1 Ao ngkai e a koro bukina bwa n te katenibubua ao onobwi ma teniua n ririki ao Nibwaite a bon waerake ma aia taanga ni buaka ni kaaitaraia Reimwanaite, n otinako man te aba are Kamaroa.

2 Ao e a koro bukina bwa a bon kakioaki n oki nakon te aba are Kamaroa aia taanga ni buaka Nibwaite. Ao ngke a kua ao, a manga kaoti aia taanga ni buaka Reimwanaite aika a marurung ma n roko i aoia; ao a buaka n te buaka ae korakora, n te aro are Reimwanaite a bon taua te kaawa are Kamaroa, ma n tiringia Nibwaite aika a mwaiti, ma n uotia nako bwa bure.

3 Ao nikiraia a bon birinako ma n raonia kaain te kaawa are Teaenikam. Ngkai te kaawa are Teaenikam e bon mena n te tia i rarikin mataniwin te bike; ao e mena naba i rarikin te kaawa are Kamaroa.

4 Ao aio ibukina bwa aia taanga ni buaka Nibwaite a bon waerake nakoia Reimwanaite, ngaia are a bon oreaki; bwa ngke arona bwa e aki riki aio, ao e na bon akea korakoraia Reimwanaite i aoia.

5 Ma, nooria, ana motikitaeka te Atua e na bon mena i aoia naake a buakaka; ao a na bon katuaeaki ake a buakaka irouia ake a buakaka; bwa bon ake a buakaka aika a kakiriwea nanoia natiia aomata bwa a na kawawaea te raraa.

6 Ao e a koro bukina bwa a bon katauraoi Reimwanaite bwa a na roko ni kaitara te kaawa are Teaenikam.

7 Ao e a koro bukina bwa n te katenibubua ao onobwi ma aua n ririki ao a bon roko Reimwanaite ni kaitara te kaawa are Teaenikam, bwa aonga n taua naba te kaawa are Teaenikam.

8 Ao e a koro bukina bwa a bon konaki ma ni kakioaki n oki irouia Nibwaite. Ao ngke Nibwaite a nooria bwa a kakioia Reimwanaite a bon kamoamoa ibukin oin korakoraia; ao a bon mwananga n oin korakoraia, ma n taua riki te kaawa are Kamaroa.

9 Ao ngkai a bane bwaai aikai n tia ni karaoaki, ao bon ngaa ma ngaa ake a tia n tiringaki n itera aika uoua, irouia Nibwaite ao Reimwanaite.

10 Ao e a koro bukina bwa e a bane te katenibubua ao onobwi ma onoua n ririki, ao a manga roko riki Reimwanaite i aoia Nibwaite bwa a na buaka; ao a bon aki naba rairinanoia Nibwaite man te buakaka are a tia ni karaoia, ma a bon teimatoa naba i nanon aia buakaka.

11 Ao e bon kaangaanga bwa e na kabwarabwara te neewe, ke bwa te aomata e na kabwarabwara n te aro ae akea bureburena te aro ni kakamaku are e waanako iai te raraa ma n uruaki iai te maiu are e waaki i buakoia aomata, irouia Nibwaite ao irouia Reimwanaite ao a bon matoatoa naano ni kabane, n te aro are a bon kukurei ni kawawaean te raraa ae reiti nako.

12 Ao bon akea te tai ae e a tia n rangi ni korakora iai te buakaka i buakoia nako natin Riaai, ke i buakoia naba ni kabane te bata are Iteraera, n aron ana taeka te Uea, n aron are e mena i buakoia te botanaomata aio.

13 Ao e a koro bukina bwa a bon taua te kaawa are Kamaroa Reimwanaite, ao e riki aei ibukina bwa e korakora riki mwaitia nakoia Nibwaite.

14 Ao a bon mwananga nako naba ni kaitara te kaawa are Teaenikam, ma ni kakioia nako kaaina mai iai, ma n uotia nako aia bure aika aine ao ataei, ma n anga ngaia bwa karea nakoia atuaia aika bouananti.

15 Ao e a koro bukina bwa n te katenibubua ao onobwi ma itiua n ririki, ao a un Nibwaite ibukina bwa a tia Reimwanaite n anga aia aine ma natia bwa karea, n te aro are a kaaitaraia Reimwanaite ma te un ae rianako korakorana, n te aro are a bon konaia Reimwanaite ma ni kakioia man abaia.

16 Ao a bon aki manga roko Reimwanaite ni kaitaraia Nibwaite ni karokoa te katenibubua ao itibwi ma nimaua n ririki.

17 Ao n te ririki aio a bon roko ni kaitaraia Nibwaite ma korakoraia ni kabane; ao a bon aki warekaki mwaitia ibukin korakoran mwaitia.

18 Ao man te tai anne ao Reimwanaite a bon aki manga karekea te korakora i aoia Nibwaite, ma a tiringaki irouia n aron te aoi imatan taai.

19 Ao e koro bukina bwa a ruo rikaaki Reimwanaite ni kaitaraa te kaawa are Kamaroa; ao bon iai te buaka ae rianako korakorana n te aba are Kamaroa, are a konaki iai Nibwaite.

20 Ao a manga birinako mai imataia, ao a roko nakon te kaawa are Boati; ao a bon tei ikekei ni kaitaraia Reimwanaite ma te ninikoria ae korakora, n te aro are aikoa konaki irouia Reimwanaite nua ae a manga roko riki te kaua tai.

21 Ao ngke a tia n roko te kauoua n tai, a kakioaki Nibwaite ma n tiringaki n te tiritiri ae rianako korakorana; ao aia aine ma natiia a bon manga kareanaki riki nakoia bouananti.

22 Ao e koro bukina bwa a manga biri nako Nibwaite mai imataia, ma ni kairiia nako ma ngaiia, kaain taian kaawa ao kaawa aika a uarereke.

23 Ao ngkai, Ngai ae Moomon, ngke I a nooria bwa a nang taonanako te aba Reimwanaite, ngaia are I a bon nakon te tabuki are Tiim, ma n anai ni kabane taian reekoti ake e karabai Amaron iroun te Uea.