1 Inge ke Mosiah el ahksahfyelah ma se inge el suhpwaclah nuh fin acn nuhkwewa, inmahsrlon mwet nuhkwewa, kena in etuh ke luhngse lalos ke suc fah tohkohsrah lalos.

2 Ac tukun ma inge puhsren mwet ah tuhkuh, fahk: Kuht kena tuh Aaron wen nuhtum fah tohkohsrah lasr ac mwet kol lasr.

3 Inge Aaron el som nuh fin acn Nephi, ke ma inge tohkohsrah el tiac kuh in sang tohkohsrahi nuh sel; kuh Aaron el tiac pac ke eis nuh facl tohkohsrahi; kuh tiac pac kuhtwena sin wen nahtuhl Mosiah ke eis nuh faclos tohkohsrahi.

4 Ke ma inge tohkohsrah Mosiah el sifil suhpwaclah inmahsrlon mwet ah; ahok, finne sie ma sihmlac el suhpwaclah nuh inmahsrlon mwet ah. Ac pa inge kahs ma sihmlac, fahk:

5 Liye, O kowos mwet luhk, kuh mwet wiyuck, tuh nga ahkmahngolngolye kowos ke, nga kena tuh kowos in motko srihpac ma oruh kowos in nuhnkuh kac uh—tuh kowos kena in oasr sie tohkohsrah.

6 Inge nga fahk nuh suwos tuh el suc tohkohsrahi fal in som nuh se uh tiac na kahlwem, ac e fah tiac ituckyang nuh sel tohkohsrahi.

7 Ac inge fin oasr sie srihsrsrihsri in aholuhl, liye nga sahngweng muh ac oasr fohs sikyak inmahsrlowos. Ac suc etuh tuhsruhk wen nuhtihk, tuh tohkohsrahi ma lal, eklac in kasrkuhsrak ac sislah sie ip ke mwet inge tohkohl, ma oruh mweun ac fohs inmahsrlowos, ma oruh in ahksohrohrye srah yohk ac ahkkolukye inkacnek luhn Leum, ahok, ac kuhnahoslah moul luhn mwet pucspucs.

8 Inge nga fahk nuh suwos lwelah kuht in lahlmwetmwet ac motko ke ma inge, tuh wacngihn suwohs lasr in kuhnahoslah wen nuhtihk, kuh oasr kuhtwena suwohs lasr in kuhnahoslah sie sin sie fin el srihsrngiyucki in aholuhl.

9 Ac fin wen nuhtihk sifil eklac ke insefuhlwact lal ac ke ohiyac suhfal el sifil fohlohklac in esam ke ma el fahk, ac ahkkahlwemye suwohs lal nuh ke tohkohsrahi, ma ac oruh el ac mwet lal in oruh ma koluk yohk.

10 Ac inge lwelah kuht in lahlmwetmwet ac ngwet nuh met ke ma inge, ac oruh suc ac fah oruh mislac luhn mwet inge.

11 Ohinge nga fah tohkohsrah lowos ke inkaiyacn lwen luhlah luhk; ohinge, lwelah kuht in srihsrngiyac mwet nuhnuhnkuh, in nuhnuhnkuh mwet inge fal nuh ke masap lasr; ac kuht fah ahksasucye mukwikwi luhn mwet inge, tuh kuht fah srihsrngiyac mwet ma lahlmwetmwet in mwet nuhnuhnkuh ma ac nuhnuhnkuh mwet inge fal nuh ke masap luhn God.

12 Inge ac wo tuh sie mukul in sollac sin God likina sin mwet, tuh nuhnuhnkuh luhn God kwacna suwohs, tuhsruhk nuhnuhnkuh luhn mwet tiac kwacna suwohs.

13 Ke ma inge, fin ma ac kuh se kowos in eis mwet ma suwohs in tohkohsrah lowos, suc ac muhsahi masap luhn God, ac nuhnuhnkuh mwet inge fal nuh ke masap Lal, ahok, fin kowos eis mwet in tohkohsrah lowos ma ac oruh oacna pahpah tuhmuhk Benjamin el oruh nuh sin mwet lal—Nga fahk nuh suwos, fin pa inge ma se inge ac ma wo se tuh kowos in kwacna oruh in oasr tohkohsrah in kol kowos.

14 Ac finne nga sifacna orekma ke kuh nuhkwewa ac ma nuhkwewa ma oasr yuruk, in luti kowos masap luhn God, ac in muhsaheack mislac fin acn uh, tuh in fah wacngihn mweun kuh fohs, wacngihn pihsrapasr, kuh fuhnmweti, kuh ahkmas, kuh kuhtwena kain in ma koluk.

15 Ac el suc kuhnahoslah ma koluk, ngwac kaclpousilyac fal nuh ke ma koluk el kuhnahoslah, fal nuh ke masap ma utuckuh nuh sihk sin pahpah tuhmwacsr.

16 Inge nga fahk nuh suwos, tuh ke srihpen mwet nuhkwewa tiac suwohs tiac wo tuh kowos in eis sie tohkohsrah kuh in oasr tohkohsrah pucspucs in kol kowos.

