1 Ahok, finne Isaiah el tiac fahk: Suc luhlahlfongi kahs lasr, ac poun Leum fahkyuck nuh sin suc?

2 Tuh El kapwack ye muhtahl oacna soko sahk fuhsr, ac oacna soko okah ke infohk paholah; tiac wo luhmahl ac tiac kahto; ac ke kuht liyacl wacngihn oaskuhiyacl tuh kuht in luhngse El.

3 El koaseyuck ac sruhngwacyuck sin mwet uh; sie mwet suhpwacr, ac El etuh ahsor; ac oacna sie suc mwet uh okanlah muhtahlos liki; El koaseyuck, ac kuht pihlacsrwacl.

4 Pwacyena El us ahsor lasr, ac us suhpwacr lasr; tuhsruhk kuht nuhnkuh tuh El kweok, ac uniyuck sin God, ac ahkkweokyeyuck.

5 Tuh El kantweyucki ke ma koluk lasr, El itucngyucki ke mwe muhnahs lasr; uni luhn mislac lasr oan facl; ac ke srihngsrihng Lal kuht ahkkweyeyucklac.

6 Kuht nuhkwewa, oacna sip, tahfonglac ke fahsr; kais sie sesr forlah nuh ke inkacnek lal sifacna, ac Leum El fihliyac nuh facl ma koluk lasr nuhkwewa.

7 El srihngelihk, ac El ahkkolukyeyuck, El tiac ikacslah oacluhl, El utuckuh oacna soko sip fuhsr nuh ke acnwuck, ac oacna soko sip suhkahs ye muhtuhn mwet kalkucl ohinge El tiac alngwelihk oacluhl.

8 El utucklac liki nien srohoh ac liki nuhnuhnkuh; ac suc fah nuhnkweack in oacna fihl Lal? Tuh El utiyucklac liki facl luhn mwet moul; tuh ke ma koluk luhn mwet Luhk suc fal in eis srihngsrihng se inge.

9 Ac El oraclah kuclyuck Lal wi mwet koluk, ac wi mwet kahsruhp ke misac Lal; ke srihpen wacngihn ma El oruh koluk, ac wacngihn kuhtasrihk in oacluhl.

10 Tuhsruhk tuh Leum El insewowo in ahkngalyacl; El ahkahsoryacl; ke kom fah oruh nguhnal in sie mwe kihsac nuh ke ma koluk el fah liye fihtac Lal, El fah ahkloesye lusen moul Lal, ac engan luhn Leum fah kapkapwack in pacol.

11 El fah liye srihpen ngal luhn nguhnal, ac fah muhti; ke lahlmwetmwet lal sifacna mwet kuhlwacnsap suwohswohs Luhk fah ahksuwohsyelah mwet pucspucs; tuh El fah us ma koluk lalos.

12 Ke ma inge Nga fah kihtaclihk nuh Sel sie ip wi mwet fuhlwact, ac El fah kihtaclihk mwet koluk liki mwet kuh; ke srihpen el okwacoht Nguhnal nuh ke misac; ac el oacwaclah yurun mwet tahfonglac; ac El us ma koluk luhn mwet pucspucs, ac orek iwe nuh sin mwet tahfonglac.