1 Mo dɔba, merekyerɛw wo bio ama eehu dɛ meda ho tse nkwa mu; mbom merekyerɛw biribi a ɔyɛ awerɛhow.

2 Na hwɛ, menye Lamanfo no akõ ɔdzen do, na yenndzi konyim; na Archeantus atɔ wɔ afõwa ano, Luram nye Emron so dɛmara; nyew, na yɛayew hɛn mbarimba ekunyin pii.

3 Na afei hwɛ, me ba, musuro dɛ annhwɛ a Lamanfo no bɛsɛɛ dɛm nkorɔfo yi; osiandɛ wonnu hɔnho, na Satan nunu hɔn aber nyina ma hɔn bo fuw hɔnho.

4 Hwɛ, miridzi dwuma wɔ hɔn mu aber nyina; na sɛ mekã Nyame n’asɛm ndamyɛ mu a hɔn ho popo na hɔn bo fuw me; na sɛ mammfa ndamyɛ annkã so a wopirim hɔn akoma wɔ ho; dɛm ntsi, musuro dɛ bi nkɔhwɛ a Ewuradze no Sunsum egyaa dɛ ɔnye hɔn ridzi aper.

5 Na wonya ebufuw so dodow na dɛm ama mehu dɛ wonnyi owu ho suro biara; na wɔayew hɔn dɔ, na bɔgyakãgu ho nsukɔm na awerdzi ahyɛ hɔn mã aber nyina.

6 Na afei, mo dɔba, mbom hɔn akomadzen nyina ekyir no, ma yɛnyɛ edwuma enyiberdo; na sɛ yegyaa dɛ yɛreyɛ edwuma a, wɔdze hɛn bɛba afɔdzi ase; osiandɛ yɛwɔ edwuma yɛ wɔ ber a yɛwɔ dɛm dɛtsedan yi mu yi, ama yeedzi tseneneeyɛ nyina ne tamfo no do konyim, na hɛn akra ahom wɔ Nyankopɔn n’ahenman no mu.

7 Na afei merekyerɛw biribi a ɔfa dɛm nkorɔfo yi hɔn amandzehu ho. Na ɔfa no nsɛm a menya efi Amoron nkyɛn, hwɛ, Lamanfo no wɔ ndɔmmumfo pii a wɔfaa hɔn fii Sherrizah abantsentsen no mu; na wɔyɛ mbarimba, mbaa na mbofraba.

8 Na dɛm mbaa nye mbofraba no hɔn kunnom nye hɔn egyanom no wokumkum hɔn; na wɔmaa mbaa no dzii hɔn kunnom honam, na mbofraba no so dzii hɔn egyanom honam; nsu nnka ho, na dza wɔdze maa hɔn no mpo yɛ kakraabi.

9 Na sɛ ehwɛ dɛm mbusu kɛse yi a Lamanfo abɔ yi nyina a ɔnnkyɛn dza hɛn nkorɔfo no a wɔwɔ Moriantum yɛɛ no. Na hwɛ, wɔafa Lamanfo mbabaa pii ndɔmmum; na wɔkam hɔn wɔ dza no ho hia na ɔsombo kɛse a ɔbɔ adze nyina do no, dza ɔyɛ ahosie na ɔbrafɛw no—

10 Na wɔyɛɛ dɛm ndzɛmba yi wiei no, afei wokum hɔn yayaaya, wopirapira hɔn araa mpo kesii dɛ wowuwui na wɔyɛ dɛm wiei no, wodzii hɔn honam dɛ mbowa abɔyafo, osian hɔn akomadzen ntsi; na wɔyɛɛ iyi dze kyerɛɛ dɛ wɔwɔ akokodur.

11 O mo dɔba, obesi dɛn bɛyɛ na nkorɔfo a wɔtsetse dɛm yi a hɔn enyi mmbuei yi—

12 (Na mfe kakra bi a abɛsen kɔ no, nna wɔyɛ nkorɔfo a wonyim dze na hɔnho yɛ enyigye)

13 Mbom O me ba, obesi dɛn bɛyɛ na nkorɔfo a wɔtsetse dɛm yi a hɔn enyigye wɔ mbusubɔdze pii ne nyɛɛ mu—

14 Osi dɛn na yesusu dɛ Nyankopɔn remmpem ne nsa adze mmbu atsɛn nntsia hɛn?

15 Hwɛ, m’akoma dzi yaw; nkorɔfo yi ndue, O Nyankopɔn, bra bobu atsɛn, na yi w’enyi fi hɔn bɔn nye hɔn emumuyɛ, nye hɔn ekyiwadze nyɛɛ do.

