcutic (ti ja’ te tsacal ta atael ti jnich’on Moronie) ja’ xa no’ox vu’ncutic cuxul li comcutic ti ta sventaic boch’otic chamic ta jteclumale, ti ta sob yoc’omale ta ts’acal ti c’alal te xa sutic batel ta snaic ti jlamanitaetique, la jquilcutic tal te to ta ba vits Cumorah, ti lajunmil jteclumal boch’otic la jyich’ic milel ta jsat ti c’alal teoyune.

12 Xchi’uc la jquilcutic xtoc ti lajunmil jteclumal ti bu la xchi’in ta pasc’op jnich’on Moronie.

13 Xchi’uc ja’ jech, ti Gidgidonaetique lajic, ti stuque ja’ te oy ta o’lol ta stojolalic.

14 Xchi’uc laj ti Lamah xchi’uc lajun mil xchi’iltaque, xchi’uc ti Gilgale lajic xchi’uc ti lajun mil xchi’iltaque, xchi’uc Limhahe lajic xchi’uc ti lajun mil xchi’iltaque, xchi’uc ti Jeneume lajic xchi’uc ti lajun mil xchi’iltaque xchi’uc lajic ti Cumeniahe, xchi’uc Moroniahe, xchi’uc ti Antionume, xchi’uc ti Shiblome, xchi’uc ti Sheme, xchi’uc ti José, chamic ta jujuntalic xchi’uc lajun mil xchi’iltaquic.

15 Xchi’uc ja’ jech oyic to lajunebic yantic ti chamic ta machitaile, ta jujuntal xchi’uc slajunebal mil xchi’iltaquic, jech, lajic scotolic ti jteclumale, ja’ xa no’ox colic ti chanib xcha’vinic te oyic jchi’uquique, xchi’uc oyic van jayibicuc ti jech jatoic batel te ta muc’ta jteclum ta xocon smaleb c’ac’ale, xchi’uc oy jayibicuc jatoic batel ta jlamanitaetique, ti sbec’tal xchi’uc ti sbaquiltac, xchi’uc ti xch’ich’ale te lamal ta ba banamil, jech te la jyich’ic comtsanel ta sc’obic ti boch’otic la jyich’ic o milele, xchi’uc ti c’uxi te soquicuc ta banamile xchi’uc ti c’uxi te xca’ic ti jech c’uxi xu’ sutic batel ta sme’ic banamile.

16 Jech ti jch’ulele ta xjab ya’eluc ti ta sventa jteclumal jech chamique, xchi’uc jech la jcal:

17 Vo’ot lequil jteclum, c’uxi ti jech la voc’ a ba ti ta sbe Cajvaltique! vo’ot lequil teclum, c’uxi ti jech muyuc xa c’an ti Jesús jech te sjamojan sc’obtac smalaojot ta xic’ote.

18 Ja’ jech ti muyucuc a pasoj ti c’usi va’aye, muyuc bu la cham ti jechuque, ja’ jech ti q’ue x elan la chame, ta xcoq’uita ti jech la chame!

19 ¡Jech lequil queremutic xchi’uc lequil tsebetic xchi’uc totiletic xchi’uc me’iletic xchi’uc vo’xuc malaliletic xchi’uc ajnilaletic, xchi’uc jlequil jteclum, c’uxi ti jech la yaltal lume!

20 Ja’ jech tana, la ch’ayic xa o, jech mu xa xu’ xa sutic o tal yu’un ti c’usi c’ux chca’aye.

21 Jech jutuc xa sc’an xtal ti sc’ac’alil ta xich’ pasel ta mu sna’ xcham ti abec’tal jech sna’ xchame, ti li’ bec’taliletic ta xch’ay ta c’unc’un ta xca’ique jutuc xa sc’an spas ta mu sna’ xc’a’; xchi’uc ja’ to te cha bat bu ta sq’uel talelil Cristo ti c’uxi xu’ xich’ q’uelel a talelic jech chac c’u cha’al avabtelique; ti me lec apasoj o no’ox abaique, cha vich’ic benticion xchi’uc a totic ti bu ba’yuc chamenique.

22 Jech ti yu’nuc o no’ox la sutesuc o no’ox a vo’ntonic ti c’alal sc’antoox xyal ta atojolalic ti li’ muc’ta vuq’uesele! jech tana u la ch’ayic xa o, ti Totile, jech, ti jtotic ta sbatel osil ta vinajele, xotquin ti c’u xa x elanique; xchi’uc ja’ ch abtej ta atojolalic jech chac c’u cha’al slequilal xchi’uc xc’uxul yo’nton.