1 Ao iai te tabo teuana i Tiemron are a botaki iai ainen Reimwanaite n anene, ao ni bwatere, ao ni kakukureia.

2 Ao e koro bukina bwa n te bong teuana ao ti tabeman mwaitia ake a botaki n anene ao ni bwatere.

3 Ao ngkai ana ibonga te uea ae Noa, ngkai a maamaa n okira ana kaawa Nibwaai, eng, ao a maaku naba bwa rimwi a tiringaki irouia te botanaomata, mangaia ae a rang ni maaku n okiria buuia ma natia.

4 Ao i mwin aia tataninga i nanon te rereua, ao ngke a tia ni kuneia ainen Reimwanaite, ao a karabaia ma ni mataku irouia;

5 Ao ngke ai ti tabeman aika a roko bwa a na bwatere, ao a otinako man nneia ake a karabaia iai ao a anaia ao a uotia nako nanon te rereua; eng, bon uangaun ma aman ainen Reimwanaite ake a uotia nako nanon te rereua.

6 Ao e koro bukina bwa ngke a ataia Reimwanaite ae a bua aia aine, ao a un irouia ana botanaomata Rimwaai, bwa a bukiniia iai ana botanaomata Rimwaai.

7 Mangaia are a kanakoia aia taanga ni buaka; eng, e bon iri naba te uea imoaia ana botanaomata; ao a mwananga nakon aban Nibwaai bwa a na tiringia ana botanaomata Rimwaai.

8 Ao ngkai Rimwaai e a nooriia mai aon te taua, ma aron naba aia katauraoi ibukin te buaka; mangaia are e a botiia ana botanaomata, ao a tataningaia ni karabaia i nanon taian tawaana ma taian buakonikai.

9 Ao e koro bukina bwa ngke a roko Reimwanaite, ao a kibaria ana botanaomata Rimwaai man aia tabo ake a karabaia iai, ao a tiringia.

10 Ao e koro bukina bwa e riki te bobuaka aio ni korakora, bwa a un n ai aroia raian iaon kanaia

11 Ao e koro bukina bwa a totokoaki Reimwanaite irouia ana botanaomata Rimwaai; ao e aki roko mwaitia n iteran mwaitia Reimwanaite. Ma a bon buaka ibukin maiuia, ibukiia buuia, ma natia; mangaia are a kakorakoraia n ai aroia raakon ngke a buaka.

12 Ao e koro bukina bwa a kunea aia uea Reimwanaite i buakoia aia mate; ma e aki mate, ma e korakora ikoakina ao e katukaki iaontano, ngkai a rang ni ienikuri ana botanaomata ni birinako.

13 Ao a uotia nako ao ni karaoi ikoakina, ao a uotia nako matan Rimwaai, ao a kangai: Taraia, aio aia uea Reimwanaite; ngke e ikoaki ao e a bwaka irarikiia aia mate, ao a kitanna; ao taraia, ti a tia ni kairia nako matam; ao ngkai kariaia bwa ti na tiringnga.

14 Ma e taku Rimwaai nakoia: Kam na aki riai n tiringnga, ma kairia mai bwa n na nooria. Ao a kairia. Ao e kangai Rimwaai nakoina: Teraa ae karika teirakem ni buakaniia au botanaomata? Taraia, a tuai au botanaomata n urua te tuea are I a tia ni karaoia ma ngkoe; mangaia ae bukin teraa ngkai ko urua te tuea are ko a tia ni karaoia nakoia au botanaomata?

15 Ao ngkai e kaeka te uea ni kangai: I a tia n urua te tuea ibukina ngkai am botanaomata a uotia nako aia aine au botanaomata; mangaia ae i nanon uniu ao I tuangiia au botanaomata bwa a na teirake ni buakaniia am botanaomata.

16 Ao ngkai e tuai Rimwaai man ongo taekan aio mai mwaaina; mangaia are e kangai: N na kakae i buakoia au botanaomata ao ane e a tia ni karaoa aio e na tiringaki. Mangaia ae e tua bwa e na karaoaki te kakae i buakoia ana botanaomata.

17 Ngkai ngke ongo Kiteon taekan bwaai aikai, ao ngkai ngaia ana kaaben te uea, ao e kawara te uea ao e taku nakoina: I butiko bwa ko na tataninga, ao ko na aki kakae i buakoia te botanaomata aio, ao tai bukiniia n te bwai ae karaoaki aio.

18 Ko aki uringia ana ibonga tamam ake a kataia te botanaomata aio n tiringia? Aki mena n te rereua? Tiaki ngaia aika a anaia aia aine Reimwanaite?

19 Ao ngkai, taraia, tuanga te uea bwaai aikai, bwa e aonga n tuangiia ana botanaomata bwa aonga n rau nanoia iroura; bwa taraia ae a tabe ni kakatauraoi bwa a na buakaniira; ao taraia bon ti tabeman mwaitira.

20 Ao taraia, a mwananga ma aia taanga aika a mwaiti; ao ngkana e aki karau nanoia te uea ao ti na bon mate.

21 Bwa a aki kakoroaki bukin ana taeka Abinataai, ake e tataetae ni burabeti ni kaaitaraira—ao a riki bwaai aikai ni kabane ibukina ngkai ti aki kan ongo n ana taeka te Uea, ao n aki rairaki man ara buakaka?

22 Ao ngkai e riai bwa ti na karaua nanon te uea, ao ti na kakoroa bukin te tuea are ti karaoia nakoina; bwa e tamaroa riki ae ti na tautoronaki nakon ae ti mate; mangaia ae e riai bwa ti na katoka te tiriaomata.

23 Ao ngkai Rimwaai e tuanga te uea taekan tamana ni kabane, ma taian ibonga ake a birinako nanon te rereua, ao e bukiniia bwa ngaia ake a anaia aia aine.

24 Ao e koro bukina bwa e rau nanon te uea irouia ana botanaomata; ao e taku nakoia: Ti na nako ni butimwaia au botanaomata, n akea ara bwai ni buaka; ao I tuea nakoimi ma te tuea bwa a na aki tiringia am botanaomata au botanaomata.

25 Ao e koro bukina bwa a rimwin te uea, ao a mwananga n akea aia bwai ni buaka ni butimwaia Reimwanaite. Ao e koro bukina bwa a kaitibo ma Reimwanaite; ao e katorobubua aia uea Reimwanaite imataia, ao e bubuti ibukiia ana botanaomata Rimwaai.

26 Ao ngke a nooria Reimwanaite ae akea aia bwai ni buaka ana botanaomata Rimwaai, ao a nanoangaia ao a rau nanoia irouia, ao a okira abaia ma aia uea i nanon te rau.