1 Im kiiō ij kōnono kōn peptaij. Lo, elder ro, pris ro, im rikaki ro, kar peptaij; im rekar jab peptaij eļan̄n̄e raar jab kwaļo̧k leen ekkar bwe ren kar tōllo̧ke.

2 Rekar barāinwōt jab bōk jabdewōt n̄an peptaij ijello̧kun wōt n̄e rekar wōnm̧aanļo̧k kōn bōro eo erup im jetōb ettā, im kar kam̧ool n̄an kabun̄ eo bwe raar lukkuun m̧ool ilo ukeļo̧k jān aolep jero̧wiwi ko aer.

3 Im ejjeļo̧k kar bōk n̄an peptaij ijello̧kun n̄e rekar bōk ioer etan Kraist, im kar wōr juon kōttōpar n̄an jerbal n̄an e n̄an jem̧ļo̧kin.

4 Im ālikin kar bōk er n̄an peptaij, im kar jerbale ioer im karreoik er jān kajoor eo an Jetōb Kwōjarjar, rekar bōnbōn ilubwiljin armej ro an kabun̄ eo an Kraist; im etaer kar būki, bwe ren maron̄ keememej im naajdik er jān em̧m̧an eo an naan in Anij, n̄an kōjparok er ilo wāween ejim̧we, n̄an kōjparok er iien otemjej n̄an ekkōl im jar, atartar make ioon em̧m̧an ko an Kraist, eo ej rijeje im rikadedeļo̧k an tōmak eo aer.

5 Im kabun̄ eo eaar kwelo̧k emmakijkij, n̄an jitlo̧k im n̄an jar, im n̄an kōnono ippān doon kōn em̧m̧anļo̧k eo an jetōb ko aer.

6 Im raar kwelo̧k makijkij n̄an bōk pilawā im wain eo, ilo ememej Irooj Jisōs.

7 Im rekar kanooj jejjet n̄an lale bwe en ejjeļo̧k jero̧wiwi ilubwiljier; im jabdewōt eo kar lo n̄an kōm̧m̧an bōd, im jilu rikam̧ool an kabun̄ eo eaar liaakeļo̧k er im̧aan elder ro, im eļan̄n̄e rejjab ukeļo̧k, im jab kwaļo̧k burueer, etaer kar jeorļo̧k, im rekar jab bōnbōn ilubwiljin armej ro an Kraist.

8 A jon̄an emmakijkij in aer ukeļo̧k im kappukot jeorļo̧k bōd, kōn jibadbad em̧ool, kar jeorļo̧k aer bōd.

9 Im kwelo̧k ko aer kar kōm̧m̧an jān kabun̄ eo ālikin wāween jerbal ko an jetōb, im jān kajoor eo an Jetōb Kwōjarjar; bwe āinwōt kajoor eo an Jetōb Kwōjarjar eaar tōl er eļan̄n̄e n̄an kwaļo̧k naan, ak n̄an kōketak, ak n̄an jar, ak n̄an owar ilo jar, ak n̄an al, em̧ool āindein eaar kōm̧m̧an.