1 Ao e koro bukina bwa e oki ana taanga te uea, i mwin ukoukoraia ana botanaomata te Uea.

2 Ao ngkai taraia, a uarereke ana taanga te uea, ngkai a tia ni kauarerekeaki, ao e a riki te bwenaua imarenaia ake nikiran te botanaomata.

3 Ao ake a karako riki mwaitia a taetae ni kakamaka te uea, ao e a rikirake te itabaraara imarenaia.

4 Ao ngkai iai te mwaane temanna i buakoia ae arana Kiteon, ao ngkai bon te aomata ae aintoa ao ana kairiribai te uea, mangaia ae e buuta ana kabaang, ao e berita ni marakin nanona bwa e na tiringa te uea.

5 Ao e koro bukina bwa e un ma te uea; ao ngke e nooria te uea bwa e a kan konaki, ao e birinako nakon te taua ae kaan ma te tembora.

6 Ao e rimwina Kiteon ao e a bon kan roko n te taua bwa e nang tiringa te uea, ao e tarataranako te uea nako aon aban Tiemron, ao e a noora aia taanga Reimwanaite are e tia n riaon tian abaia.

7 Ao e takarua te uea i aan maakun nanona, ni kangai: Kiteon, tai tiringai, bwa ae iaon kawaia Reimwanaite n ekinakoira, ao a na bon tirigiira; eng, a na bon tiringia au botanaomata.

8 Ao bon akea nanon te uea irouia ana botanaomata ma e bon ti tabe ma oin maiuna; e ngae n anne ao e aki tiringnga Kiteon.

9 Ao e tua te uea nakoia ana botanaomata bwa a na birinako i mwaain rokoia Reimwanaite, ao e birinako naba ngaia i mwaain rokoia, ao a bane ni birinako nako nanon te rereua, ma buuia ao natia.

10 Ao e koro bukina bwa a rimwiaki irouia Reimwanaite, ao a reke irouia, ao a tiringia.

11 Ao e tua te uea bwa mwaane ni kabane a na katikuia buuia ma natia, ao ni birinako mai irouia Reimwanaite.

12 Ao a mwaiti ake a rawa ni katikuia, ma a tangiria riki n tiku ao ni mate mangaia. Ao ake nikiraia a katikuia buuia ma natia ao a birinako.

13 Ao e koro bukina bwa mwaane ake a tiku irarikiia buuia ma natia a tuangiia natia aine aika a tikiraoi bwa a na teirake ni butiia Reimwanaite bwa a na aki tiringia.

14 Ao e koro bukina bwa a reke nanoangakia irouia Reimwanaite, bwa a bwaka ni botonaineia aia aine.

15 Mangaia ae a aki tiringia Reimwanaite, ao a uotia nako bwa taenikai nako aban Nibwaai, ao a kariaia bwa a kona n tekateka n te aba anne, i aan te boraraoi ae a na anga te uea ae Noa nako nanon baia Reimwanaite, ao a na anga naba kaubwaia, ae mwaitina bon iteran aia bwai, iteran aia koora, ma aia tirewa, ma bwaai ni kabane aika kakawaki, ao a na kaakabwaka naba te angabwai nakon aia uea Reimwanaite ni katoa ririki.

16 Ao ngkai iai temanna natin te uea te mwaane i buakoia aika a taenikai, ae arana Rimwaai.

17 Ao ngkai e tangiria Rimwaai bwa e na aki tiringaki tamana; ma, tiaki n ae aki ataa taekan ana bure tamana ngkai Rimwaai bon te aomata ae tamaroa naba ngaia.

18 Ao e koro bukina bwa e karaba ni kanakoia mwaane Kiteon nakon te rereua, bwa a na kakaea te uea ao mwaane ake raona. Ao e koro bukina bwa a kaitibo mangaia i nanon te rereua, ma akea te uea ma ana ibonga i buakoia.

19 Ngkai a tia ni berita inanoia bwa a na okira aban Nibwaai, ao ngkana a tia n tiringaki buuia ma natia, ao naake a tiku irarikiia, ao a na kaoka kaia, ao a na mate naba irarikiia.

20 Ma e tua te uea nakoia bwa a na aki oki; ao a un iroun aia uea, ao a motikia bwa e na karawawataki, bwa e na tiringaki i nanon te ai.

21 Ao a nang bon anaia naba taian ibonga bwa a na tiringia, ma a birinako mai irouia.

22 Ao bon iaon kawaia n okira aban Nibwaai ngke a kaitibo naba ma ana koraki Kiteon. Ao ana koraki Kiteon a kaongoia bwaai ake a tia n riki nakoia buuia ma natia; ao a tia naba Reimwanaite ni kariaia bwa a na tekateka n te aba ngkana a kabwaka angabwai nakoia Reimwanaite ae mwaitina iteran aia bwai ni kabane.

23 Ao a tuangiia ana koraki Kiteon ae a tia n tiringa te uea, ao a birinako ana ibonga mai irouia nako nanon riki te rereua.

24 Ao e koro bukina bwa ngke a tia ni karaoa aia botaki, ao a okira aban Nibwaai, ni kimwareirei, ibukina ngkai a bon aki tiringaki buuia ke natia; ao a kaongoa Kiteon taekan te bwai are a tia ni karaoia nakon te uea.

25 Ao e koro bukina bwa e tuea aia uea Reimwanaite nakoia, bwa a na aki tiringaki irouia ana botanaomata.

26 Ao Rimwaai, ngkai ngaia natin te uea, are e a katokaaki ueana irouia te botanaomata, e a tuea naba nakon aia uea Reimwanaite bwa a na karaoa te angabwai ana botanaomata nakoina, ae mwaitina bon iteran aia bwai ni kabane.

27 Ao e koro bukina bwa e a moanna Rimwaai ni katea ueana ao ni karekea te rau imarenaia ana botanaomata.

28 Ao aia uea Reimwanaite e a kateia taan taratara ni katobibia te aba bwa e aonga n tauia ana botanaomata Rimwaai bwa a na maeka i nanon te aba, bwa aonga n aki biri nako nanon te rereua; ao e karekei booia ana tautia man te angabwai are reke nakoina mai irouia Nibwaite.

29 Ao ngkai e teimatoa te rau n ana tai n uea Rimwaai i nanon te maan ae uoua te ririki, ngkai Reimwanaite a aki bwainikirinia ke n tiringia.