1 Ao ngkai e koro bukina bwa ngke e a tia Abinataai n taekin bwaai aikai, ao e anga ana taeka te uea bwa a na uotia nako taian ibonga ao e na tiringaki.

2 Ma iai temanna mai buakoia ae arana Aramwa, ae kanoan Nibwaai. Bon te rorobuaka matoa, ao e kakoauai ana taeka Abinataai ake e a tia n taekin, bwa e a ataa te buakaka are e a tia n tataekinna Abinataai nakoia; mangaia are e bubuti nakon te uea bwa e na katoka unna iroun Abinataai, ao ni bubuti bwa e na kanakoaki ma te rau.

3 Ma e a rikirake riki unin te uea n aio, ao e tua bwa e na kanakoaki Aramwa mai buakoia, ao e kanakoia ana tautia bwa a na rimwina ao a na tiringnga.

4 Ma e birinako mai irouia ao e karaba bwa a aonga n aki kunea. Ao i nanon boong ake e karaba iai ao e a koroi ana taeka Abinataai ni kabane ake e taekin.

5 Ao e koro bukina bwa e tua te uea nakoia ana tautia bwa a na katobibia Abinataai ao a taua; ao a kabaea ao a karinna n te umwa ni kaikain.

6 Ao i mwin teniua te bong,I mwin ana kakarabakau ma ana ibonga, ao e tua bwa e na manga uotaki riki nako matana.

7 Ao e taku nakoina: Abinataai, iai te bure are ti na bukiniko iai, ao ko na tiringaki iai.

8 Bwa ko a tia n taekinna bwa e na ruo te Atua n oin rabwatana nako buakoia natia aomata; ao ngkai, bon ibukin aio are ko na tiringaki iai ma ko na maiu ngkana ko kaoki taeka ni kabane ake ko a tia n taetae ni burabetin aika a taekin bwaai aika a buakaka nakoiu ao nakoia au botanaomata.

9 Ao e kangai Abinataai nakoina: I taekina aio nakoim, N na aki manga kaoki taeka ake I a tia n taekin nakoim ni kaineti ma te botanaomata aio, bwa a koaua; ao bwa ko aonga n atai koauaia ao I a kariaia bwa N na reke i nanon baim.

10 Eng, ao N na kariaia naba te mate, ao N na aki kaoki au taeka, bwa a tei bwa bwai ni kakoaua ni kaaitarako. Ao ngkana ko tiringai ao kam na katiia raraan te aomata ae akea ana bure, ao aio are e na tei naba bwa te bwai ni kakoaua ni kaaitarako n te kabanea ni bong.

11 Ao ngkai, e a kaniia ae e na kabwara te uea ae Noa, bwa e maakui ana taeka; bwa e maakui ana moti te Atua ake e na bwakaria iai.

12 Ma a tabeki bwanaia taian ibonga ni kaitara, ao a tabeki taekana ni kangai: E a tia ni kamatauninga te uea. Mangaia are e a mangao nanon te uea irouna, ao e a anga ana taeka bwa e riai n tiringaki.

13 Ao e koro bukina bwa a anaia ao a kabaea, ao a kabueka kunna n taian mwanga aika kauraki, eng, ni karokoa ae mate.

14 Ao ngke e a bue n te ai, ao e takarua nakoia ni kangai:

15 Taraia, bwa ane kam a tia ni karaoia nakoiu, ao e na koro bukina bwa kanoami a na kammarakiia naba aika a mwaiti n aron te maraki are I rinanona, n aron te mate i nanon te ai; ao aio ibukin ae a kakoaua te kamaiuaki mai iroun te Uea ae Atuaia.

16 Ao e na koro bukina bwa a na taonaki n aeka n aoraki aika mwaiti ibukin ami buakaka.

17 Eng, ao ko na ekakinako man iteram ni kabane, ao ko na kakioaki nako ma ni kamaenakoaki, n aiaron kakioaia taian nanai aika a moaanti irouia ma n ni kakang.

18 Ao n te bong arei ao ko na kaeaki, ao ko na reke i nanon baia am kairiribai, ao ko na rinanon, n aiaron ae I a tia n rinanon, kammarakin te mate i nanon te ai.

19 Ao te Atua e kaoka te kai nakoia ake a kamaunaia ana botanaomata. O Te Atua, butimwaea tamneiu.

20 Ao ngkai, ngke e tia Abinataai n taekin taeka aikai, e bwaka, ao ni mate man buena i nanon te ai; eng, e tiringaki ibukina ngkai e aki kan kakewei ana tua te Atua, ao bwa e na kamatoai koauan ana taeka ni matena.