1 Ao e koro bukina bwa I bon mwananga nako i buakoia Nibwaite, ma n rairananou man te berita are I karaoia ma ngaiia are N na manga aki oki ni buokiia; ao a bon manga anganai riki bwa N na kairiia aia taanga ni buaka, bwa a bon taraai bwa I kona ni kainaomataia man karawawatakia.

2 Ma nooria, bon akea au kantaninga, bwa I bon ataa ana motikitaeka te Uea are e na roko i aoia; bwa a bon aki rairinanoia man aia bure, ma a bon kekeiaki ibukin maiuia ma n aki wewetea Teuare e karikiia.

3 Ao e a koro bukina bwa a roko Reimwanaite ni kaaitaraira ngke ti birinako man te kaawa are Ioretan; ma nooria, a bon kakioaki rikaaki ngaia are a aki taua te kaawa n te tai anne.

4 Ao e a koro bukina bwa a bon roko ni kaaitaraira riki, ao ti bon taua ara kaawa. Ao bon iai riki kaawa tabeua ake a tauaki irouia Nibwaite, are aia tabo ni katantan ake a bon katokiia bwa a na aki kona n roko n te aba are e wene i mwaira, bwa a na tiringia naake a maeka n abara.

5 Ma e a koro bukina bwa aaba ake ti rirarikiia, ake a bon aki botaki iai kaaia, a bon uruakaki irouia Reimwanaite, ma aia kaawa aika a tau buburaia, ma kaawa aika a uarereke, ao aia kaawa nako a bon kabuekaki n te ai; ao ikai are e a bane iai tenibubua ao itibwi ma ruaiwa te ririki.

6 Ao e a koro bukina bwa n te katenibubua ao wanibwi n ririki ao a manga roko riki ni kaaitaraia n te buaka Reimwanaite, ma ti bon ninikoria n tei ni kaaitaraia; ma e bon matebuaka, bwa e bon rangi ni korakora mwaitia n te aro are a bon toubekaia Nibwaite i aan waeia.

7 Ao e a koro bukina bwa ti bon birinako, ao naake a waekoa riki aron birinakoia imwaia Reimwanaite a bon birinako, ao naake a waeremwe aron birinakoia imwaia Reimwanaite a bon kabwakaki ma n tiringaki.

8 Ao ngkai nooria, Ngai, Moomon, I bon aki tangiria bwa N na karawawata tamneia aomata ni kaota nakoia aron tarakin te raraa ma te urubwai nakon te maiu, ae moan te kakamaku n aron are e a wene imatau; ma Ngai, I ataia bwa a na riai ni kaotaki bwaai ni kabane, ao bwaai ake a karabaki a na bon kaotaki mai taubukin mwenga nako—

9 Ao riki e na bon roko ataakin bwaai aikai nakoia nikiraia te botanaomata aikai, ao nakoia naba Tientaire, are e taku te Uea bwa a na kamaenakoia te botanaomata aio, ao a na warekaki te botanaomata aio bwa akea bonganaia i buakoia—ngaia are I korea te rongorongo ae uarereke, bwa I maaku ni kabwanina raoi rongorongon are I a tia n nooria, ibukin te tua are I a tia ni karekea, ao riki bwa kam aonga n aki rangi n nanokawaki ibukin buakakaia te botanaomata aio.

10 Ao ngkai nooria, I taekina aio nakoia aia kariki, ao nakoia naba Tientaire ake a tabe nanoia irouia kaain te bata are Iteraera, ao a bon namakinna ma n ataia bwa e roko mai ia kakabwaiaia.

11 Bwa I ataia bwa a na bon nanokawaki ibukin taian kaangaanga ake e na rotaki iai te bata are Iteraera; eng, a na nanokawaki ibukin kamaunakia te botanaomata aio; a na nanokawaki ngkai a bon aki rairananoia te botanaomata aio, bwa ngke ngkai ao a na bon rabwataki i nanon bain Iesu.

