Ai Vola i Mosaia

1 Ia oqo a sa sega tale na veileti ena vanua taucoko ko Saraemala, ena kedra maliwa kece na nona tamata na tui ko Penijamini, ka sa yalo vakacegu tiko kina ko Penijamini na tui ena vo kece ni nona veisiga.

2 Ka sa yaco ni sa tolu na luvena tagane; a sa vakatoka na yacadratou ko Mosaia, kei Iloramu, kei Ilamani. Ka sa lewa me ratou vakavulici ena nodra vosa kece na nona qase, me yaco rawa kina me ratou tamata kila ka; ka me ratou kila kina na veika e baleta na vei parofisai ka a vosataki mai na gusudra na nodra qase, ka a soli vei ira mai na liga ni Turaga.

3 Ka sa vakavulici iratou talega ko koya me baleta na veitukutuku ka ra ceuti tu ena peleti parasa, ka kaya: Oi kemudou na luvequ, au gadreva mo dou dau nanuma tiko ni kevaka me ra a sega na peleti oqo, ka ra tu kina na veitukutuku kei na veivakaro oqo, ke da a lecaika tu ga, io ena gauna sara mada ga oqo, ka da sega ni kila na veika vuni ni Kalou.

4 Ni na sega ni rawa vua na tamada, ko Liai, me nanuma rawa tiko na veika kece oqo, ka vakavulici iratou kina na luvena, kevaka a sega na nodra veivuke na peleti oqo; ni ena vuku ni nona a vakavulici ena vosa vaka-Ijipita, sa wilika rawa kina na veika ceuti oqo, ka vakavulici iratou kina na luvena, ia me ratou qai vakavulici ira rawa kina na luvedratou, ka me vakayacori kina na ivakaro ni Kalou, me yacova mai na gauna oqo.

5 Au sa kaya vei kemudou, na luvequ, kevaka me ra a sega na veika oqo, ka ra sa maroroi ka taqomaki tu mai na liga ni Kalou, me da wilika ka kila kina na nona veika vuni, ka me tiko ga kina e matada na nona ivakaro, ke ra a sa malumalumu sobu ena tawa vakabauta ko ira sara mada ga na noda qase, ka eda na vakataki ira na wekada, ko ira na Leimanaiti, ka ra sega tu ni kila e dua na ka me baleta na veika oqo, ka ra na sega talega ni vakabauta kevaka era vakatavuvulitaki vei ira, ena vuku ni nodra ivakarau ni bula sega ni dodonu na nodra qase.

6 Oi kemudou na luvequ, au gadreva mo dou nanuma ni ra sa dina na vei vosa oqo, ka ra sa dina talega na veitukutuku oqo. Ia raica, sa vakatalega kina na peleti i Nifai, ka sa tu kina na itukutuku kei na nodra vosa na noda qase mai na gauna era a biuti Jerusalemi mai kina ka yacova mai oqo, ka ra sa dina; ka da kila ni ra sa dina ni ra sa tu sara ga oqo e matada.

7 Ia oqo, oi kemudou na luvequ, au gadreva mo dou dau nanuma tiko mo dou na dau vakasaqaqara vagumatua sara kina, mo dou na rawa ka mai kina; ka’u gadreva mo dou dau muria na ivakaro ni Kalou, mo dou na tiko sautu kina ena vanua me vaka na vosa ni yalayala ni Turaga vei ira na noda qase.

8 Ka sa vuqa tale na ka sa vakatavulica na tui ko Penijamini vei iratou na luvena, era sega ni volai ena ivola oqo.

9 Ka sa yaco ni sa tinia na nona vakavulici iratou na luvena ko Penijamini na tui, a sa qase sara mai, ka sa raica ni sa voleka me lako yani ena sala era na lako kina na kai vuravura kecega; o koya, sa nanuma kina ni sa dodonu me solia na lewa ni matanitu vua e dua vei iratou na luvena.

10 O koya oqo, sa vakarota kina me kau mai vua ko Mosaia; ka sa vakaoqo na vosa sa vosataka vua, ka kaya: Na luvequ, au gadreva mo kacivaka raraba yani ena vanua taucoko oqo ena kedra maliwa na tamata kece oqo, se ko ira na lewei Saraemala kei ira na tamata i Mosaia ka ra tiko ena vanua, me ra soqoni vata mada mai; ni’u na kacivaka yani ena mataka mai na gusuqu kivei ira oqo na noqu tamata, ni ko sa tui ka daunilewa talega vei ira na tamata oqo, ka a soli ira mai vei kedaru na Turaga na noda Kalou.

11 Ka dua tale, au na solia vei ira na tamata oqo e dua na yaca, me ra na kilai tani kina mai vei ira kecega na tamata ka a kauta tani mai na vanua ko Jerusalemi na Turaga na Kalou; ka’u sa kitaka oqo baleta ni ra sa tamata gugumatua ni muria na veivakaro ni Turaga.

12 Ka’u na solia vei ira e dua na yaca ka na sega vakadua ni bokoci laivi, ka vakavo ga ena vuku ni talaidredre.

13 Io, au sa kaya talega vei iko, ni kevaka era sa na lutu ki na talaidredre ko ira na nona tamata ni toko oqo na Turaga, ka yaco me ra tamata dau caka ca ka dauveibutakoci, ena qai soli ira yani na Turaga, ka na yaco me ra malumalumu me vakataki ira na wekadra; ka na sega tale ni maroroi ira ena nona kaukauwa e vakasakiti ka sega ni vakatautauvatataki rawa, ka a dau maroroi ira tiko mai kina na noda qase.

14 Ia au sa kaya vei iko, ni kevaka me a sega ni dodoka yani na ligana me maroroi ira na noda qase, ke ra a sa lutu ki na ligadra na Leimanaiti, ka tau vei ira na nodra cudru.

15 Ka sa yaco ni sa tinia ko Penijamini na tui na nona vosa vua na luvena, sa qai solia vua na lewa me baleta na veika kece ni matanitu vakatui.

16 Ka dua tale, sa solia talega vua na lewa me baleta na itukutuku ka ra ceuti tu ena peleti parasa; kei na peleti talega i Nifai; kei na iseleiwau talega i Lepani, kei na polo se idusidusi, ka a liutaki ira mai na noda qase ena loma ni lekutu, ka a vakarautaka na liga ni Turaga me ra liutaki mai kina, ko ira yadua me vaka na ivakarau ni vakarorogo kei na gugumatua era a vakayacora vua.

17 O koya, era sa sega kina ni sautu se toso ki liu ena nodra ilakolako ni ra sa sega ni yalodina, ia era sa biligi lesu ki muri, ka tau kina vei ira na cudru ni Kalou; o koya era sa yaviti kina ena dausiga kei na veika rarawa ca sara, me vakauqeti ira tale me ra nanuma na nodra itavi.

18 Ia oqo, a sa yaco ni sa lako ko Mosaia ka kitaka me vaka a vakarota vua ko tamana, ka kacivaka yani vei ira kecega na tamata ena vanua ko Saraemala me ra vakasoqoni vata yani, ka lako cake ki na valetabu me ra la’ki rogoca kina na vosa ka na vosataka vei ira ko tamana.