1 ’E i teienei, e pāpa’i au, ’o Moroni, i te tahi mau parau ri’i a tō’u metua tāne ra ’o Moromona, ’o tāna i parau nō ni’a i te fa’aro’o, te ti’aturi, ’e te here ; i parau mai na ho’i ’oia mai teie te huru i te mau ta’ata, ’a ha’api’i mai ai ’oia ia rātou i roto i te sunago, ’o tā rātou i patu ’ei vāhi ha’amorira’a.

2 ’E i teienei, tē parau atu nei au ’o Moromona ia ’outou, e tō’u mau taea’e here ; ’e maoti te maita’i o te Atua te Metua, ’e tō tātou Fatu ra ’o Iesu Mesia, ’e tōna ra hina’aro mo’a, nō te hōro’a o tāna pi’ira’a i fa’atae mai iā’u nei, i fa’ati’ahia ai au ’ia a’o atu ia ’outou i teie nei taime.

3 Nō reira, e a’o atu vau ia ’outou tō roto i te ’ēkālesia, ’outou te mau ta’ata i pe’e atu i te Mesia ma te hau, ’e tei roa’a ia ’outou te ti’aturira’a tano nō te tomo atu i roto i te fa’aeara’a o te Fatu, mai teie nei atu taime ē tae roa atu ai ’ua fa’aea ’outou i pīha’i iho iāna i te ao ra.

4 ’E i teienei, e tō’u mau taea’e, tē parau nei au i teie mau mea nō ni’a ia ’outou nō te mea e mea hau tō ’outou haerera’a i rotopū i te mau tamari’i a te ta’ata nei.

5 Tē ha’amana’o nei ho’i au i te parau a te Atua ’o tē nā ’ō mai ra ē, e ’ite ’outou ia rātou nā roto i tā rātou mau ’ohipa ; ’e ’ia maita’i tā rātou ra mau ’ohipa, ’ua maita’i ato’a ïa rātou.

6 Inaha ho’i, i nā ’ō na ho’i te Atua ē, e ’ore roa e ti’a i te hō’ē ta’ata ’ino ’ia rave i te mea maita’i ; ’ia hōpoi mai ho’i ’oia i te tao’a hōro’a noa ra, ’e ’ia pure atu ho’i ’oia i te Atua ma te mana’o ’ore ra, e ’ore roa ïa e faufa’ahia i te hō’ē vāhi iti a’e.

7 Inaha ho’i, ’aita ïa te reira i fa’arirohia ’ei mea parauti’a nāna ra.

8 Inaha ho’i, ’ia hōro’a mai te ta’ata ’ino i te hō’ē tao’a hōro’a ra, ’ua nā reira mai ïa ’oia ma te nounou ; nō reira ’ua fa’arirohia atu ra ïa te reira iāna mai te mea ra ē, ’ua tāpe’a noa ’oia i te tao’a hōro’a ; nō reira ’ua fa’arirohia atu ra ïa taua ta’ata ra ’ei mea ’ino i mua i te Atua.

9 ’E ’oia ato’a ïa ’ua fa’arirohia te reira ’ei mea ’ino i te ta’ata mai te mea ’ua pure ’oia ma te hina’aro ’ore i roto i tōna ’ā’au ; ’oia ïa, ’aore ato’a ïa ’oia e faufa’ahia i te reira ; ’e ’aita ho’i te Atua e ’ite i te ta’ata mai te reira te huru.

10 Nō reira, e’ita e ti’a i te ta’ata ’ino ’ia rave i te mea maita’i ; e ’ore ato’a ’oia e hōro’a i te tao’a hōro’a maita’i.

11 Inaha ho’i, e’ita e ti’a i te pape piha’a maramara ’ia hōro’a mai i te pape maita’i ; ’aita ato’a ho’i e ti’a i te pape piha’a maita’i ’ia hōro’a mai i te pape maramara ; nō reira, e’ita e ti’a i te ta’ata tāvini i te diabolo ’ia pe’e mai i te Mesia ; ’e mai te mea e pe’e mai ’oia i te Mesia, ’aita ïa e ti’a iāna ’ia riro ’ei tāvini nō te diabolo.

