1 I teienei, tē pāpa’i nei au, ’o Moroni, i tei mana’ohia e au e mea maita’i ; ’e tē pāpa’i nei au i tō’u mau taea’e ra i te mau ’āti Lamana ; ’e tē hina’aro nei au ’ia ’ite rātou ē, ’ua ma’iri te mau matahiti e maha hānere ’e piti ’ahuru ti’ahapa i muri iho i te fa’a’itera’ahia mai te tāpa’o nō te taera’a mai o te Mesia.

2 ’E tē tāpiri nei au i teie nei mau pāpa’a parau ’ia oti ana’e tā’u a’ora’a atu i te tahi mau parau ri’i ia ’outou na.

3 Inaha, tē a’o atu nei au ia ’outou ē, ’ia tai’o ’outou i teie nei mau mea, mai te mea ’ua ti’a i te pa’ari o te Atua ’ia tai’o ’outou i te reira, ’ia ha’amana’o ’outou i tō te Fatu aroha i te mau tamari’i a te ta’ata nei, mai te hāmanira’ahia mai o Adamu ē tae roa mai i te tau e fāri’i ai ’outou i teie nei mau mea, ’e ’ia feruri hōhonu i te reira i roto i tō ’outou ’ā’au.

4 ’E ’ia fāri’i ’outou i teie mau mea, tē a’o atu nei au ia ’outou ’ia ani atu ’outou i te Atua, i te Metua mure ’ore, nā roto i te i’oa o te Mesia, e ’ere ānei teie mau mea i te parau mau ; ’e mai te mea e ani atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia, e fa’a’ite mai ïa ’oia i te parau mau nō te reira ia ’outou, nā roto i te mana o te Vārua Maita’i.

5 ’E nā roto i te mana o te Vārua Maita’i e ’ite ai ’outou i te parau mau o te mau mea ato’a ra.

6 ’E ’ua riro te mau mea maita’i ’ei mea parauti’a ’e te parau mau ; nō reira ’aita roa te hō’ē mea maita’i e huna i te Mesia, e fa’a’ite pāpū rā te reira ē, tē vai mau ra ’oia.

7 ’E e ’ite ’outou ē, tē vai mau ra ’oia, nā roto i te mana o te Vārua Maita’i ; nō reira tē a’o atu nei au ia ’outou ē, ’eiaha roa ’outou e huna i te mana o te Atua ; tē rave ra ho’i ’oia i te ’ohipa ma te mana, mai te au i te fa’aro’o o te mau tamari’i a te ta’ata nei, hō’ē ā huru i teie nei mahana, e ananahi, ē a muri noa atu.

8 ’E tē a’o fa’ahou atu nei au ia ’outou, e tō’u mau taea’e, ’eiaha roa ’outou e huna i te mau hōro’a a te Atua, e rave rahi ho’i te reira ; ’e nō ’ō mai ho’i te reira i taua iho Atua ra. ’E tē vai nei e rave rahi mau rāve’a ta’a ’ē nō te hōro’ara’a mai i teie mau hōro’a ; ’āre’a rā nā taua iho Atua ra ’o tē ’ohipa nei i te mau mea ato’a i roto i te mau mea ato’a ; ’e ’ua hōro’ahia te reira nā roto i te mau fa’a’itera’a a te Vārua o te Atua i te ta’ata nei, ’ia faufa’ahia rātou.

9 Inaha ho’i, ’ua hōro’ahia mai e te Vārua o te Atua tā te tahi, ’ia ha’api’i ’oia i te parau pa’ari.

10 ’E tā te tahi atu, ’ia ha’api’i atu ’oia i te parau nō te ’ite nā roto i taua iho Vārua ra.

11 ’E tā te tahi atu, ’o te fa’aro’o rahi roa ïa ; ’e tā te tahi atu, ’o te mau hōro’a ïa nō te fa’aorara’a i te feiā ma’i, nā roto i taua iho Vārua ra.

12 ’E tā te tahi fa’ahou ra, ’ia rave ’oia i te mau semeio rahi.

13 ’E tā te tahi fa’ahou ra, ’ia tohu ’oia nō ni’a i te mau mea ato’a ra.

