1 Ka sa yaco ni keimami sa tekivuna tale na matanitu ka tekivu taukena tale na vanua ena vakacegu. Ka’u sa vakarota me buli na veimataqali yaragi kecega ni valu, me ra na taurivaka na noqu tamata ena gauna era na mai valuti keimami tale kina ko ira na Leimanaiti.

2 Ka’u sa lesi ira na yadra me ra vakavolivolita na vanua, me ra kakua kina ni kaba vakidacala mai ka vakarusai keimami ko ira na Leimanaiti; au sa taqomaki ira kina na noqu tamata kei na noqu qele ni manumanu, ka maroroya me ra kakua ni lutu ki na ligadra na neimami meca.

3 Ka sa yaco ni keimami sa taukena na nodra vanua na neimami qase me vuqa sara na yabaki, io, ena loma ni ruasagavulu ka rua na yabaki.

4 Ka’u sa vakarota me ra teivaka na qele ko ira na tagane, ka tea na veimataqali sore ni itei kei na veimataqali vuanikau kecega.

5 Ka’u sa vakavuna me ra dautalitali ko ira na marama, ka me ra gugumatua, ka daucakacaka, ka talia na veimataqali isulu lineni matailalai, io, kei na veimataqali isulu kecega, me keimami vakaisulu kina; ka keimami sa tubu ka sautu ena vanua—keimami sa tiko vakacegu kina ena vanua ena loma ni ruasagavulu karua na yabaki.

6 Ka sa yaco ni sa mate ko Leimani na tui, ka tekivu me veiliutaki me kena isosomi ko luvena. Ka sa tekivu me vakayavalati ira na nona tamata me ra veisaqasaqa kei ira na noqu tamata; o koya era sa vakavakarau kina ki na ivalu, me ra lako mai ka veivala kei ira na noqu tamata.

7 Ia au a sa talai ira yani na noqu yamata vakavolivolita na vanua ko Semiloni, me’u kila kina na nodra vakavakarau, me’u yadra kina, me ra kakua ni kaba mai ka vakarusai ira na noqu tamata.

8 Ka sa yaco ni ra a lako mai kei na nodra lewevuqa ki na vualiku kei Sailomi, era sa vakaiyaragi ena dakaititi, kei na kena gasau, kei na iseleiwau, kei na isele takelo, kei na vatu, kei na irabo; ka sa toro na uludra me ra ulu cou; ka sa vau na tolodra ena ivau kuli ni manumanu.

9 Ka sa yaco ni’u sa vakarota me ra vunitaki e loma ni lekutu ko ira na yalewa kei na gonelalai ni noqu tamata; ka’u sa vakaroti ira kece talega na tagane qase ka rawa me ra tauri iyaragi kei ira kece na cauravou ka rawa me ra tauri iyaragi, me ra soqoni vata mai me ra veivala kei ira na Leimanaiti; ka’u sa tuvai ira ki na nodra itutu me vaka na nodra dui yabaki.

10 Ka sa yaco ni keimami a lako cake me vala kei ira na Leimanaiti; ia e dina ga ni’u sa qase, koi au, au sa lako talega me’u vala kei ira na Leimanaiti. Ka sa yaco ni keimami a lako cake ki vala ena kaukauwa ni Turaga.

11 Oqo, era sa sega ni kila ko ira na Leimanaiti e dua na ka me baleta na Turaga, se na kaukauwa ni Turaga, o koya era sa nuitaka ga kina na nodra kaukauwa. Ia era sa tamata kaukauwa dina, ena kaukauwa ga vakatamata.

12 Era sa tamata kila, ka vakarerevaki, ka dau taleitaka na vakadave dra, ka ra vakabauta na nodra itovo na nodra qase, ka sa vakaoqo—Era sa vakabauta ni ra a vakasavi tani mai na vanua ko Jerusalemi ena vuku ni nodra caka cala na nodra qase, ka ni ra a vakacalai ena lekutu mai vei ira na wekadra, ka ra a vakacalai talega ena nodra a kosova tiko na wasawasa;

13 E dua tale, ni ra a vakacalai talega ena vanua ka a nodra ivotavota vakawa taumada, ni ra sa kosova oti mai na wasawasa, ia na veika kece oqo ena vuku ni nona a yalodina vakalevu cake ko Nifai ena nona muria tiko na ivakaro ni Turaga—o koya a sa totaki koya kina na Turaga, ni a rogoca na nona masu na Turaga ka sauma, ka a liutaka ko koya na nodra ilakolako ena lekutu.

14 Ka rau sa cudruvi koya na tuakana ni rau sa sega ni kila na ivakarau ni Turaga; erau a cudruvi koya talega e wasawasa ni rau a vakaukauwataka na lomadrau vua na Turaga.

15 Ka rau a cudruvi koya tale ni ra sa yaco yani ki na vanua yalataki, ni rau sa kaya sa kovea mai ligadrau na itutu ni veiliutaki vei ira na tamata; ka rau a segata me rau vakamatei koya.

16 Ka rau a cudruvi koya tale ni sa lako ki na lekutu me vaka e a vakarota vua na Turaga, ka kauta yani na itukutuku ka ceuti tu ena peleti parasa, ka rau kaya ni a butakoca.

17 O koya era sa vakavulici ira kina na luvedra me ra cati ira, ka me ra labati ira, ka me ra butakoci ira ka kovea vakaukauwa mai vei ira, ka kitaka na ka kece e rawa me vakarusai ira; o koya era sa cati ira tawamudu kina na kawa i Nifai.

18 Ena inaki oqo, sa vakaisini au kina ko Leimani na tui, ena nona ilawaki qaseqase, kei na lasu, kei na yalayala e veicavilaki, ka’u sa kauti ira mai kina na noqu tamata ki na vanua oqo, me ra na mai vakarusai ira kina; io, ka keimami sa sotava na ka rarawa ena vanua ena veiyabaki e vuqa oqo.

19 Ia oqo koi au, ko Senifi, ni’u sa tukuna oti na veika kece oqo me baleti ira na Leimanaiti kivei ira na noqu tamata, au sa vakauqeti ira kina me ra la’ki vala ena nodra igu taucoko, ka vakararavi tiko vua na Turaga; o koya, keimami sa valuti ira kina, ka veirai mata.

20 Ka sa yaco ni keimami a vakasavi ira tani tale mai na neimami vanua; ka keimami a yaviti ira ena veivakamatei levu, era sa rui lewe levu sara keimami a sega kina ni wiliki ira.

21 Ka sa yaco ni keimami a lesu tale ki na neimami vanua, ka ra sa tekivu qarava tale na nodra qele ni manumanu ko ira na noqu tamata, ka teivaka na nodra qele.

22 Ia oqo, ni’u sa qase sara, au sa solia kina na matanitu ki vua e dua na luvequ; o koya, au sega kina ni vosa tale. Ka me vakalougatataki ira na noqu tamata na Turaga. Emeni.