12 Nō reira, nō ’ō mai i te Atua ra te mau mea maitata’i ato’a ; ’e te mau mea ’ino ra, nō ’ō mai ïa i te diabolo ra ; ’e e ’enemi ho’i te diabolo i te Atua, ’e tē tama’i tāmau noa mai ra ïa ’oia iāna, ’e tē tītau ra ïa ’e tē fa’aitoito ra ïa ’ia rave i te hara, ’e ’ia rave tāmau noa ato’a i te mea ’ino.

13 Inaha rā, te mau mea nō ’ō mai i te Atua ra, tē tītau ra ïa ’e tē fa’aitoito ra ïa ’ia rave tāmau noa i te mea maita’i ; nō reira, te mau mea ato’a ’o tē tītau mai ’e ’o tē fa’aitoito mai ’ia rave i te maita’i, ’e ’ia here i te Atua, ’e ’ia tāvini iāna, e mea fa’auruhia ïa e te Atua.

14 Nō reira, ’a ara māite, e tō’u mau taea’e here, ’ia ’ore ’outou ’ia mana’o ē nō ’ō mai i te Atua ra te mea ’ino, ’e ’ia ’ore ho’i ’outou ’ia mana’o i te mea maita’i ’e te mea nō ’ō mai i te Atua ra mai te mea ra ē nō ’ō mai ïa i te diabolo ra.

15 Inaha ho’i, e tō’u mau taea’e, ’ua hōro’ahia mai ia ’outou te mana ’ia ha’avā, ’ia ti’a ia ’outou ’ia fa’ata’a ’ē i te maita’i ’e te ’ino ; ’e e mea pāpū roa ho’i te rāve’a nō te ha’avā, ’ia ’ite pāpū maita’i ’outou ē, e au ïa i te huru nō te fa’ata’ara’a i te māramarama mahana ’e te pō pōiri ra.

16 Inaha ho’i, ’ua hōro’ahia mai te Vārua o te Mesia i te ta’ata tāta’itahi ’ia ti’a iāna ’ia fa’ata’a ’ē i te maita’i ’e te ’ino ; nō reira, tē fa’a’ite atu nei au ia ’outou i te rāve’a nō te fa’ata’a i te reira ; te mau mea ato’a ’o tē tītau ’ia rave i te maita’i ’e ’o tē fa’aitoito ho’i ’ia ti’aturi i te Mesia, ’ua fa’ataehia mai ïa e te mana ’e te hōro’ara’a a te Mesia ; nō reira e ti’a ia ’outou ’ia ’ite pāpū roa ē, nō ’ō mai ïa i te Atua ra.

17 ’Āre’a rā te mau mea ato’a ’o tē tītau i te ta’ata ’ia rave i te mea ’ino, ’e ’ia ’ore e ti’aturi i te Mesia, ’e ’ia huna iāna, ’e ’ia ’ore e tāvini i te Atua, ’ei reira ïa ’outou e ’ite pāpū roa ai ē, nā te diabolo te reira ; ’ua nā reira ho’i te diabolo i te rave i te ’ohipa, ’aita roa ho’i ’oia i tītau ’ia rave te hō’ē ta’ata i te maita’i, ’aita, ’e ’aita roa atu ; ’aita ato’a tāna ra mau melahi ; ’aita ato’a rātou ’o tei auraro atu iāna.

18 ’E i teienei, e tō’u mau taea’e, nō te mea tē ’ite nei ’outou i te māramarama, ’oia ho’i te māramarama o te Mesia, e ti’a ai ia ’outou ’ia ha’avā atu, ’a ha’apa’o maita’i ïa ’ia ’ore ’outou ’ia ha’avā hape atu ; nō te mea o taua ha’avāra’a ’o tā ’outou e ha’avā atu e ha’avā-ato’a-hia mai ai ’outou i te reira.

19 Nō reira, tē ani atu nei au ia ’outou, e tō’u mau taea’e, ’ia tītau māite ’outou i te māramarama o te Mesia ma te tu’utu’u ’ore, ’ia ti’a ia ’outou ’ia fa’ata’a ’ē i te maita’i ’e te ’ino ; ’e mai te mea e tāpe’a mai ’outou i te mau mea maitata’i ato’a, ma te fa’ahapa ’ore atu i te reira, ’ua riro mau ïa ’outou ’ei tamari’i nā te Mesia ra.

20 ’E i teienei, e tō’u mau taea’e, e nāhea ho’i e ti’a ai ia ’outou ’ia tāpe’a i te mau mea maitata’i ato’a ra ?

