1 Ia oqo, au na vosa tale ga me baleti ira era sa sega ni vakabauta na Karisito.

2 Raica, dou na vakabauta li ena siga ni nomudou veitotogitaki—raica ena gauna ena lako mai kina na Turaga, io, ena siga sa levu ko ya, ni na vivigi kina na vuravura me vaka na ivolavivigi, ka na waicala na veivunika ena katakata warumisa, io, ena siga sa levu ko ya, ni dou sa kau mai kina mo dou tu ena mata ni Lami ni Kalou—dou na kaya rawa li ni sa sega na Kalou?

3 Dou na cakitaka tiko ga na Karisito se dou sa na vakabauta na Lami ni Kalou? Dou nanuma li ni na rawa mo dou tiko vata kei koya ni dou sa kila tu na nomudou cala? Dou nanuma li ni na rawa mo dou tiko marau vata kei na Ka Bula tabu ko ya ni sa kurelaki tu na yalomudou ni dou sa kila vinaka tu na nomudou cala, ni dou a vakacacana na nona lawa?

4 Raica, au sa kaya vei kemudou, dou na rarawa vakalevu cake kevaka dou sa tiko vata kei na Kalou tabu ka lewa dodonu, ni dou sa kila tu na nomudou dukadukali e matana, ka vinaka cake mo dou tiko vata ga kei ira na yalo, sa cudruvi mai eli.

5 Raica ni sa vakavotui na nomudou luvaiwale ena mata ni Kalou ka dou sa raica na iserau ni Kalou kei na lagilagi i Jisu Karisito, ena tuburi kemudou na rarawa sa vaka na yameyame ni bukawaqa tawaboko rawa.

6 O koya mo dou qai saumaki vua na Turaga koi kemudou na tawavakabauta; dou masu vagumatua vua na Tamada ena yacai Jisu, de dou na bau kunei kina ni dou sa sega ni tauvi duka, savasava, totoka, ka vulavula ni dou sa vakasavasavataki ena dra ni Lami ena siga mai muri sa levu ko ya.

7 Ka’u na vosa tale vei kemudou sa cakitaka na veivakatakila ni Kalou, ka kaya ni sa oti ka sa sega na ivakatakilakila se parofisai, na isolisoli, na veivakabulai, na vosa tani e so kei na vakadewataki ni vosa tani e so;

8 Raica, au sa kaya vei kemudou, ko koya sa cakitaka na veika oqo sa sega ni kila na kosipeli i Karisito; io, sa sega ni wilika na ivolanikalou; ia kevaka sa wilika, sa sega ga ni kila na kedra ibalebale.

9 Eda sa sega li ni wilika ni sa i koyakoya tiko ga na Kalou enanoa, na siga edaidai ka sega ni mudu, ka sa sega vua na veivukiyaki se na yaloyalo ni veigoleyaki?

10 Ia oqo, kevaka dou sa vakananuma vei kemudou e dua na kalou e dau veivukiyaki ka tu vua na iyaloyalo ni veigoleyaki, ia dou sa vakananuma vei kemudou e dua na kalou tani ka sega ni Kalou ni cakamana.

11 Ia raica, au na vakaraitaka vei kemudou e dua na Kalou ni cakamana, sa i koya na Kalou i Eparaama, kei na Kalou i Aisake, kei na Kalou i Jekope; ia sai koya vata ga na Kalou ka a bulia na lomalagi kei na vuravura kei na veika kecega sa tu kina.

12 Raica, e a buli Atama ko koya, ka sa vu mai vei Atama na lutu ni tamata. Ia ena vuku ni lutu ni tamata sa lako mai kina ko Jisu Karisito, o koya sa vakatokai na Tamana kei na Luvena; ia ena vuku i Jisu Karisito era sa sereki rawa kina na tamata.