12 Ngkai a koreaki bwaai aikai nakoia nikiraia kaain te bata are Iakobwa; ao a bon koreaki n te aekaki aei, ibukina bwa e bon ataaki iroun te Atua bwa a na bon aki kaotaki bwaai aikai nakoia man te buakaka; ma a na karabaki iroun te Uea bwa a na kona n roko ni bon oin ana tai.

13 Ao bon aio te tua are I a tia ni karekea; ao nooria, a na bon roko n aron ana tua te Uea, ngkana e nooria bwa e riai, n oin wanawanana.

14 Ao nooria, a na roko bwaai aikai nakoia Iutaia ake a kakewekewe; ao ibukin aei ao a na anganaki—bwa a na kairoroaki bwa Iesu bon te Kristo, Natin te Atua ae maiu; bwa e aonga ni kakoroa bukin ana kantaninga ae korakora ao akea tokina, rinanon Natina ae Moan te Tangiraki, ibukin kaokakia Iutaia, ke ni kabane te bata are Iteraera, nakon abaia ni bwaibwai, are te Uea ae Atuaia e a tia n anganiia, ibukin kakoroan ana berita ae tabu.

15 Ao riki bwa aonga kanoaia te botanaomata aio ni kakoaua riki ana euangkerio, are e na nako mai irouia Tientaire; bwa a na maenako te botanaomata aio, ma n riki ni bwatabwata, ni kammaira, ma n riki bwa aomata aika a ribaki, n te aro ae e aki kona ni kabwarabwaraki aekan aroia i buakora ma i mwaaina, eng, ae riaon riki are i buakoia Reimwanaite, ao e riki aio ibukin aia kakewekewe ma taromauriaia bouananti.

16 Bwa nooria, e a kaman akea Tamnein te Uea irouia aia bakatibu; ao akea Kristo ma te Atua irouia n te aonaba; ao a bon ukaki n aron kunin te wiita n te ang.

17 Bon aomata aika a tikiraoi ngkoa, ao bon aia tia kaawakin tiibu Kristo; eng, ao a bon kairaki iroun te Atua te Tama.

18 Ma ngkai, nooria, a bon kairiraki iroun Tatan, n aron kunin te wiita are e ukaki n te ang, ke n aron te kaibuke are e kibakiba n aki akaaka iaon te nao, n akea iena ke roona, ke akea te bwai are e na bwenaki iai; ao a katotonga arona.

19 Ao nooria, e tautau aia kakabwaia te Uea, are a na bon kona ni karekea n te aba, ibukiia Tientaire ake a na taua te aba.

20 Ma nooria, e na koro bukina bwa a na kakiokioaki ma ni kamaenakoaki irouia Tientaire ao i mwin are a tia ni kakiokioaki ma ni kamaenakoaki irouia Tientaire, nooria, ngkanne te Uea e na uringa te berita are e tabu are e karaoia nakon Aberaam ao nakoia ni kabane te bata are Iteraera.

21 Ao e na uringa naba te Uea aia tataro ake a raoiroi, are a tia n uotaki nakoina ibukiia.

22 Ao ngkanne, O ngkami Tientaire, kam na kanga n tei imatan mwaakan te Atua, ma ti ngkana kam rairinanomi ma n rairaki man aromi aika a bubuaka?

23 Kam aki ataia bwa kam mena i nanon bain te Atua? Kam aki ataia bwa iai irouna te mwaaka ni kabane ao man ana taeka ae korakora ao e kona n niniraki te aonaba n aron te ninira ni boki.

24 Ngaia are, rairinanomi, ma n nanorinano imatana, bwa mwiina e na roko ma te momotiraoi ni kaaitarai ngkami—bwa mwiina ao kanoan Iakobwa a na waaki i buakomi n aron te raian, ma n raebiti ngkami nakon mwakorokoro, ao a na bon akea ae e na kamaiui ngkami.