1 Ac inge ke tohkohsrah el lohng kahs inge, el fahk nuh sin mwet tol lal: Uslah mukul se inge, ac unilyac; tuh meac kuht ac oruh nuh sel, tuh el kasrkuhsrak.

2 Ac elos tuyang ac srihke in likiyac paholos kacl; tuhsruhk el lainuhlos, ac fahk nuh selos:

3 Nikmet kahlyuc, tuh God El fah kalyei kowos fin kowos likiyac pouwos keik, tuh nga sonna suhpwaclihk pweng suc Leum El suhpweyucme in suhpwaclihk; nga oacyacpac sonna fahk nuh suwos ke ma suc kowos ngihsre tuh nga in fahk; ohinge, God El fah tiac lwelah tuh nga fah kuhnausyucklac ke pacl se inge.

4 Tuh Nga enenuh in ahkfahsryelah masap ma God El sapkihn nuh sihk; ac ke srihpen nga fahk nuh suwos ma pwacye kowos kasrkuhsrak sihk. Ac sifilpac, ke srihpen nga sruhmuhn kahs luhn God kowos nuhnuhnkweyuc muh nga kasrkuhsrak.

5 Na tukun ma inge tukun Abinadi el sruhmuhn kahs inge na mwet lal tohkohsrah Noah ah elos tiac likiyac paholos kacl, tuh Nguhn luhn Leum tuhkuh nuh yohrohl, ac muhtahl kahlwem ke sie kahlwem na yohk, oacna ke Moses el oruh ke el oasr ke finohl Sinai, in sramsram nuh sin Leum ah.

6 Ac el sramsram ke kuh ac wal sin God; ac el kalweni kahs lal, fahk:

7 Kowos liye tuh wacngihn kuh lowos in uniyucwi, ohinge nga sahflah ke pweng luhk. Ahok, ac nga eis muh fakihskowosi nuh ke insiowos ke srihpen nga fahk nuh suwos ma pwacye ke ma koluk lowos.

8 Ahok, ac kahs luhk nwekkowoslac in suk ac fwefwelac, ac in kasrkuhsrak.

9 Tuh nga sahflah ke pweng luhk; ac wacngihn elyah lah ngwac som nuh yac, fin fahsr ne wo nga painmoullac.

10 Tuh nga kuh in fahk nuh suwos ke luhpah se inge, meac kowos ac oruh nuh sihk, tukun ma se inge, fah oacna sie kain ac nguhna ke ma suc ac tuhkuh.

11 Ac inge nga riti nuh suwos ma luhlah ke masap luhn God, tuh nga eis muh ma inge tiac na sihmlac lun insiowos; nga eis muh kowos lutlut ac lotweacng ma koluk ke inkaiyacn moul lowos.

12 Ac inge, kowos esam tuh nga fahk nuh suwos: Kowos fah tiac oruh nuh suwos kuhtwena ma sruhlwaclah, kuh oacna sie kain in ma ma oasr inkuhsrao lucng, kuh suc oasr fin facluh ten, kuh suc oasr ye kof ye facluh ten.

13 Ac sifilpac, kowos fah tiac epahsrlah ye muhtuhn ma inge, kuh kuhlwacnsapuh ma inge; tuh Nga Leum God Lowos sie God lwemta, lain ma koluk luhn pahpah tomowos ma oan fin tuhlihk uh, nuh ke fihl se ahktolu ac ahkahkosr suc sruhngwacyuc.

14 Ac ahkkahlwemye pahkotwen nuh sin tausin selos tuh elos in luhngse Nga ac liyacacng masap Luhk.

15 Nik kom ahklisrohngtwenye En Leum God lom; tuh Leum El tiac muh tiac wacngihn mwactuhn el suc ahklisrohngtwenye El.

16 Esamyac lwen sahpuht, in ahkmuhtahlye.

17 Lwen ohnkohsr kom fah orekma, ac oruh orekma lom nuhkwewa.

18 Tuh ke lwen se ahkitkohsr, sahpuht luhn Leum God lom, nik kom oruh kuhtwena orekma, kom, kuh wen nuhtum, kuh acn nuhtum, mwet mukul kuhlwacnsap lom, kuh mwet muhtwacn kuhlwacnsap lom, kuh kaho nuhtum, kuh mwet sac ma muhta in kalkal lom;

19 Tuh in lwen ohnkohsr Leum El oraclah kuhsrao ac facluh, ac meoa, ac ma nuhkwewa fac; ohinge Leum El ahkinsewowoye lwen sahpuht, ac ahkmuhtahlye.