13 Ia ni ra sa sereki na tamata mai vei Jisu Karisito, era sa kau lesu ki na iserau ni Turaga; io, oqo na sala era sa sereki kina na tamata kecega, na mate i Karisito sa yaco kina na tucake tale mai na mate ka ra sereki kina na tamata kecega mai na dua na moce tawacava, na moce ka ra na qai vakayadrati ga mai kina na tamata kecega ena kaukauwa ni Kalou ni sa uvuci na davui; ka ra na qai tucake mai na mate na tamata lalai kei na turaga, ni ra sa sereki mai na ivesu ni mate tawamudu oqo, na mate vakayago, io era na tu kece ena mata ni nona itikotiko ni veilewai.

14 Ka na qai tau vei ira na nona lewa o koya na Yalo Savasava; ka na yaco na gauna ni, ko koya sa dukadukali ena dukadukali tiko ga; ko koya sa ivalavala dodonu ena ivalavala dodonu tiko ga; ko koya sa marau ena marau tiko ga; kei koya sa rarawa ena rarawa tiko ga.

15 Ia oqo au via tarogi kemuni mada ko i kemuni sa vakananuma e yalomuni e dua na kalou e sega ni cakava rawa na mana, sa oti li na vakayacori ni veika au tukuna tiko? Sa oti li na kena gauna? Raica au sa kaya vei kemudou, E segai; e se sega ni cava na nona Kalou ni cakacaka mana na Kalou.

16 Raica era sega li ni talei e matamu na veika sa vakayacora oti na Kalou? Io, ko cei sa kila rawa na veicakacaka talei ni Kalou?

17 O cei ena kaya ni sega ni cakacaka mana na nona bulia na lomalagi kei na vuravura ena nona vosa; se na nona bulia na tamata mai na kuvu-ni-soso ena kaukauwa ni nona vosa; se na nona vakayacora na cakacaka mana tale eso ena kaukauwa ni nona vosa?

18 O cei ena kaya ni a sega ni vakayacora ko Jisu Karisito e vuqa na cakacaka mana lelevu? Ka a vakayacori tale ga e vuqa na cakacaka mana lelevu ena ligadratou na iapositolo.

19 Ia kevaka era sa vakayacori e vuqa na cakacaka mana ena gauna ko ya, a cava me sa sega kina ni Kalou ni caka mana, ka ni sa Kalou sega ni dauveivukiyaki ko koya? Ka raica au sa kaya vei kemudou, sa sega ni dauveisau ko koya; kevaka e vaka kina, ia sa sega ni Kalou ko koya; ia sa Kalou ko koya, ka sa Kalou ni caka mana.

20 Ia sa sega ga ni vakayacora na cakacaka mana ena kedra maliwa na luve ni tamata ni ra sa malumalumu mai ena vakabauta, era sa gole tani mai na sala dodonu, ka ra sega ni kila na Kalou ka dodonu me ra vakararavi vua.

21 Raica, au sa kaya vei kemudou, ko koya sa vakabauta na Karisito ka sega tale ni vakatitiqa, ena soli vua na ka kecega sa kerea vei Tamada ena yacai Karisito; ia sa soli tu na vosa ni yalayala oqo vei ira na tamata kecega me yacova sara na iyalayala kei vuravura.

22 Raica, sa kaya vakaoqo ko Jisu Karisito na Luve ni Kalou vei iratou na nona tisaipeli ka ratou na bula tiko, io, kei ira kece na nona tisaipeli, ni ra rogo tu na lewe vuqa: Dou lako yani ki vuravura taucoko, ka vunautaka na kosipeli vei ira na tamata kecega;

23 O koya sa vakabauta ka papitaisotaki, ena bula, ia ena cudruvi ga ko koya sa sega ni vakabauta;

24 Ia na veivakatakilakila oqo ena muri ira sa vakabauta—era na vakasava tani na tevoro ena yacaqu; era na vosataka na vosa vou e so; era na tomiki ira na gata; ia kevaka era na gunuva na ka e gaga sara, era na sega ni ca kina; era na tabaki ira sa tauvimate e ligadra, ka ra na bula kina;

25 Ia ko koya sa vakabauta na yacaqu ka sega tale ni vakatitiqa, au na vakadeitaka vua na noqu vosa kecega me yacova sara na iyalayala kei vuravura.

