१ अनि अब म बप्तिस्माका बारेमा बोल्दछु। हेर, एल्डरहरू, पादरीहरू र शिक्षकहरूलाई बप्तिस्मा दिइएको थियो; र उनीहरूलाई बप्तिस्मा दिएको थिएन यदि उनीहरूले आफ्ना निम्ति योग्य फल नल्याएको भए।

२ उनीहरूले न त कसैलाई बप्तिस्मामा ग्रहण गरे यदि तिनीहरू चूर्ण हृदय र पछुताएको आत्माका साथ अघि नआएको भए र आफ्ना सबै पापहरूको साँचै नै पश्चात्ताप गरेँ भनी चर्चसामु गवाही नदिएको भए।

३ अनि उनीहरूले कसैलाई बप्तिस्मामा प्राप्त गरेनन् यदि तिनीहरूले उहाँको सेवा अन्त्यसम्म गर्ने निश्चितताका साथ ख्रीष्टको नाउँ आफूमाथि नलिएको भए।

४ अनि उनीहरूलाई बप्तिस्मामा ग्रहण गरेपछि र पवित्र आत्माको शक्तिद्वारा ल्याइएपछि र सफा गरेपछि, उनीहरूलाई ख्रीष्टको चर्चका जनमाझ गणना गरियो; र उनीहरूका नाउँहरू लिइयो, ताकि उनीहरूलाई सम्झियोस् र उनीहरूलाई सही बाटोमा राख्न, उनीहरूलाई निरन्तर प्रार्थनामा निगरानीपूर्वक राख्न, उनीहरूको आस्थाका लेखक र अन्त्यकर्ता ख्रीष्टका योग्यताहरूमा मात्र भरोसा गर्दै, परमेश्वरका असल वचनद्वारा पालनपोषण गरियोस्।

५ अनि उपवास बस्न र प्रार्थना गर्न र उनीहरूका आत्माहरूका कल्याणका बारेमा एक अर्कासँग बोल्न चर्च बारम्बार एकसाथ भेला भयो।

६ अनि उनीहरू परमप्रभु येशूका सम्झनामा रोटी र दाखमद्ध लिन सधैँ एकसाथ भेला भए।

७ अनि उनीहरू पालना गर्न अडिग थिए ताकि उनीहरूमाझ कुनै दुष्टता थिएन; र जसले दुष्टता गरेको फेला पारियो र एल्डरहरूका अगाडि चर्चका तीन साक्षीहरूले उनीहरूलाई दोषी ठहराए र यदि उनीहरूले पश्चात्ताप गरेनन् र स्वीकारेनन् भने, उनीहरूका नाउँहरू मेटिन्थे र उनीहरूलाई ख्रीष्टका जनमाझ गणना गरिन्न्थ्यो।

८ तर जहाँसम्म उनीहरूले, सच्चा अभिप्रायका साथ, पश्चात्ताप गरे र क्षमा खोजे, उनीहरूलाई क्षमा गरियो।

९ अनि उनीहरूका भेलाहरू चर्चद्वारा आत्माका कार्यहरूअनुसार र पवित्र आत्माका शक्तिद्वारा सञ्चालन गरियो; किनकि प्रवचन दिन होस्, या प्रोत्साहन गर्न होस्, अथवा बिन्ती गर्न होस्, अथवा गाउन नै होस् जसरी पवित्र आत्माको शक्तिले उनीहरूलाई अगुवाइ गऱ्यो, त्यसरी नै यसो गरिएको थियो।