1 Ja’ jech ti vu’un, Moroniune, ta jlajesbe yalel ti bu sts’ibaoj slo’iltac jtot, Mormone, ja’ jech, mu jutucuc ti c’usi xu’ ta jts’iba c’usitic la spasun ta mantal jtote.

2 Ja’ jech c’ot ta pasel ti c’alal jelo ti muc’ta pas c’op te ta Cumorahe, ja’ jech ti jlamanitaetique la snutsic ti nefitaetic bu jatoic batel te ta sbanamil stuq’uil jot xocon smaleb c’ac’ale, ja’ to ti c’uxi scotolic chamique.

3 Xchi’uc ti jtote ja’ te cham ta sc’obic, ja’ xa no’ox vu’un jtuc li com ta sts’ibael ti c’u x elan yatel o’ntonal ya’yejal c’u x elan la jyich’ vuq’uesel jteclumale. Ja’ jech ich’ayic, ti vu’une ja’ ta jch’un ti smantal jtote, jech mu jna’ me chi smilicun o me mo’oj.

4 Ja’ jech ta jts’iba xchi’uc ta jnac’ ta banamil ti poco’ lo’iletique, xchi’uc mu jventauc bu to c’alal xu’ chi bat.

5 Ja’ jech, ti jtote smeltsanoj ti li’ poco’ lo’iletique, xchi’uc sts’ibaoj ti c’usitic la spas stuquique, xchi’uc ja’ jech, ti vu’une ta jts’iba ec xtoc, ti oyuc to bu xu’ x och ta taq’uin vune, chac’ ti muyuc cu’une, xchi’uc ti taq’uine muyuc cu’un, yu’un jtuc xa oyun. Yu’un ti jtote cham ta pas c’op, xchi’uc scotol cuts’calal, xchi’uc muyuc boch’o lec jc’opan xchi’uc muyuc bu xu’ xi bat; xchi’uc mu jna’ jayibtovan c’ac’al xac’ xi ch’i ti Cajvaltique.

6 Ja’ jech, jeloven xa chanib ciento (400) jabil ti ja’ o no’ox c’alal tal Cajvaltic ti ja’ Jcoltavanej cu’untique.

7 Ja’ jech, ti jlamanitaetique la snutsic ti jteclumal nefitaetique, ta jujun muc’tiquil jteclumetic xchi’uc ti te ta jujuntal bu oyique, ja’ to ti c’uxi muyuc xcomic oe, ja’ jech muc’ no’ox c’ot ta pasel ti c’u x elan chame, jech muc’ no’ox xchi’uc laval sba ti c’u x elan yich’ vuq’uesel jteclumal ti ja’ nefitae.

8 Ja’ jech, ja’ sc’ob Cajvaltic ti jech la spase, xchi’uc xtoc ti jlamanitaetique te oyic ta pas c’op ta stojolal yantic; scotol ti li’ sba banamile vo’vinic (100) jabil la pasic milbail xchi’uc mal ch’ich’; jech muyuc boch’o sna’oj c’u x elan slajeb ti pas c’ope.

9 Ja’ jech, muyuc ep c’usi chcal ta stojolalic, yu’un muyuc xa boch’o yantic oy jech chac c’u cha’al jlamanitaetic xchi’uc j eleq’uetic ti oyic te ta sba scotol banamile.

10 Xchi’uc muyuc boch’o ti xotquinic Riox ta bats’imelele, yu’un ja’ic no’ox ti yajchanc’optac Jesuse, ti boch’otic li’ oyiic ta banamil jech ja’ to ti c’alal muq’uim sbolilic viniquetique xchi’uc ti Cajvaltic muyuc la jyac’ te oyiicuc ta jteclume, jech muyuc boch’o sna’oj me oyic o me muyuquic ta sba banamil.

11 Ja’uc ti jtot, xchi’uc vu’une, la jquilcutic, xchi’uc ja’ic abtejic ta jtojolalcutic.

12 Ti boch’o ta xich’ ta sc’ob ti li’ poco’ lo’ile, mu me xac’ ta ch’ayel ta sventa ti c’usi muyuc lec oy ta stojolale, ti va’aye ja’ te ta xchan ti c’usitic muc’tic jech chac c’u cha’al li’e, ja’ jech vu’un Moroniun; ti me jech chc’ot ta pasele ta xcac’ ta otquinel scotol c’usitic oy.

