1 E tā’u tamaiti here, tē pāpa’i fa’ahou atu nei au ia ’oe na, ’ia ’ite ’oe ē, tē ora noa nei ā vau ; tē pāpa’i atu nei rā vau i te mea huru ’oto.

2 Inaha ho’i, i ’aro iho nei au i te hō’ē ’arora’a rahi ’e te mau ’āti Lamana, ’e ’aita ho’i mātou i upo’oti’a i ni’a ia rātou ; ’e ’ua ma’iri ho’i ’o Arakeanetusa i te ’o’e, ē tae noa atu ho’i ia Lurama ’e Emerona ; ’oia ïa, ’ua pau ato’a tō mātou e rave rahi mau ta’ata maita’i roa.

3 ’E i teienei, inaha, e tā’u tamaiti, tē mata’u nei au ’o te ha’amou te mau ’āti Lamana i teie nei feiā ; ’e ’aita ho’i rātou e tātarahapa, ’e tē fa’ati’arepu noa nei ho’i Sātane ia rātou ’ia riri i te tahi ’e i te tahi.

4 Inaha, tē ha’a tāmau noa nei au i pīha’i iho ia rātou ; ’e ’ia parau atu vau i te parau a te Atua ia rātou ma te ’ū’ana, ’ua rurutaina ïa rātou ’e ’ua riri mai ho’i iā’u nei ; ’e ’ia ’ore au ’ia parau ma te ’ū’ana, ’ua fa’a’eta’eta ïa rātou i tō rātou ’ā’au i mua i te reira ; nō reira, tē mata’u nei au ’o te fa’aea te Vārua o te Fatu i te tūtava ’e ’o rātou.

5 Nō tō rātou ho’i riri rahi roa, e au atu ra iā’u ē, ’aita tō rātou e mata’u nō te pohe ; ’e ’ua ’ore ato’a tō rātou aroha te tahi i te tahi ; ’e te hia’ai noa ra rātou i te toto ’e te tāho’o.

6 ’E i teienei, e tā’u tamaiti here, noa atu ā tō rātou ’eta’eta, ’a rave itoito tāua i te ’ohipa ; inaha ’ia fa’aea tāua i te rave i te ’ohipa, e fa’ahapahia ïa tāua ; tē vai nei ho’i tā tāua ’ohipa nō te rave ’a pārahi ai tāua i roto i te ti’ahapa ’araea nei, ’ia vī te ’enemi nō te mau parauti’a ato’a ia tāua, ’e ’ia roa’a te fa’aeara’a nō tō tāua vārua i te bāsileia o te Atua ra.

7 ’E i teienei, tē pāpa’i nei au i te hō’ē parau ri’i nō ni’a i te mau pohe o teie nei mau ta’ata. Mai te au ho’i i te ’ite i roa’a mai iā’u nō ’ō mai ia Amorona ra, inaha, e rave rahi tā te mau ’āti Lamana feiā mau ’āuri, ’o tā rātou i haru mai i te pare nō Seriza ra ; ’e tē vai ra te mau tāne, ’e te mau vahine, ’e te mau tamari’i.

8 ’E te mau tāne a teie mau vahine, ’e te mau metua tāne o teie mau tamari’i, ’ua taparahihia ïa e rātou ; ’e ’ua fa’a’amu rātou i te mau vahine i te ’i’o o tā rātou mau tāne, ’e te mau tamari’i i te ’i’o o tō rātou mau metua tāne ; ’e ’aita rea e pape tā rātou i hōro’a atu ia rātou.