21 ’E i teienei e haere mai au i ni’a i taua fa’aro’o ra ’o tā’u i parau ē e paraparau atu vau ; ’e e fa’a’ite atu vau ia ’outou i te rāve’a e ti’a ai ia ’outou ’ia tāpe’a i te mau mea maitata’i ato’a ra.

22 Inaha ho’i, ’ua ’itea i te Atua te mau mea ato’a, ’e i vai na ho’i ’oia mai te tau mure ’ore ē tae atu i te tau mure ’ore, inaha, ’ua tono mai ’oia i tāna ra mau melahi nō te tauturu i te mau tamari’i a te ta’ata nei, nō te fa’a’ite pāpū mai i te taera’a mai o te Mesia ra ; ’e nā roto i te Mesia e tae mai ai te mau mea maitata’i ato’a ra.

23 ’E ’ua fa’a’ite ato’a mai te Atua i te mau peropheta, nā roto i tōna ihora vaha ē, e tae mai te Mesia.

24 ’E inaha, e mau rāve’a rau i fa’a’ite mai ai ’oia i te mau mea maitata’i i te mau tamari’i a te ta’ata nei ; ’e te mau mea maitata’i ato’a ra, nō ’ō mai ïa i te Mesia ra ; ’āhiri ē ’aita ra ’ua hi’a ïa te ta’ata nei, ’e ’aita ïa e ti’a i te hō’ē mea maita’i ’ia tae mai ia rātou ra.

25 Nō reira, nā roto i te utuutura’a a te mau melahi ra, ’e nā roto i te mau parau ato’a nō roto mai i te vaha o te Atua ra, i ha’amata ai te ta’ata nei i te fa’atupu i te fa’aro’o i te Mesia ; ’e nā roto ho’i i te fa’aro’o i ha’apā ai rātou i te mau mea maitata’i ato’a ra ; ’e i nā-reira-hia ïa ē tae noa atu i te taera’a mai o te Mesia ra.

26 ’E i muri a’e i tōna ra taera’a mai, ’ua fa’aora-ato’a-hia te ta’ata nā roto i te fa’aro’o i tōna ra i’oa ; ’e nā roto i te fa’aro’o i riro ai rātou ’ei mau tamaiti nā te Atua. ’E mai te Mesia e ora ra, ’ua parau mai ’oia i teie mau parau i tō tātou ra mau metua, i te nā-’ō-ra’a mai ē : ’E te mau mea ato’a tā ’outou e ani ma te fa’aro’o i te Metua nā roto i tō’u ra i’oa, ’o tei riro ’ei mea maita’i, ma te ti’aturi e roa’a te reira ia ’outou, inaha, e nā-reira-hia ïa ia ’outou na.

27 Nō reira, e tō’u mau taea’e here, ’ua fa’a’orehia ānei te mau semeio nō te mea ’ua reva atu te Mesia i ni’a i te ra’i, ’e ’ua pārahi i raro i te rima ’atau o te Atua, nō te tītau atu i te Metua ra i tōna mau ti’ara’a nō te aroha ’o tē vai ra i roto iāna nō te mau tamari’i a te ta’ata nei ?

28 ’Ua pāhono mai ho’i ’oia i tei tītauhia e te ture ra ; ’e tē tītau nei ’oia ia rātou pā’āto’a tei ti’aturi iāna ra ; ’e ’o rātou ’o tei ti’aturi iāna ra, e mau ïa rātou i te mau mea maitata’i ato’a ra ; nō reira ’ua riro ïa ’oia ’ei ti’a nō te mau tamari’i a te ta’ata nei ; ’e tē pārahi ra ’oia i roto i te mau ra’i ē a muri noa atu.

29 ’E nō te mea i rave na ’oia i te reira, e tō’u mau taea’e here, ’ua fa’a’orehia ānei ïa te mau semeio ? Inaha, tē parau atu nei au ia ’outou na ē, ’Aita roa ; ’aita ato’a ho’i te mau melahi i fa’aea i te utuutu mai i te mau tamari’i a te ta’ata nei.

30 Inaha ho’i, tei raro a’e rātou iāna, nō te utuutu mai te au i te parau nō tāna ra fa’auera’a, ma te fa’a’ite mai ia rātou iho i te feiā fa’aro’o pūai ’e te mana’o ’āueue ’ore i roto i te mau mea ato’a nō te huru paieti ra.