26 Ia oqo, raica, ko cei sa rawa me vorata na cakacaka ni Turaga? Ko cei sa rawa me cakitaka na nona vosa? Ko cei sa rawa me vorata na kaukauwa levu ni Turaga? Ko cei sa beca na cakacaka ni Turaga? Ko cei sa beci ira na luvei Karisito? Raica, koi kemudou kece sa beca na cakacaka ni Turaga, dou na lako sese ka rusa kina.

27 O koya mo dou kakua kina ni beca ka kakua ni lako sese, ia mo dou muria na vosa ni Turaga ka kerea vua na Tamada ena yaca i Jisu na veika cava ga dou sa gadreva. Dou kakua ni vakatitiqa, ia mo dou vakabauta ga ka tekivu me vaka ena gauna e liu ka lako vua na Turaga ena lomamudou taucoko, ka cakacakataka na nomudou vakabulai ena rere kei na sautaninini.

28 Mo dou vuku ena gauna ni nomudou vakatovotovo oqo; dou biuta tani na nomudou itovo dukadukali kecega; dou kakua ni kerea na ka mo dou vakayagataka ga ena nomudou gagadre ca, ia mo dou kerekere ena yalodei me kakua ni dou temaki, ia, mo dou qarava ga na Kalou dina ka bula.

29 Dou kakua ni papitaisotaki ni dou sega tu ni kilikili kaya; dou kakua ni kania ka gunuva na sakaramede i Karisito ni dou sega tu ni kilikili kaya; ia mo dou kitaka na ka kecega ni dou sa kilikili kaya ka vakayacora ena yaca i Jisu Karisito na Luve ni Kalou Bula; ia kevaka dou sa kitaka vakaoqo ka vosota me yacova na ivakataotioti, dou na sega sara ni muduki laivi.

30 Raica, au sa vosa vei kemudou me vaka mai na mate; ka ni’u kila ni dou na taura na noqu vosa.

31 Dou kakua ni vosa vakacacataki au ena vuku ni noqu malumalumu, se vosa vakacacataki tamaqu ena nona malumalumu se ko ira ka a volavola e liu vua; ia mo dou vakavinavinaka ga vua na Kalou, ni sa vakatakila vei kemudou na neimami malumalumu mo dou vuku cake kina mai vei keimami.

32 Ia raica oqo, keimami sa vola na itukutuku oqo me vaka na neimami kila na ivolavola vou vaka-Ijipita, ka sa soli mai ka keimami vukica me muria na neimami ivosavosa.

33 Kevaka me a rabailevu na neimami peleti, ke keimami a volavola ga vaka-Iperiu; ia keimami sa vukica tale ga na volavola vaka-Iperiu; ia kevaka me keimami a volavola vaka-Iperiu, ke a macala vinaka sara vei kemuni na neimami itukutuku.

34 Ia sa kila na Turaga na veika keimami sa vola, ka sa sega tale na tamata tani e kila na neimami vosa; baleta ni sa sega tale na tamata tani e kila na neimami vosa, o koya sa vakarautaka kina ko koya na ka me vakadewataki kina.

35 Ka sa volai na veika oqo me kakua kina ni tauva na neimami isulu na nodra dra na wekai keimami, ko ira era sa malumalumu sobu ena tawavakabauta.

36 Ka raica, na veika keimami gadreva oqo, ena vukudra na weka i keimami, io, na nodra vakalesui tale me ra kila na Karisito, sa salavata tale ga kei na nodra masu na yalododonu kece sara era a bula ena vanua oqo.

37 Ia me yalololoma na Turaga ko Jisu Karisito me vakayacora na ka era a masulaka me vaka na nodra vakabauta; ia me nanuma mada na Kalou na Tamada na veiyalayalati ka a cakava kei ira na mataqali i Isireli; ka me vakalougatataki ira mada me sega ni mudu, ni ra sa vakabauta na yaca i Jisu Karisito. Emeni.