9 ’E noa atu ā teie mau ’ohipa ’ino rahi a te mau ’āti Lamana, ’aita ïa te reira i hau atu i tā tō tātou mau ta’ata i Morianetuma ra. Inaha ho’i, e rave rahi tamāhine a te mau ’āti Lamana tā rātou i rave atu ’ei feiā mau ’āuri ; ’e i muri iho i tō rātou fa’a’erera’a i te mea faufa’a rahi roa atu i roto i te mau mea ato’a, ’oia ho’i, te vi’ivi’i ’ore ’e te orara’a mā—

10 ’E i muri iho i tō rātou ravera’a i teie mau mea, ’ua taparahi rātou i teie mau tamāhine ma te ’ino rahi, ma te ha’amāmae i tō rātou mau tino ē tae noa atu ’ua pohe roa ; ’e i muri iho i tō rātou ravera’a i te reira, ’ua ’amu rātou i tō rātou ’i’o mai te au i te mau ’ānimara ’ōviri, nō te ’eta’eta o tō rātou ’ā’au ; ’e ’ua rave rātou i te reira ’ei fa’a’itera’a i tō rātou mata’u ’ore.

11 E tā’u tamaiti here ē, e nāhea ho’i te feiā mai teie te huru, ’o tē vai ’ētene noa—

12 (’E e mea iti roa ho’i te matahiti i ma’iri a’enei, ’ua riro rātou ’ei feiā māramarama ’e te au maita’i)

13 ’Āre’a rā, e tā’u tamaiti ē, e nāhea ho’i te feiā mai teie te huru, tei roto tō rātou ’oa’oa i te mau ’ohipa vi’ivi’i rahi—

14 Nāhea ho’i e ti’a ai ia tātou ’ia mana’o ē, e tāpe’a te Atua i tōna rima ha’avā ia tātou ?

15 Inaha, tē pi’i noa nei tō’u ’ā’au ē : E ’ati tō teie nei feiā. ’A haere mai ma te fa’atae mai i te ha’avāra’a, e te Atua, ’e ’a huna i tā rātou mau hara, ’e te mau ’ohipa ’ī’ino, ’e te mau ’ohipa vi’ivi’i i mua i tō ’oe nā aro !

16 ’E teie fa’ahou ā, e tā’u tamaiti, tē vai nei e rave rahi vahine ’ivi ’e tā rātou mau tamāhine ’o tē fa’aea nei i Seriza ; e taua tufa’a mā’a ra ’aore i ’āfa’ihia atu e te mau ’āti Lamana ra, inaha, ’ua ’āfa’ihia atu ïa e te nu’u fa’ehau o Zenephi ra ; ’e ’ua vaiihohia rātou ’ia ’ōvere haere nō te ’imi i te mā’a ; ’e ’ua matapōirihia te mau vahine rū’au e rave rahi nā te pae ’ē’a ’e ’ua pohe roa.

17 ’E te nu’u fa’ehau iā’u nei ra e mea paruparu ïa ; ’e te mau nu’u fa’ehau o te mau ’āti Lamana ra tei rōpū ïa ia Seriza ’e iā’u nei ; ’e te mau ta’ata e rave rahi tei horo atu i roto i te nu’u fa’ehau a Aarona ra, ’ua pohe ïa rātou i te hāmani-’ino-ra’a ’ōviri a te mau ’āti Lamana.

18 ’Auē ho’i te ’ino rahi o tō’u nei mau ta’ata ē ! ’Aita tō rātou e fa’anahora’a ’e ’aita ato’a e aroha. Inaha, e ta’ata noa vau, ’e e pūai ta’ata noa ho’i tō’u nei, ’e ’aita roa ho’i e ti’a iā’u ’ia tu’u atu i tā’u mau fa’auera’a.

19 ’E ’ua pūai roa rātou i roto i tā rātou ’ohipa pi’o ; ’e ’ua riro rātou ’ei feiā ’ōviri, ’e ’aita rātou e fa’aherehere i te ta’ata, ’aita i te feiā rū’au, ’aita ato’a i te feiā ’āpī ; ’e ’ua ’oa’oa rātou ’ia rave i te mau mea ato’a, maori rā i te mea maita’i ; ’e te ’ati i fāri’ihia e tā mātou mau vahine ’e tā mātou mau tamari’i i ni’a i te tā’āto’ara’a nō teie nei fenua, ’ua hau roa ïa i te mau mea ato’a ra ; ’oia ïa, ’aita roa e ti’a i te vaha ’ia fa’a’ite, ’aita ato’a e ti’a ’ia pāpa’ihia.