31 ’E te tōro’a o tā rātou tāvinira’a ’o te pi’ira’a ïa i te mau ta’ata ’ia tātarahapa, ’e ’o te fa’atupura’a ’e te ravera’a ho’i i te ’ohipa nō te mau fafaura’a a te Metua, ’o tāna i fafau mai i te mau tamari’i a te ta’ata nei, nō te fa’aineine i te ’ē’a i rotopū i te mau tamari’i a te ta’ata nei, nā roto i te fa’a’itera’a atu i te parau a te Mesia i te mau fāri’i mā’itihia a te Fatu, ’ia ti’a ia rātou ’ia fa’a’ite pāpū nō ni’a iāna.

32 ’E nā roto i te reira, ’ua fa’aineine te Fatu te Atua i te rāve’a e tupu ai te fa’aro’o i te Mesia i roto i te toe’a o te mau ta’ata, ’e e roa’a ai tō te Vārua Maita’i vāhi i roto i tō rātou ’ā’au, mai te au i te mana nō te reira ; ’e nā reira ho’i te Metua i te fa’atupu i te mau fafaura’a o tāna i fafau atu i te mau tamari’i a te ta’ata nei.

33 ’E i parau na ho’i te Mesia ē : Mai te mea e fa’aro’o tō ’outou iā’u nei, e roa’a ïa ia ’outou te mana nō te rave i te mau mea ato’a tei au iā’u nei.

34 ’E i parau na ho’i ’oia ē : ’A tātarahapa ’outou pā’āto’a e tō te mau hope’a o te fenua nei, ’e ’a haere mai iā’u nei, ’e ’ia bāpetizohia i tō’u ra i’oa, ’e ’ia ti’aturi mai iā’u nei, ’ia fa’aorahia ’outou.

35 ’E i teienei, e tō’u mau taea’e here, mai te mea ē ’o teie iho ā te huru, ’oia ho’i e parau mau teie mau mea ’o tā’u i parau atu ia ’outou na, ’e e fa’a’ite atu ho’i te Atua ia ’outou na, ma te mana ’e te hanahana rahi i te mahana hope’a ra ē, e parau mau iho ā te reira, ’e mai te mea e parau mau te reira, ’ua hope ānei ïa te mahana nō te mau semeio ?

36 ’E ’aore rā ’ua fa’aea ānei te mau melahi i te fā mai i te mau tamari’i a te ta’ata nei ? ’E ’aore rā ’ua tāpe’a mai ānei ’oia i te mana o te Vārua Maita’i mai ia rātou ra ? ’E ’aore rā e nā reira ānei ’oia ’a vai noa ai te tau, ’e ’aore rā ’a mau ai te fenua, ’e ’aore rā ’a pārahi noa ai te hō’ē a’e ta’ata i ni’a i te fenua ’ia fa’aorahia ’oia ?

37 Inaha, tē parau atu nei au ia ’outou na ē, ’Aita roa ; nō te fa’aro’o ho’i i tupu ai te mau semeio ; ’e nō te fa’aro’o ho’i i fā mai ai te mau melahi ’e i utuutu mai ai i te ta’ata nei ; nō reira, ’āhiri ’ua hope teie nei mau mea, ’auē ho’i ïa te mau tamari’i a te ta’ata nei, nō te ti’aturi ’ore ho’i ïa te reira, ’e ’ua faufa’a ’ore te mau mea ato’a.

38 ’Aore roa ho’i ta’ata e fa’aorahia, ’ia au i te mau parau a te Mesia, maori rā ’ia ti’aturi rātou i tōna ra i’oa ; nō reira, ’āhiri ē ’ua ’ore teie mau mea, ’ua ’ore ato’a ïa te fa’aro’o ; ’e ’ua riro tō te ta’ata nei huru ’ei mea ahoaho, ’e e au ra ho’i ïa ē, ’aita te ’ohipa nō te fa’aorara’a i ravehia.

39 Inaha rā, e tō’u mau taea’e here, tē parau nei au i teie mau mea maita’i a’e nō ni’a ia ’outou, nō te mea tē ’ite nei au ē, e fa’aro’o tō ’outou i te Mesia nō tō ’outou marū ; ’e ’āhiri ho’i ’aita tō ’outou e fa’aro’o iāna, ’aita ïa ’outou e au ’ia tai’ohia mai i rotopū i te mau ta’ata nō tāna ra ’ēkālesia.