13 Ja’ jech chlaj co’nton ta yalel ti c’usitic ja’ ta sventa jteclumale, vu’un xnich’onun Mormón xchi’uc ti jtote ja’ snitilil Nefi.

14 Ja’ vu’un ti boch’o ta snac’ li’ poco’ lo’iletic ta sventa Cajvaltique, jech ti ta taq’uin vunetic buoye muyuc lec ep stu, ta sventa smantaltac Cajvaltic, yu’un ti stuque jech ta xal ta bats’imelel ti muyuc boch’o xu’ ta sta ta sventa xu’ tstoy sbae, ja’uc ti poco’ lo’iletic te tsacale ja’ tsots stu, xchi’uc ti boch’o ta sloq’ues ta saquil osile, Cajvaltic ta xac’be sbenticion.

15 Yu’un muyuc boch’o oy stsatsal ta sloq’ues ta saquil osil ti me mu ja’uc yac’oj Rioxe, yu’un ja’ no’ox Riox ta xac’ ti ja’uc no’ox ta xich’ ich’el ta muq’ue, o ja’uc no’ox ta sventa slequilal boch’otic ja’ic ta vo’nej xchi’uc ta natil c’ac’al ti bu tan puquic jteclum ta bu o no’ox oy c’usi albilic yu’un Cajvaltique.

16 Ja’ jech ta xich’ ac’bel benticion ti boch’o ta sloq’ues ta saquil osil ti c’usitic li’e, yu’un ta xloc’ ta saquil osil ti ic’al osile jech chac c’u cha’al ya’yej Rioxe, jech, ta xich’ loq’uesel ta banamil, xchi’uc sac sacts’ayan chc’ot te ta ic’al osil xchi’uc ta sna’ic scotol jteclum xchi’uc ta xich’ pasel ta stsatsal Riox.

17 Ti me oyto c’usi chopole, ja’ xchopoliltac vinic, jech ti li’e mu jna’cutic me oy c’usi chopol, ja’ jech, Riox sna’oj scotol ti c’usitic oye, ja’ jech chabio me a vaic ti ta c’usi ch ac’van batel ta ch’ayele, ma’uc me jech xa batic ta ch’ayel ta c’oc’ yu’un c’atinvaque.

18 Ti boch’o jech ta xal: Ac’bun quil o me ta xa vich’ tuch’esel, q’uelo me a ba, mu me ja’uc me spasot ta mantal ti c’usi yaloj Riox mu xu’ xa pase.

19 Ja’ jech ti boch’o chopol ta xil xchi’ile, ja’ jech chopol ta xich’ ilel ti stuc ec xtoque, jech chac c’u cha’al yabtele, ja’ jech ta xich’ stojol, ja’ jech ti boch’o ta xtuch’esvane, ja’ jech, ta xich’ tuch’esel yu’un ec xtoc.

20 Ti ts’ibiletique ja’ jech ta xal: Ti viniquetique muyuc ta xtuch’esvan xchi’uc me ja’uc ta sq’uel talelil, yu’un ti c’u x elan ta xich’ q’uelel talelile ja’ cu’un, xi ti Cajvaltique, xchi’uc ti pac sc’oplale ja’ cu’un xtoc, xchi’uc vu’un ta jtoj xi.

21 Xchi’uc ti boch’o ta xich’ ic’ ta sc’alc’al yo’nton xchi’uc ta spas c’op ta scontrainel yabteltac Cajvaltique, xchi’uc ti ta jteclum bu oy c’usi yaloj o no’ox Cajvaltique ti ja’ic snailal Israele, xchi’uc ti me jech ta xalic: Ta jsoquescutic ma yabtel Cajvaltique, xchi’uc ti Cajvaltique ta xch’ay ta yo’nton ma ti c’usi yaloj ta stojolal snailal Israele, me xi’ique, ti va’ay boch’o jech ta xale oy xa me ta vocolil xchi’uc ta xich’ milel xchi’uc ta xich’ jipel batel ta c’oc’.

22 Yu’un ti c’usi tspas Cajvaltique muyuc bu ta xpaj o, ja’ to me c’ot ta pasel scotol ti c’usitic yalojane.

23 A’ybeic lec smelolal ti c’u x elan la xchol c’op Isaiase, ja’ jech mu stac’ jts’iba, jech, ja’ jech, cha calboxuc ti va’ay ch’ul viniquetic boch’otic yich’ojicun ta venta, ti boch’otic la jyu’ninic ti li’ banamile, jech ta xalic, jech c’alal to ta spucucal jech ta xalbeic ti Cajvaltique; cuxul ti Cajvaltique, xchi’uc ta st’ab ta yo’nton mati c’usi yaloj ta stojolalique.