14 ’E tā te tahi fa’ahou ra, te ’itera’a ïa i te mau melahi ’e i te mau vārua tāvini.

15 ’E tā te tahi fa’ahou ra, ’o te paraura’a ïa i te mau huru reo ’e’ē ato’a.

16 ’E tā te tahi fa’ahou ra, ’o te auvahara’a ïa i te mau reo ’e’ē ’e te mau parau ’e’ē.

17 ’E ’ua tae mai teie mau hōro’a ato’a nā roto i te Vārua o te Mesia ; ’e ’ua tae mai te reira i te ta’ata tāta’itahi, mai te au i tōna ra hina’aro.

18 ’E tē a’o atu nei au ia ’outou, e tō’u mau taea’e here, ’ia ha’amana’o ’outou ē nō ’ō mai te mau hōro’a maita’i tāta’itahi i te Mesia ra.

19 ’E tē a’o atu nei ho’i au ia ’outou, e tō’u mau taea’e here, ’ia ha’amana’o ’outou ē, hō’ē ā tōna huru i nanahi ra, i teie nei mahana, ē a muri noa atu, ’e teie mau hōro’a ato’a ’o tā’u i parau iho nei, nō te pae vārua ïa, ’e e ’ore roa ïa e fa’a’orehia, ’a vai noa ai te fenua nei, maori rā nō te ti’aturi ’ore o te mau tamari’i a te ta’ata nei.

20 Nō reira, ’ia vai te fa’aro’o e ti’a ai ; ’e ’ia vai te fa’aro’o e ti’a ai, ’ia vai ato’a ïa te ti’aturira’a e ti’a ai ; ’e ’ia vai te ti’aturira’a e ti’a ai, ’ia vai ato’a ïa te aroha mau e ti’a ai.

21 E mai te mea ’aita te aroha mau i roto ia ’outou, ’aita roa ïa ’outou e fa’aorahia i roto i te bāsileia o te Atua ; ’e ’aita ato’a ’outou e fa’aorahia i roto i te bāsileia o te Atua mai te mea ’aita tō ’outou e fa’aro’o ; ’e ’aita ato’a ’outou e fa’aorahia mai te mea ’aita tō ’outou e ti’aturira’a.

22 ’E mai te mea ’aita tō ’outou e ti’aturira’a, e vai noa ïa ’outou i roto i te ahoaho ; ’e nō roto mai ho’i te ahoaho i te mau ’ohipa ’ī’ino.

23 ’E ’ua parau mai iho ā te Mesia i tō tātou mau metua ē : E fa’aro’o tō ’outou ra, e ti’a ïa ia ’outou ’ia rave i te mau mea ato’a e au iā’u ra.

24 ’E i teienei, tē parau atu nei au i tō te mau hope’a ato’a o te fenua nei—’oia ho’i, mai te mea e tae mai te mahana e fa’a’orehia ai te mana ’e te mau hōro’a a te Atua i rotopū ia ’outou na, ’ua nā-reira-hia ïa nō tō ’outou ti’aturi ’ore.

25 ’E e ’ati ho’i tō te mau tamari’i a te ta’ata nei mai te mea ’o te reira te huru ; inaha ho’i ’aita roa ïa te hō’ē i rotopū ia ’outou e rave ra i te maita’i, ’aita roa, ’aita hō’ē a’e. Mai te mea ho’i ē tē vai ra te hō’ē i rotopū ia ’outou ’o tē rave i te maita’i, e rave ïa ’oia i te reira nā roto i te mana ’e te mau hōro’a a te Atua.

26 ’E e ’ati ho’i tō rātou ’o tē fa’a’ore i teie mau mea ’a pohe ai, nō te mea e pohe rātou i roto i tā rātou mau hara, ’e ’aita roa rātou e ti’a ’ia fa’aorahia i roto i te bāsileia o te Atua ; ’e tē parau nei ho’i au i te reira mai te au i te mau parau a te Mesia ra ; ’e ’aita roa ho’i au e ha’avare nei.

