1 Kag natabo ini nga naglakat ako sa tunga sang mga Nefinhon, kag ginbawi ang panumpa nga akon ginhimo nga indi na ako magbulig sa ila; kag ginhatagan nila ako liwat sang awtoridad sa ila mga kasoldadohan, kay nagtulok sila sa akon nga daw ako ang makaluwas sa ila halin sa ila mga pag-antos.

2 Apang tan-awa, nangin wala ako sing paglaum, kay nahibal-an ko ang mga paghukom sang Ginuo nga magatupa sa ila; kay wala sila naghinulsol sang ila mga kalainan, kundi naghimakas para sa ila mga kabuhi nga wala nagapanawag sa sinang Persona nga nagtuga sa ila.

3 Kag natabo ini nga ang mga Lamanhon nagsalakay batok sa amon samtang nagapalagyo kami pakadto sa siyudad sang Jordan; apang tan-awa, napaisol sila nga wala nila nakuha ang siyudad sa sina nga tion.

4 Kag natabo ini nga nagsalakay sila liwat sa amon, kag nahawiran namon ang siyudad. Kag may iban pa nga mga siyudad nga nahawiran man sang mga Nefinhon, nga ang mga pamakod sang mga ini nag-upang sa ila agud indi sila makasulod sa pungsod nga nahamtang sa amon atubang agud laglagon ang mga pumuluyo sang amon kadutaan.

5 Apang natabo ini nga bisan diin man nga mga kadutaan ang amon nalabyan, kag ang mga pumuluyo sini wala natipon, nalaglag sang mga Lamanhon, kag ang ila mga banwa, kag mga baryo, kag mga siyudad ginsunog sang kalayo; kag gani nagligad ang tatlo ka gatos kag sitenta’y nuebe ka tuig.

6 Kag natabo ini nga sa ika-tatlo ka gatos kag otsenta nga tuig ang mga Lamanhon nagsulong liwat batok sa amon sa pagpakig-away, kag nagtindog kami sing maisog batok sa ila; apang ini tanan wala sing kapuslanan, kay sa pagkadako sang ila kadamuon nga gintasak nila ang katawhan sang mga Nefinhon sa idalom sang ila mga tiil.

7 Kag natabo ini nga nagpalagyo kami liwat, kag yadtong ang pagpalagyo mas madasig sangsa pagsulong sang mga Lamanhon wala nadakpan, kag yadtong ang pagpalagyo wala naglabaw pa sangsa pagsulong sang mga Lamanhon napatay kag nalaglag.

8 Kag karon tan-awa, ako, si Mormon, wala nagahandum sa pagtublag sang mga kalag sang mga tawo sa pagladlad sa ila atubang sang amo ka makahaladlok nga talan-awon sang dugo kag pagpamatay pareho sang nalantad sa atubang sang akon mga mata; apang ako, kay nakahibalo nga ining mga butang dapat gid nga ipahibalo, kag ang tanan nga butang nga natago dapat gid nga mapahayag sa ibabaw sang mga atop sang balay—

9 Kag amo man nga ang ihibalo parte sining mga butang dapat gid nga makaabot sa nagkalabilin sining katawhan, kag amo man sa mga Gentil, nga amo ang ginsiling sang Ginuo nga magapalapta sining katawhan, kag ining katawhan pagakabigon nga wala’y pulos sa ila—gani nagasulat ako sing isa ka gamay nga pagpalip-ot, nga wala nagapangisog sa paghatag sang bug-os nga kasaysayan sang mga butang nga nakita ko, tungod sang kasugoan nga nabaton ko, kag agud indi man kamo tuman nga magkasubo tungod sang kalainan sining katawhan.

10 Kag karon tan-awa, ini ginahambal ko sa ila kaliwatan, kag amo man sa mga Gentil nga may pag-ulikid para sa panimalay ni Israel, nga nakahangop kag nakahibalo kon diin nagahalin ang ila mga pagpakamaayo.

11 Kay nakahibalo ako nga magakasubo sila tungod sang kalamidad nga matabo sa panimalay ni Israel; huo, magakasubo sila tungod sang kalaglagan sining katawhan; magakasubo sila nga ining katawhan wala naghinulsol agud nga nahakos sila kuntani sang mga butkon ni Jesus.