17 Tuh liye, fuhkah luhpan ma koluk sie tohkohsrah koluk el oruh in kuhnausyucklac, ahok, ac e mwe elyah yohk!

18 Ahok, esamuhl tohkohsrah Noah, muhnahs lal ac ma koluk lal, ac oacyacpac muhnahs ac ma koluk luhn mwet lal. Liye meac elyah yohk tuhkuh nuh selos; ac oacyacpac ke srihpen ma koluk lalos elos utucklac nuh ke srohoh.

19 Ac fin tiac ke inmahsrlon lahlmwetmwet nuhkwewa luhn Mwet in Oraclah lalos, ac ma ke srihpen auliyak pwacye lalos, elos tiac enenuh in oasr na in srohoh ne ke pacl se inge.

20 Tuh liye, El kohlohloslac ke srihpen elos ahkpuhsisaclyelos sifacna ye muhtahl; ac ke srihpen elos tuhng yohk nuh sel, El kohlohloslac liki srohoh; ac ohinge Leum El orekmakihn kuh Lal ke ohiyac pucspucs inmahsrlon tuhlihk nuhtin mwet, ahsroelah paho pahkotwen nuh selos suc fihliyac luhlahlfongi lalos in El.

21 Ac liye, inge nga fahk nuh suwos, kowos tiac kuh in eislah sie tohkohsrah koluk liki tron lal fin tiac ke ma tuhkuh ke fohs luhlahp, ac ke ahksohrohryeyacn srah yohk.

22 Tuh liye, el oruh kawuck lal in muhta in ma koluk, ac el oruh mwet topang lal in raunuhllah; ac el kuhnahoslah masap lalos suc kol ke suwohswohs ye muhtahl; ac el likiyac ye niyacl masap luhn God;

23 Ac el oraclah masap, ac suhpwaclihk nuh inmahsrlon mwet lal, ahok, masap ma ac oruh ma koluk lal sifacna; ac el suc tiac ahkos masap lal el oruh in kuhnausyucklac elos; ac el suc forlah lainuhl, el ac suhpwaclah solse lal in mweun lainuhlos, ac fin el kuh el fah kuhnaosuhloslac; ac ohinge sie tohkohsrah sesuwohs el kuhnahoslah inkacnek luhn ma suwohswohs nuhkwewa.

24 Ac inge liye nga fahk nuh suwos, tiac wo tuh kuhtwena ma koluk fah tuhkuh nuh yuruwos.

25 Ohinge, kowos sulaclah ke puhsren mwet inge, mwet nuhnuhnkuh, tuh kowos fah nuhnuhnkweyuck fal nuh ke masap ma utuckuh nuh suwos sin pahpah tuhmwacsr, suc pwacye, ac suc ituckyang nuh selos ke poun Leum.

26 Inge tiac kwacna sikyak tuh puhsren mwet in luhngse kuhtwena ma sahyacn ma suc pwacye; tuhsruhk kwacna sikyak ke ip ma srihk ma mwet ah kena tuh in tiac pwacye; ohinge ma se inge fah akihlenyuck ac in oreklac in masap lowos—in ahkfahsrye oruh lowos an ke puhsren mwet ah.

27 Ac fin pacl sac tuhkuh tuh puhsren mwet ah in sulaclah ma koluk, na e pacl se ma nuhnuhnkuh luhn God fah tuhkuh nuh faclos; ahok, na e pacl se ma El fah muhtwacta nuh yuruwos ke kuhnahoslah yohk finne El kwacna muhtwacta ke puhluhn pacl se nuh fin acn uh.

28 Ac inge fin mwet nuhnuhnkuh pa lowos an, ac elos tiac nuhnuhnkwekowos fal nuh ke masap ma utuckot, kowos kuh in oruh tuh elos in nuhnuhnkweyuck ke nuhnuhnkuh fuhlwact.

29 Fin mwet nuhnuhnkuh fuhlwact lowos tiac oruh nuhnuhnkuh suwohswohs, kowos fah oruh tuh sie u srihsrihk ke mwet nuhnuhnkuh srihsrihk lowos in tuhkweni nuh sie, ac elos fah nuhnuhnkuh mwet nuhnuhnkuh fuhlwact lowos, fal nuh ke puhsren mwet ah.

30 Ac nga sapkihn nuh suwos in oruh ma inge in sahngweng sin Leum; ac nga sapkihn nuh suwos in oruh ma inge, ac tuh in wacngihn tohkohsrah lowos; tuh fin mwet inge oraclah ma suhfal ac ma koluk, elos fah eis mwacta nuh ke insifaclos sifacna.

31 Tuh liye nga fahk nuh suwos, ma koluk luhn mwet pucspucs tuhkuh sin tohkohsrah lalos; ohinge ma koluk lalos ac topukyuck ke insifacn tohkohsrah lalos.