24 Xchi’uc ja’ xotquin ti c’u x elan ta sc’opanic Rioxe, xchi’uc ti c’usi la spasic ta sventa yermanoique, xchi’uc ti stuque xotquin ti xch’unolajel yo’ntonique, yu’un ja’ ta sbi la sjeltabeic yabil toyolaltic; xchi’uc ja’ ta sbi ti jech nic banamil yu’nique; xchi’uc ja’ ta stsatsal ya’yej ti la sloq’uesic jchuqueletique; jech, xchi’uc me ja’uc ta jun horno tsanal xu’ la jyich’ic o chiq’uel, xchi’uc me ja’uc ta te’tical chonbolometic xchi’uc me ja’uc ta jti’vanej chonetic xu’ la jyich’ic o uts’intael ti ta sventa stsatsal ya’yeje.

25 Ja’ jech ti c’u x elan ta sc’opanic jtotic Rioxe, ja’ ta sventa xtoc ti boch’o ta xac’ be jtotic Riox ac’o sloq’ues ta saquil osil c’usitic li’e.

26 Yu’un muyuc lec ti boch’o jech ta xal muyuc xloq’ue, yu’un ta bats’imelel ti ta xloq’ue, yu’un Cajvaltic yaloj; ti ta banamil ta xloc’ ta sc’ob Cajvaltique, xchi’uc muyuc boch’o xu’ tspajes; xchi’uc ta xtal sc’ac’alil ti ta xich’ alel jech ta xlaj sc’oplal sq’uelubil tsatsalile, xchi’uc xco’laj xchi’uc oy boch’o ta chlo’ilaj te ta animaetic.

27 Xchi’uc ja’ jech ta xc’ot ta pasel ta baq’uin ti ta xc’opojic xch’ich’alic ch’ul viniquetic ta Cajvaltic ta sventa ti c’u x elan la spasic ta mucul xchi’uc ti yabtelic ta ic’al osile.

28 Jech, ta xc’ot ta pasel ta baq’uin ti muyuc xa ta xich’ pasel ti stsatsal Rioxe, xchi’uc ti ch’ulnaetique ta xich’ soquesel xchi’uc ta xich’ toyel ta sventa stoyubbail yo’ntonic, jech, ja’ jech ta baq’uin ti banquilaletic xchi’uc maistroetic ta sventa ch’ulnae ta spasic ta sventa stoyubbail yo’ntonic, ja’ to ti c’uxi ta sbajic scotol ti boch’otic ja’ic te ta xch’ulnaique.

29 Jech ta sta sc’ac’alil ta baq’uin, ti ta xich’ a’yel c’oq’uetique xchi’uc ti chauquil vo’e, xchi’uc ti sjob xch’ayilal yantic muc’tiquil jteclume.

30 Xchi’uc xtoc ta xich’ a’yel pas c’op, xchi’uc ta xlo’ilajic ti ta xtal pas c’op xchi’uc ta sventa muc’tiquil niqueletic ta scotol banamile.

31 Jech, ta sta sc’ac’alil ta baq’uin ti ta xc’ot ta pasel muc’tic c’usutic chopol ta sba scotol banamile, ta xc’ot ta pasel milbail xchi’uc elec’, xchi’uc epal c’op, xchi’uc lo’lavanej, xchi’uc mulivajel, xchi’uc scotol ta chop bolililetic; ti c’alal jech ep ta xalic: Paso li’e, paso li’ yane, xchi’uc mu aventauc, yu’un ti ta slajebal c’ac’al ta scolta Cajvaltic ti boch’o jech tspase, jech, ¡ja’ abul sbaic, ti boch’otic oyic ta at o’ntonale xchi’uc ti oyic ta xch’ajunal bolililetique!

32 Xchi’uc ta sta sc’ac’alil ta baq’uin ti ta xich’anan liquesel ch’ulnaetic ti jech ta xalic: La’ic ta jtojolal, xchi’uc ta ataq’uinic no’ox xu’ xavich’ic pasbel pertonal yu’un amulic.