40 ’E teie fa’ahou ā, e tō’u mau taea’e here, e parau atu vau ia ’outou nō ni’a i te ti’aturi. E nāhea ho’i e ti’a ai ia ’outou ’ia fāri’i i te fa’aro’o, maori rā ’ia vai tō ’outou ti’aturira’a ?

41 ’E e aha ïa tā ’outou e ti’aturi atu ? Inaha, tē parau atu nei au ia ’outou, ’ia vai tō ’outou ti’aturira’a i te tāra’ehara a te Mesia ’e i te mana nō tōna ti’afa’ahoura’a, ’ia fa’ati’ahia nō te fāri’i i te ora mure ’ore, ’e te tumu nō te reira nō tō ’outou ïa fa’aro’o iāna mai te au i tei parauhia mai ra.

42 Nō reira, mai te mea e fa’aro’o tō te ta’ata, ’ia vai ato’a ïa tōna ti’aturira’a ; ’ia ’ore te fa’aro’o ’aita ato’a ïa e ti’aturira’a.

43 ’E teie fa’ahou ā, inaha, tē parau atu nei au ia ’outou na ē, ’aita roa e ti’a iāna ’ia fāri’i i te fa’aro’o ’e te ti’aturira’a, maori rā ’ia vai te marū ’e te ’ā’au ha’eha’a i roto iāna.

44 ’Āhiri ē ’aita, ’ua riro ïa tōna fa’aro’o ’e tōna ti’aturira’a ’ei mea faufa’a ’ore, ’e ’aore roa ho’i ïa te ta’ata e ’itehia i mua i te Atua, maori rā te feiā marū ’e te ’ā’au ha’eha’a ; ’e mai te mea tē vai ra te ta’ata marū ’e te ’ā’au ha’eha’a, ’o tē fā’i nā roto i te mana o te Vārua Maita’i ē, ’o Iesu te Mesia, ’ia vai ato’a ïa te aroha mau i roto iāna e ti’a ai ; ’e mai te mea ’aita te aroha mau i roto iāna e mea faufa’a ’ore ïa ’oia ; nō reira e mea ti’a roa ’ia vai te aroha mau i roto iāna.

45 E fa’a’oroma’ira’a roa tō te aroha mau ’e te hāmani maita’i, e ’ore roa e fe’i’i, e ’ore ho’i e fa’arahi, e’ita e ’imi i te maita’i nōna iho, e’ita e riri vave, e’ita e mana’o ’ino, e’ita e ’oa’oa i te mau ’ohipa ’ī’ino, e ’oa’oa rā i te parau mau, e mea fa’ahapa ’ore i te mau mea ato’a, e ti’aturi i te mau mea ato’a, e tīa’i i te mau mea ato’a, e fa’a’oroma’i i te mau mea ato’a.

46 Nō reira, e tō’u mau taea’e here, mai te mea ’aita te aroha mau i roto ia ’outou na, ’ua riro ïa ’outou ’ei mea faufa’a ’ore, nō te mea e ’ore roa te aroha mau e mou. Nō reira, ’a mau māite i te aroha mau, ’o tei hau i te mau mea ato’a ra, e mou ho’i te mau mea ato’a ra—

47 Te aroha mau rā, ’o te here ateate ïa o te Mesia, ’e e vai noa te reira ē a muri noa atu ; ’e ’o ’oia tē vai ra te reira ’ia tae i te mahana hope’a ra, e maita’i ïa tōna.

48 Nō reira, e tō’u mau taea’e here, ’a pure atu i te Metua ma te pūai hope roa o te ’ā’au ’ia ’ī ’outou i teie nei here, ’o tāna i hōro’a mai i te mau ta’ata ato’a ’o tei pe’e mau i tāna Tamaiti ia Iesu Mesia, ’ia riro ’outou ’ei mau tamari’i nā te Atua ; ’e ’ia fā mai ’oia ra, e riro ïa tātou mai iāna ra te huru ; inaha e ’ite ho’i tātou iāna i tōna ra huru mau ; ’ia vai māite ā teie nei ti’aturira’a i roto ia tātou ; ’ia tāmāhia ho’i tātou ato’a mai iāna i mā ra. ’Āmene.