Pene 6
E bāpetizohia ’e e aupuruhia mai te mau ta’ata i tātarahapa—E fa’a’orehia te hara a te mau melo o te ’Ēkālesia ’o tei tātarahapa—E fa’aterehia te mau purera’a nā roto i te mana o te Vārua Maita’i. Fātata 401–421 M.M.
1 ’E i teienei, e parau atu vau nō ni’a i te bāpetizora’a. Inaha, ’ua bāpetizohia te mau peresibutero, te mau tahu’a, ’e te mau ha’api’i ; ’e ’aore roa rātou i bāpetizohia maori rā ’ua fa’a’ite mai rātou i te hotu au e ti’amā ai rātou nō te fāri’i i te reira.
2 ’Aita ato’a ho’i rātou i fāri’i i te ta’ata ’ia bāpetizohia, maori rā ’ua haere mai rātou ma te ’ā’au ’oto ’e te vārua tātarahapa, ma te fa’a’ite pāpū mai i te ’ēkālesia ē, ’ua tātarahapa mau rātou i tā rātou mau hara ato’a.
3 ’E ’aita ato’a te ta’ata i fāri’ihia ’ia bāpetizohia, maori rā ’ua rave rātou i te i’oa o te Mesia i ni’a iho ia rātou, ma te ’ōpuara’a pāpū ē, e tāvini rātou iāna ē tae noa atu i te hope’a.
4 ’E i muri iho i tō rātou bāpetizora’ahia, ’e te fa’aitoitora’ahia ’e te tāmāra’ahia nā roto i te mana o te Vārua Maita’i, ’ua tai’ohia rātou i rotopū i te mau ta’ata o te ’ēkālesia a te Mesia ; ’e ’ua pāpa’ihia tō rātou mau i’oa, ’ia ha’amana’ohia ’e ’ia fa’a’amuhia rātou i te parau maita’i a te Atua, nō te tāpe’a ia rātou i ni’a i te ’ē’a ti’a, ’e nō te fa’aitoito ia rātou ’ia pure tāmau noa, ma te ti’aturi noa i te mau maita’i rahi o te Mesia, ’oia ho’i te tumu ’e te fa’aotira’a nō tō rātou fa’aro’o.
5 ’E ’ua ha’aputuputu pinepine tō te ’ēkālesia nō te ha’apae i te mā’a ’e nō te pure, ’e nō te paraparau i te tahi ’e i te tahi nō ni’a i te maita’i o tō rātou ra mau vārua.
6 ’E ’ua ha’aputuputu pinepine rātou nō te rave i te pāne ’e te uaina, ’ei ha’amana’ora’a i te Fatu ra ia Iesu.
7 ’E ’ua ha’apa’o māite rātou ’ia ’ore te mau ’ohipa ’ī’ino ’ia vai i rotopū ia rātou ; ’e ’o ’oia ’o tei ’itehia i te ravera’a i te ’ohipa ’ī’ino ’e tei fa’ahapahia mai ho’i e nā ’ite to’otoru nō te ’ēkālesia i mua i te aro o te mau peresibutero ra ; ’e ’ia ’ore rātou ’ia tātarahapa ’e ’ia fā’i ho’i i te hara, ’ua paraihia ïa tō rātou mau i’oa, ’e ’aita atu ra rātou i tai’ohia mai i rotopū i te mau ta’ata o te Mesia ra.
8 ’Āre’a rā mai te mea ē ’ua tātarahapa pinepine rātou ’e ’ua tītau i te fa’a’orera’a hara, ma te hina’aro mau, ’ua fa’a’orehia ïa te hara.
9 ’E ’ua fa’aterehia tā rātou mau purera’a e te ’ēkālesia mai te au i te mau fa’aurura’a a te Vārua, ’e nā roto ho’i i te mana o te Vārua Maita’i ra ; inaha ’ia arata’ihia ho’i rātou e te mana o te Vārua Maita’i ra ’ia a’o, ’e ’ia fa’aitoito, ’e ’ia pure, ’e ’ia ani, ’e ’ia hīmene, ’ua nā-reira-hia ïa.