12 Karon ining mga butang ginasulat sa nagkalabilin sang panimalay ni Jacob; kag ginasulat ang mga ini sa sini nga paagi, tungod nahibal-an sang Dios nga ang kalainan indi magdala sang mga ini sa ila; kag ipatago ang mga ini sa Ginuo agud maggwa ang mga ini sa iya kaugalingon nga natalana nga tion.

13 Kag amo ini ang kasugoan nga akon nabaton; kag tan-awa, magagwa ang mga ini suno sa kasugoan sang Ginuo, kon makita niya nga nagakaigo, suno sa iya kaalam.

14 Kag tan-awa, ipahayag ang mga ini sa sinang mga Judio nga wala nagapati; kag para sa sini nga tinutuyo ipahayag ang mga ini—agud nga mapapati sila nga si Jesus amo ang Cristo, ang Anak sang buhi nga Dios; agud nga mapahanabo sang Amay, paagi sa iya labing Hinigugma, ang iya dako kag wala’y katapusan nga katuyoan, sa pagpapanumbalik sang mga Judio, ukon sang bug-os nga panimalay ni Israel, sa duta nga ila palanublion, nga ginhatag sa ila sang Ginuo nga ila Dios, sa pagtuman sang iya kasugtanan;

15 Kag agud man nga ang kaliwatan sining katawhan lubos pa gid nga magpati sa iya ebanghelyo, nga ipahayag sa ila halin sa mga Gentil; kay ining katawhan magalinapta, kag mangin maitom, mahigko, kag makangilil-ad nga katawhan, nga masobra kaayo sangsa paglarawan sinang mga nangin yara sa aton sadto, huo, bisan sinang mga nangin yara sa mga Lamanhon sadto, kag ini tungod sang ila pagkawala’y pagtuo kag pagsimba sa mga dios-dios.

16 Kay tan-awa, ang Espiritu sang Ginuo nag-untat na sa pag-impluwensya sa ila mga amay; kag wala na sila sing Cristo kag Dios sa kalibutan; kag ginapalid-palid sila pareho sang upa sa hangin.

17 Isa sila sadto ka makalilipay nga katawhan, kag may Cristo sila bilang ila manugpahalab; huo, ginpangunahan sila bisan sang Dios nga Amay.

18 Apang karon, tan-awa, ginadala sila ni Satanas, bisan pareho nga ang upa ginapalid-palid sang hangin, ukon pareho nga ang isa ka sakayan-dagat ginabati-bati sang mga balod, nga wala sing layag ukon angkla, ukon wala sing bisan ano nga makapahulag sini; kag bisan pareho sa iya, amo man sila.

19 Kag tan-awa, gintigana sang Ginuo ang ila mga pagpakamaayo, nga ila kuntani nabaton sa kadutaan, para sa mga Gentil nga magapanag-iya sang kadutaan.

20 Apang tan-awa, matabo ini, nga panabugon sila kag palaptahon sang mga Gentil; kag pagkatapos nga mapanabog sila kag mapalapta sang mga Gentil, tan-awa, dayon ang Ginuo magadumdum sang kasugtanan nga iya ginhimo kay Abraham kag sa bug-os nga panimalay ni Israel.

21 Kag ang Ginuo magadumdum sang mga pangamuyo sang mga matarong nga ginpangayo sa iya para sa ila.

22 Kag kon amo, O kamo nga mga Gentil, paano kamo makatindog sa atubang sang gahum sang Dios, luwas lang kon maghinulsol kamo kag talikdan ang inyo malain nga mga paggawi?

23 Wala bala kamo nakahibalo nga yara kamo sa mga kamot sang Dios? Wala bala kamo nakahibalo nga yara sa iya ang tanan nga gahum, kag sa iya gamhanan nga sugo ang duta magalokot sing tingob pareho sang linokot nga papel?

24 Gani, maghinulsol kamo, kag magpaubos sang inyo mga kaugalingon sa iya atubang, kay basi magagwa sia kag patup-on ang hustisya batok sa inyo—kay basi ang nagkalabilin sang kaliwatan ni Jacob magkadto sa inyo pareho sing isa ka leon, kag gusniton kamo sa mga tinipik, kag wala sing bisan sin-o nga makaluwas.