20 Ahkfuhlwactye pahpah tomom ac ninac kiom, tuh lwen lom in puhs fin facl se suc Leum God lom El sot nuh sum.

21 Nik kom ahkmas.

22 Nik kom kosro. Nik kom pihsrapasr.

23 Nik kom kikiacp lain mwet tuhlan lom.

24 Nik kom rahpkuhi lohm sin mwet tuhlan lom, nik kom rahpkuhi muhtwacn kiyacn mwet tuhlan lom, kuh mwet mukul kuhlwacnsap lal, kuh mwet muhtwacn kuhlwacnsap lal, kuh ox nahtuhl, kuh donkey nahtuhl, kuh kuhtwena ma luhn mwet tuhlan lom.

25 Ac tukun ma inge tuh tukun Abinadi el ahksahfye mwe fahk inge na el fahk nuh selos: Yac kowos luti mwet inge tuh elos fah akihlen in oruh ma inge nohfohn in karihngihn masap inge?

26 Nga fahk nuh suwos, Moh; tuh fin kowos oruh, Leum El fah tiac oruh ngwacn tuhkuh ac pahluh koluk ke mwet inge.

27 Ac inge kowos fahk lah molwelah tuhkuh ke masap lal Moses. Nga fahk nuh suwos lah e fal tuh kowos in karihngihn masap lal Moses a kowos sonna; tuh nga fahk nuh suwos, tuh pacl se fah tuhkuh ma ac tiac fal in karihngihnyuck masap lal Moses.

28 Ac oacyacpac, nga fahk nuh suwos, lah molwelah tiac tuhkuh muhkwena ke masap; ac fin tiac ke iwaclah, suc God Sifacna El fah oruh nuh ke ma koluk ac mwe muhnahs luhn mwet Lal, fin tiac elos enenuh in misac, finne ke masap lal Moses.

29 Ac inge nga fahk nuh suwos lah ac fah tuh in oasr sie masap ituckyang nuh sin tuhlihk nuhtin Israel, ahok, finne sie masap suwohs; tuh elos mwet lihkkeke, sa in oruh ma koluk, ac suhmuhi in esam Leum God lalos;

30 Ohinge oasr sie masap ac ituckyang nuh selos, ahok, sie masap ke mukwikwi ac ke akwuck, sie masap suwohs ma elos in akihlen ke lwen nuh ke lwen, in karihngihn in esam ke God, ac ke oruh lalos nuh Sel.

31 Tuh liye, nga fahk nuh suwos, tuh ma inge kwewa pa kain in ma suc ac fah tuhkuh.

32 Ac inge, kuh elos kahlwem ke masap sac? Nga fahk nuh suwos, Moh, elos nohfohn tiac kahlwem ke masap sac; ac ma ke srihpen kwekwe luhn insiaclos; tuh elos tiac kahlwem kac lah wacngihn sie mwet kuh in moullac sahyacn ke molwelah luhn God.

33 Tuh liye, kuh Moses el tiac palye nuh selos ke tuhkuh luhn Messiah, ac lah God El fah molwelah mwet Lal? Ahok, ac finne mwet pahluh pucspucs suc palye e kena pacl se facluh oreklac ah—yac elos tiac sramsramkihn yohk kuh sruhmuhn srihk ke ma inge?

34 Yac elos tiac fahk lah God Sifacna El fah tuhkuh nuh ten inmahsrlon tuhlihk nuhtin mwet, ac eis nuh facl atacn sie mwet, ac som nuh met ke kuhlacna nuh fin facluh nohfohn?

35 Ahok, ac yac elos tiac fahk oacyacpac lah El fah sang moulyak luhn mwet misac, ac tuh El, El Sifacna fah kohs ac kweok?