1 Ug karon, tan-awa, gusto ako nga mamulong sa salin niini nga katawhan nga naluwas, kon ang Dios mohatag kanila sa akong mga pulong, nga sila masayod sa mga butang sa ilang mga amahan; oo, sultihan ko kamo, kamo nga salin sa balay ni Israel; ug mao kini ang mga pulong nga akong isulti:

2 Hibaloi ninyo nga kamo sakop sa balay ni Israel.

3 Hibaloi ninyo nga kamo kinahanglan nga maghinulsol, o kamo dili maluwas.

4 Hibaloi ninyo nga kamo kinahanglan nga mobutang sa inyong mga hinagiban sa gubat, ug dili na mahimuot sa pagpaagas sa dugo, ug dili na mogamit niini pag-usab, gawas kon ang Dios mosugo kaninyo.

5 Hibaloi ninyo nga kamo kinahanglan nga makaangkon og kasayoran kabahin sa inyong mga amahan, ug maghinulsol sa tanan ninyong sala ug pagkadaotan, ug motuo kang Jesukristo, nga siya mao ang Anak sa Dios, ug nga siya gipatay sa mga Judeo, ug pinaagi sa gahom sa Amahan siya nabuhi pag-usab, diin siya nakaangkon og kadaogan sa lubnganan; ug usab gituhop diha kaniya ang kahapdos sa kamatayon.

6 Ug iyang gipahitabo ang pagkabanhaw sa mga patay, diin ang tawo mabanhaw aron mobarog sa atubangan sa iyang hukmanan.

7 Ug iyang gipahitabo ang katubsanan sa kalibotan, pinaagi niini siya nga hikaplagan nga walay sala sa iyang atubangan sa adlaw sa paghukom siya tugotan sa pagpuyo sa presensya sa Dios didto sa iyang gingharian, aron sa pag-awit sa walay hunong nga mga pagdayeg uban sa koro sa kahitas-an, ngadto sa Amahan, ug ngadto sa Anak, ug ngadto sa Espiritu Santo, nga usa ka Dios, diha sa usa ka kahimtang sa kalipay nga walay kataposan.

8 Busa maghinulsol, ug magpabunyag sa ngalan ni Jesus, ug maghupot sa ebanghelyo ni Kristo, nga ihatag kaninyo, dili lamang niini nga mga talaan apan sa talaan usab nga moabot ngadto sa mga Hentil gikan sa mga Judeo, diin ang mao nga talaan magagikan sa mga Hentil nganha kaninyo.

9 Kay tan-awa, kini gisulat sa tuyo aron kamo motuo niana; ug kon kamo motuo niana kamo motuo usab niini; ug kon kamo motuo niini kamo masayod kabahin sa inyong mga amahan, ug usab sa kahibulongan nga mga buhat nga nahitabo pinaagi sa gahom sa Dios taliwala kanila.

10 Ug kamo usab masayod nga kamo mao ang salin sa binhi ni Jacob; busa kamo giihap uban sa katawhan sa unang pakigsaad; ug kon motuo kamo kang Kristo, ug magpabunyag, una pinaagi sa tubig, unya pinaagi sa kalayo ug pinaagi sa Espiritu Santo, nga nagsunod sa ehemplo sa atong Manluluwas, sumala nianang iyang gisugo kanato, maayo kini alang kaninyo sa adlaw sa paghukom. Amen.