16 Na afei bio, me ba, ekunafo pii wɔnye hɔn mbabaa aka Sherrizah; na edziban biara a Lamanfo no ammfa annkɔ no, hwɛ, Zenephi no nsordaafo no asoa dze kɔ, na woegya hɔn hɔ dɛ wonkyinkyin nkɔ beebiara a wobotum nkɔhwehwɛ edziban; na mberwa pii hɔn enyiwa do siw hɔn wɔ kwan mu ma wowuwu.

17 Na nsordaafo a wɔnye me wɔ ha no ayeyɛ mberɛw; na Lamanfo hɔn nsordaafo no wɔ emi nye Sherrizah finimfin; na dodowara a woguanee kɔr Aaron no nsordaafo mu no kɔtɔɔ hɔn abaw mu ma wɔkyerɛɛ hɔn etsirmɔdzen no wɔ hɔn do.

18 O mo nkorɔfo hɔn nsekyɛwee! Wonnyi nhyehyɛɛ biara na wonnyi ehumbɔbɔr so. Hwɛ, meyɛ nyimpa ara, na mowɔ nyimpa kor ahoɔdzen ara, na murunntum mmfa me mbra nnhwɛ hɔn do bio.

19 Na wɔayɛ dzen wɔ hɔn akwan bɔn mu; na hɔn nyinara ayɛ yerɛyerɛw, wɔmmfa obiara noho nnkyɛ no, wonnyim panyin nna wonnyim abofra so; hɔn enyi gye adze biara mu, dza wokyir ara nye papayɛ; na hɛn mbaa nye hɛn mbofraba hɔn haw wɔ asaase yi enyi do no bor adze nyinara do, nyew, tɛkyerɛma runntum nnkã, nna worunntum nnkyerɛw so.

20 Na afei, me ba, murunntum nntsena dɛm adze huhu yi mu. Hwɛ, ɔwoara nyim nkorɔfo yi hɔn emumuyɛdze; inyim dɛ wonnyi nyimdzee ho fapemee biara na adze nntse hɔn so; na hɔn emumuyɛdze bor Lamanfo dze do.

21 Hwɛ, me ba, murunntum nnkamfo hɔn mma Nyankopɔn bɛyɛ na oetwa me.

22 Mbom hwɛ, me ba, mekamfo wo ma Nyankopɔn, na mowɔ gyedzi wɔ Christ mu dɛ wɔbɛgye wo nkwa; na mobɔ mpaa ma Nyankopɔn dɛ ɔmfa wo nkwa nkyɛ wo, ama aagye dase wɔ aber a no nkorɔfo bɛsan aba ne nkyɛn, anaadɛ wɔbɛsɛɛ hɔn korakora; na minyim dɛ wɔbɛhera, gyedɛ wonu hɔnho na wɔsan ba ne nkyɛn.

23 Na sɛ wɔhwer hɔn nkwa a, ɔbɛyɛ dɛ dza ɔbaa Jaredfo do no, osian hɔn akoma n’akɔndɔ ntsi, wɔpɛ bɔgyakãgu na awerdzi.

24 Na sɛ ɔba so dɛ wɔahera a, yenyim dɛ hɔn enuanom no mu dodowara atsew etua akɛkã Lamanfo no ho, na hɔn mu dodow so bɛtsew etua akɛkã hɔnho bio; dɛm ntsi, sɛ wɔdze wo nkwa kyɛ wo a kyerɛw biribi kakra, na emi dze, mobɔhwer mo nkwa na murunnhu wo; mbom megyedzi dɛ ɔrennkyɛr na mehu wo; osiandɛ mowɔ nkyerɛwee krɔnkrɔn bi a medze bɛhyɛ wo nsa.

25 Me ba, dzi nokwar wɔ Christ mu; na mma dza makyerɛw yi nnhow wo werɛ, na ɔnnhyɛ wo do amma ammfa annkɔ owu mu; mbom ma Christ mma wo do wɔ sor, na ma n’amandzehu na no wu, nye ne nyimpadua a ɔdaa no edzi kyerɛɛ hɛn egyanom, nye n’ehumbɔbɔr na penkyɛr, nye n’enyimnyam ho enyidado nye nkwa a onnyiewiei, ntsena w’adwen mu afebɔɔ.

26 Na ma adom a ofi Nyankopɔn Egya, ɔno a n’ahengua krɔn wɔ sorsor no, nye hɛn Ewuradze Jesus Christ a ɔtse no tum abanyimfa kɛpem dɛ adze nyina bɛba abɛhyɛ n’ananadze no nkã wo, na ɔnye wo ntsena afebɔɔ. Amen.