27 ’E tē a’o atu nei au ia ’outou ’ia ha’amana’o i teie nei mau mea ; ’e ’ua fātata roa ho’i te tau e ’ite ai ’outou ē ’aita roa vau e ha’avare nei, ’e e ’ite ho’i ’outou iā’u i te ha’avāra’a a te Atua ra ; ’e e parau atu ho’i te Fatu te Atua ia ’outou ē : ’Aita ānei au i fa’a’ite atu i tā’u mau parau ia ’outou na, ’o tei pāpa’ihia e teie nei ta’ata, mai te hō’ē ta’ata ’o tē pi’i mai ra mai te pohe mai, ’oia ïa, mai te hō’ē ta’ata ’o tē parau mai ra mai raro mai i te repo ?

28 Tē fa’a’ite atu nei au i teie mau mea ia ’outou ’ia tupu te mau parau i tohuhia ra. ’E inaha, e riro te reira i te fa’a’itehia mai nā roto i te vaha o te Atua mure ’ore ; ’e e hiohio noa tāna parau i terā u’i ’e i terā u’i.

29 ’E e riro te Atua i te fa’a’ite mai ia ’outou ē, e parau mau tā’u i pāpa’i ra.

30 ’E tē a’o fa’ahou atu nei au ia ’outou ’ia haere mai ’outou i te Mesia, ’e ’ia tāpe’a i te mau hōro’a maitata’i ato’a, ’e ’eiaha roa e tāpe’a noa atu i te hōro’a ’ino, ’eiaha ato’a i te mea vi’ivi’i ra.

31 ’E ’a ara, ’e ’a ti’a mai i ni’a mai te repo mai ra, e Ierusalema ē ; ’oia ïa, ’e ’a ’ahu na i tō mau ’ahu nehenehe, ’e te tamāhine o Ziona ; ’e ’a ha’apa’ari i tā ’oe mau titi ’e ’a fa’arahi i tō ’oe mau ’ōti’a ē a muri noa atu, ’ia ’ore ’outou ’ia ’āno’i-haere-fa’ahou-hia, ’e ’ia tupu te mau fafaura’a tā te Metua mure ’ore i fafau atu ia ’outou, e te ’utuāfare o ’Īserā’ela ē.

32 ’Oia ïa, ’a haere mai i te Mesia, ’e ’ia maita’i roa ’outou iāna, ’e ’a ha’apae ’outou i te mau mea paieti ’ore ra ; ’e mai te mea e ha’apae ’outou i te mau mea paieti ’ore ra, ’e ’a here atu ai i te Atua ma tō ’outou mana ato’a, tō ’outou mana’o ato’a ’e te pūai ato’a, ’ei reira e nava’i ai tōna ra maita’i nō ’outou, ’e nā roto i tōna maita’i e riro ai ’outou ’ei mea maita’i roa i te Mesia ra ; ’e mai te mea ho’i e nā roto i te maita’i o te Atua e maita’i roa ai ’outou i te Mesia, e’ita roa ïa e ti’a ia ’outou ’ia huna i te mana o te Atua.

33 ’E fa’ahou ā, mai te mea ē nā roto i te maita’i o te Atua ra e riro ai ’outou ’ei mea maita’i roa i te Mesia ra, e ’aore atu ra ’outou e huna i tōna ra mana, ’ei reira ’ua ha’amo’ahia ïa ’outou i te Mesia nā roto i te maita’i o te Atua, nā roto ho’i i te ha’amani’ira’a toto o te Mesia ra, ’oia ho’i te fafaura’a a te Metua nō te ha’amatarara’a i tā ’outou mau hara, ’ia riro ’outou ’ei feiā mo’a, ma te pōra’o ’ore.

34 ’E i teienei, tē parau atu nei au ia ’outou pā’āto’a, ’a pārahi. ’Ua fātata vau i te haere atu e fa’aea i roto i te pāradaiso o te Atua, ē tae noa atu ’ua ’āmui-fa’ahou-hia tō’u vārua ’e tō’u ho’i tino, ’e ’ua ’āfa’ihia vau ma te upo’oti’a nā roto i te reva, ’ia fārerei atu ia ’outou i mua i te ha’avāra’a au maita’i a Iehova rahi, te Ha’avā mure ’ore nō te feiā ora ’e te feiā pohe. ’Āmene.