33 ¡Vo’ot jteclum muyuc lecoxuc, xchi’uc ti tu jtsots a vo’ntonique! ¿c’uyu’un la pasic ch’ulnaetic ti c’uxi xu’ xa taic c’usi lec alac’ sba avu’nique? ¿c’u yu’un la ts’otbinic ti xch’ul a’yej Riox ti c’uxi xu’ la vich’ic tal vocolil ta sventa a ch’ulelique? ja’ jech, q’uelic lec ti c’usi yaloj Rioxe, xchi’uc ja’ jech, ta xc’ot ta baq’uin ti sc’ac’alil scotol c’usitic va’aye.

34 Ja’ jech, ti Cajvaltique yac’ojbun ta ilel ti c’usitic muc’tic xchi’uc lavalic sba ta sventa ti c’usitic jutuc xa sc’an xtale, ti c’alal ta xvinaj ta atojolalic ti c’usitic va’aye.

35 Ja’ jech, li’ cha jc’opanoxuc, jech chac c’u cha’al xco’laj xchi’uc yu’un li’ cha jchi’noxuc ta lo’il ya’eluque, ja’ jech, ac’o me muyuc li’oyoxuc, xchi’uc ja’ jech, Jesucristo la jyac’bun quil, xchi’uc xcotquin ti avabtelique.

36 Xchi’uc jna’oj ti ja’ te oyoxuc ta stoyub bail a vo’ntonique, xchi’uc ja’ jutuquic ti boch’otic muyuc tstoy sba yo’ntonique, ti jech ta slapic c’uil toyolic stojole, xchi’uc ti jech mu xc’anvanique, xchi’uc ti ta uts’intavaneje, xchi’uc ti ta c’usi tu j ech’em chopole, xchi’uc ti ta scotol ta chop bolililetique; xchi’uc ta xch’ulnaique, ja’ jech mu jutucuc ti pasem ta chopol avu’nic ti ta sventa stoyubbail a vo’ntonique.

37 Yu’un ti li’e, ja’ cha c’anic ti taq’uine, xchi’uc ti c’usi avu’nique, xchi’uc ti ac’u’ic toyolic stojole, xchi’uc ti c’usitic lec alaq’uic sba ta ach’ulnaique, yu’un ja’ ech’em cha c’anic jech chac c’u cha’al boch’otic me’onic xchi’uc boch’otic muyuc c’usi oy yu’nic, xchi’uc jchameletic, xchi’uc boch’otic ta xat yo’ntonic.

38 ¡Vo’xuc ti tu jchopoloxuque, xchi’uc ti j epal c’opoxuque, xchi’uc ti maistrooxuque, xchi’uc ti cha chon a vaic ti ta c’usi ta xca’e! ¿c’uyu’un ti la vic’umtasic xch’ulna Rioxe? ¿c’uyu’un ti cha q’uexoic ti jech cha tsaquic ta a ventaic ti sbi Cristoe? ¿c’uyu’un van ti ja’ ta sventa c’usi muyuc lec ta banamil ti jech mu xa ch’un ti me ja’ tsots sc’oplal ti c’uxetel o’ntonal muyuc slajeb jech chac c’u cha’al uts’intael muyuc slajebe.

39 ¿C’uyu’un ti ja’ te cha vac’ abaic o ti ta c’usi muyuc xch’ulele, ti jech muyuc cha colta ti boch’o chvi’naje, xchi’uc ti boch’o t’anale, xchi’uc ti boch’o jchamele, xchi’uc ti boch’o ta xat yo’nton ta xjelo ta a xoconic ti jech muyuc bu cha vich’ic ta muq’ue?.

40 Jech, ¿c’uyu’un ti cha pasic chopolil ta mucul ti c’uxi xu’ cha taic c’usi alac’ sba avu’nique, xchi’uc ti jech cha vaq’uic oc’uc ti me’on antsetique, xchi’uc ti me’on ololetic ta x oc’ ta stojolal Cajvaltique, xchi’uc xtoc ti xch’ich’al stotic xchi’uc ti xch’ich’al smalalic ta sc’anbeic Cajvaltic li’ to ta banamil, ti c’uxi xu’ xa ac’batic vocolil ta a jolique.

41 Ja’ jech ti machitail bu ta spac sc’oplale ta xnichin ta atojolalic, xchi’uc jutuc xa sc’an xtal ti sc’ac’alil jech ta spac sc’oplalile ti xch’ich’al ch’ul viniquetic ta atojolalique. Yu’un mu xa sts’ic yu’nic epal c’ac’al ti yoq’uelique.