32 Ac inge nga kena tuh tiac oacna sie se inge in wacngihnlac fin acn se inge, yohkna inmahsrlon mwet luhk inge; tuhsruhk nga kena tuh acn se inge in sie acn sukohsohk, ac mukul nuhkwewa in engankihn suwohs lal ac woiyac oacna sie, ne ke na Leum El liye fal tuh kuht in moul ac usrui acn uh, ahok, finne in loes liki na mwet somlah lasr met ma muhta fin acn uh.

33 Ac puhs pac ma tohkohsrah Mosiah el sihmihs nuh selos, ikacselihk nuh selos mwe sruhf ac elyah nuhkwewa luhn sie tohkohsrah suwohswohs, ahok, mwe muhnahs ke moul luhn mwet lal, ac oacyacpac tohrkahskahs luhn mwet ah nuh sin tohkohsrah lalos; ac el ahkuhtweyac nohfohn nuh selos.

34 Ac el fahk nuh selos ma inge in tiac pa ngwe na; tuhsruhk tuh ma toasr in tuhkuh nuh sin mwet nuhkwewa, tuh mukul nuhkwewa kuh in puhlakihn ip lal sifacna an.

35 Ac el oacyacpac ikacslah nuh selos nuhkwewa ma koluk elos orekma nuh kac, ke oasr luhn sie tohkohsrah sesuwohs in kohlohlos.

36 Ahok, ma suhfal nuhkwewa lal ac ma koluk nuhkwewa, ac mweun nuhkwewa, ac fohs, ahkmas, ac pihsrapasr, ac fuhnmweti, ac orek kosro, ac kain in ma koluk pucspucs ma tiac kuh in oacwaclah—fahk nuh selos lah ma inge nuhkwewa tiac enenuh in pa ngwe na, tuh elos srahngwesroa nuh ke masap luhn God.

37 Ac na tukun ma inge, tukun tohkohsrah Mosiah el suhpwaclihk ma inge inmahsrlon mwet ah, elos forlah luhlahlfongi ke ma pwacye ke kahs lal.

38 Ohinge elos sruhngwaclah kena lalos nuh ke sie tohkohsrah, ac eklac in kena tuh mukul nuhkwewa in oacna sie fin acn ah nohfohn; ahok, mukul nuhkwewa ahkkahlwemye insese in topuk ma koluk lal sifacna.

39 Ohinge, tukun ma inge elos tuhkweni nuh sie ke u fin acn uh nohfohn, in sruhkwack puhsrwaclos lah suc ac fah mwet nuhnuhnkuh lalos, in nuhnuhnkwaclos fal nuh ke masap ma ituckyang nuh selos; ac elos engankihn ke srihpen moul sukohsohk ma ituckyang nuh selos.

40 Ac elos fokokoi in luhngse Mosiah; ahok, elos luhngse el yohk liki kuhtwena mukul; tuh elos liyacl muh el tiac mwet kol suhlallacl se ma suk in wo nuh se sifacna, ahok, tuh mani ma ahkkolukye moul uh; tuh el tiac suk in kahsruhpi selos, kuh in ahksohrohrye srah; tuhsruhk el muhsahi mislac fin acn ah, ac el sang nuh sin mwet lal tuh elos in isacloslac liki ohiyac nuhkwewa ma oruh pwacnwacng in oasr srohoh; ohinge elos luhngse el, ahok, fahfahlac, wacngihn sahflahiyac.

41 Ac tukun ma inge elos srihsrngiyac mwet nuhnuhnkuh in kohlohlos, kuh in nuhnuhnkwaclos fal nuh ke masap, ac elos oruh ma se inge fin acn ah nohfohn.

42 Ac tukun ma inge Alma el srihsrsrihsri in sifen mwet nuhnuhnkuh se met, ac el oacyacpac pa mwet tol fuhlwact, pahpah tuhmwacl likiyac ohfuhs sac nuh facl, ac sang nuh sel in kol fal nuh ke mukwikwi nuhkwewa luhn alu uh.

43 Ac na tukun ma inge Alma el fahsr ke inkacnek luhn Leum, ac el karihngihn masap lal, ac el oruh nuhnuhnkuh suwohswohs; ac fahlac in oasr mislac fin acn ah.

44 Ac ohinge fahlac kol luhn mwet nuhnuhnkuh fin acn Zarahemla, inmahsrlon mwet nuhkwewa ma pahngpahng mwet Nephi; ac Alma pa emet ac sifen mwet nuhnuhnkuh.

45 Ac na tukun ma inge pahpah tuhmwacl misac, el yac alngucul ac luo matwac, el moul ahkpwacyelah masap luhn God.

46 Ac tukun ma inge Mosiah el oacyacpac misac, el kol ke lusen yac tolngoul ac tolu, el yac onngoul ac tolu matwacl, sisacni kwewa, luhmfoko ac yuc yac ke pacl se Lehi el som liki acn Jerusalem.

47 Ac ohinge sahflah kol luhn tohkohsrah nuh sin mwet Nephi; ac ohinge ahksahfye lwen lal Alma, suc konwacack alu lalos.