20 ’E i teienei, e tā’u tamaiti, ’aita vau i hina’aro ’ia fa’ahiti fa’ahou i teie huru ’ohipa ’ino rahi. Inaha, ’ua ’ite ’oe i te ’ohipa ’ī’ino a teie nei feiā ; ’ua ’ite ho’i ’oe ē, ’aore a rātou e parauti’a, ’aita ato’a e mana’o aroha ; ’e ’ua hau atu tā rātou ’ohipa ’ī’ino i tā te mau ’āti Lamana ra.

21 Inaha, e tā’u tamaiti, e’ita e ti’a iā’u ’ia parau fa’ahiahia ia rātou i mua i te Atua, ’o te tā’iri mai ’oia iā’u nei.

22 Inaha rā, e tā’u tamaiti, tē parau fa’ahiahia nei au ia ’oe i mua i te Atua, ’e tē ti’aturi nei au i te Mesia ē, e fa’aorahia ’oe ; ’e tē pure nei au i te Atua ’ia fa’aherehere ’oia ia ’oe, ’ia ’ite ’oe i te fāriura’a mai o tōna ra mau ta’ata iāna ra, ’e ’aore rā i te tā’āto’ara’a nō tō rātou ha’amoura’a ; inaha ’ua ’ite ho’i au ē, e pohe rātou ’ia ’ore rātou ’ia tātarahapa ’e ’ia fāriu mai iāna.

23 ’E ’ia pohe rātou ra, e riro ïa mai tō te mau ’āti Iareda ra te huru, nō te hina’aro ’eta’eta o tō rātou ’ā’au, ’e te tītaura’a ’ia ha’amani’i i te toto ’e ’ia tāho’o.

24 ’E mai te mea e pohe rātou ra, tē ’ite nei tāua ē, e rave rahi tō tāua mau taea’e i tāiva ’ē atu nō te ’āmui atu i te mau ’āti Lamana, ’e e rave rahi fa’ahou ā te tāiva ’ē atu nō te ’āmui atu ia rātou ra ; nō reira, ’a pāpa’i ’oe i te tahi mau parau ri’i, mai te mea e ora noa ’oe ’e e pohe au ma te ’ite ’ore atu ia ’oe ; ’āre’a rā tē ti’aturi nei au ē, e ’ite vave au ia ’oe na ; ’e tei iā’u nei te tahi mau pāpa’a parau mo’a ’o tā’u e hina’aro ’ia hōro’a atu ia ’oe na.

25 E tā’u tamaiti, ’a ha’apa’o maita’i i tā te Mesia ra ; ’e ’eiaha e vaiiho i te mau mea tā’u i pāpa’i atu ’ia fa’atupu i tō ’oe ’oto, nō te ’ume ia ’oe i raro i te pohe ; ’ia fa’ateitei rā te Mesia ia ’oe i ni’a, ’e ’ia vai noa te mana’ona’ora’a i tōna mau mamae, ’e tōna pohera’a, ’e tāna fa’a’itera’a mai i tōna tino i tō tātou mau metua, ’e tōna aroha ’e te fa’a’oroma’ira’a roa, ’e te ti’aturira’a i tōna hanahana ’e te ora mure ’ore, i roto i tō ’oe ferurira’a ē a muri noa atu.

26 ’Ei ia ’oe ho’i te maita’i o te Atua te Metua, ’e tei roto ho’i tōna ra terōno i te mau ra’i teitei, ’ei ia ’oe ato’a ho’i te maita’i o tō tātou Fatu ra ’o Iesu Mesia, ’o tē pārahi nei i te rima ’atau o tōna ra mana, ē tae noa atu ’ua auraro te mau mea ato’a iāna, ’ei ia ’oe te reira i te vaira’a ē a muri noa atu. ’Āmene.