Mwakoro 14
E taekina taekan te Mesia Itaia—A taekina bwainikirinan ma kakorakaian te Mesia—E karika rabwatana bwa te karea ibukin te bure ao e bubuti ibukiia taan riaon tua—Kabootaua ma Itaia 53. Uakaan ma 148 I.K.
1 Eng, e taekinna Itaia ni kangai: Antai are e a tia ni kakoaua ara ribooti, ao antai are e a tia ni kaota baina te Uea nakoina?
2 Bwa ane e na ikawai imatana n aiaron te aroka ae maraurau, ao n aiaron te wakaa ae bwebwerake man te tano ae mwauu; bon akea aron teina ke tamaroana; ao ngkana ti nooria ao a na akea tamaroana are ti na tangiria mai iai.
3 E na aki tangiraki ao e na ribaki irouia aomata; ae te aomata ae taonaki n te rawawata, man ataa te korakai; ao ti karabaira bwa aron ae ti katannakoi ubura mai irouna; e aki tangiraki, ao ti kaaki taekana.
4 E koaua bwa e a tia ni korakai ibukin kairuara, ma n uouti rawawatara; ma ti taraia n aiaron te aomata ae katuaeaki, e karawawataki mai iroun te Atua, ao ni kakorakaiaki.
5 Ma e a kaikoakaki ibukin riaoan tua iroura, ma ni maraki ibukin ara kairua; ao e na reke raura man te kangaanga are e rinanona; ao ti kamaiuaki man ikoakina.
6 Ngaira ni kabane ti a tia ni bua n ai aroia taian tiibu; ti a tia n rairi nako nanora nakon are oin kawaira; ao e a tia te Uea ni kawenei ara kairua ni kabane iaona.
7 E bwainikirinaki, ao e karawawataki, ma e aki kauka wiina; e kairaki n aiaron te tiibu te teei are e na tiringaki, ao n aiaron te tiibu are roko i mataia taan koroburaeia ao e aki kauka wiina.
8 E uotaki man te umwa ni kaikain ao man te motikitaeka; ao antai ae ataia bwa tera ae na riki nakoina? Bwa e a tia n anaaki man abaia ake a maiu; bwa bon ibukin riaoan tua irouia au botanaomata are e tiringaki iai.
9 Ao e na taunaki irarikiia aika a buakaka, ma aika a kaubwai ni matena; ngkai akea te buakaka ae e a tia ni karaoia, ke te taeka ni kamwane are e otinako mai wiina.
10 Ma e kukurei nanon te Uea bwa e na kaikoakia; e a tia ni karawawata; ngkana e anga rabwatana bwa te karea ibukin te bure ao e na nooriia kanoana, e na kananaua ana bong ni maiu, ao e na rikirake kukurein te Uea i nanon baina.
11 E na noora karawawatan rabwatana, ao e na kukurei iai; ni wanawanana ao au toro ae raoiroi e na karaoiroia aika a mwaiti; bwa e na katoka iaona aia bure.
12 Mangaia ae N na anganna tibwangana i buakoia akana kakannato, ao e na buoki bwain te tokanukai n tibwai ma akana korakora; koina ngke e nurakina tamneina nakon te mate; ao e warekaki i buakoia taan bure; ao e uouoti aia bure aomata aika bati, ao e bubuti ni bureia aika a mwaiti, ao e bubuti ni kan raoi ibukia taan bure.