1 Na ɔbaa dɛ Limhi nye no nkorɔfo no saan hɔn ekyir kɔr Nephi kuropɔn no mu, na wɔhyɛɛ ase tsenaa asaase no do asomdwee mu bio.

2 Na ɔbaa dɛ nda pii ekyir no Lamanfo no hyɛɛ ase nyaa ebufuw bio wɔ Nephifo no ho, na wobotwaa hɔn asaase ho hyiae.

3 Afei dze wonnyi ho kwan dɛ woku hɔn osian nsew a hɔn hen edzi akyerɛ Limhi no ntsi; na mbom wɔbobɔɔ hɔn asomu na wodzii hɔn do tum; na wɔhyɛɛ ase dze adzesoadze a ɔyɛ dur totoo hɔn ekyir, na wɔkãa hɔn dɛ asoaso a ɔatɔ mmum—

4 Nyew, wɔyɛɛ iyi nyinara ama Ewuradze n’asɛm aahyɛ mã.

5 Na afei Nephifo hɔn amandzehu no yɛɛ kɛse, na wonnhu kwan biara so a wobodua do agye hɔnho efi hɔn nsa, osiandɛ Lamanfo no etwa hɔnho nyinara ehyia.

6 Na ɔbaa dɛ dɔm no hyɛɛ ase hwinhwinii ɔhen no osian hɔn amandzehu no ntsi; na wonyaa pɛ bi dɛ wɔbɔkɔ hɔn do nye hɔn akɔkõ. Na wɔdze hɔn sombobɔ tseetsee ɔhen no dodow; dɛm ntsi ɔmaa hɔn kwan dɛ wɔnyɛ dza wɔpɛ dɛ wɔyɛ.

7 Na wɔboaboaa hɔnho bio, na wɔhyɛɛ hɔn akotar, na wɔkɔr Lamanfo do dɛ worukotu hɔn efi hɔn asaase do.

8 Na ɔbaa dɛ Lamanfo no kãa hɔn gui, na wɔpaam hɔn na wokum hɔn mu pii.

9 Na afei nna sũ na kwadwom twa aba Limhi no dɔm no mu, okunafo rusũ no kun, babanyin nye babasia rusũ ma hɔn egya, na nuambanyin rusũ ma hɔn nuanom.

10 Afei nna ekunafo pii wɔ asaase no do, na wosũ dzendzenndzen da biara, osian Lamanfo ho suro a ahyɛ hɔn mu mã no ntsi.

11 Na ɔbaa dɛ hɔn daadaa sũ no pusuuw Limhi no nkorɔfo a wɔaka no ma hɔn bo fuuw Lamanfo no; na wɔkɔr bio dɛ wɔrokɔkõ, na mbom wɔpaam hɔn bio, na wɔhweer nyimpa pii.

12 Nyew, wɔkɔr bio, ne mprɛnsa na wohun amandze dɛmara bio; na hɔn a woennku hɔn no saan hɔn ekyir bio baa Nephi kuropɔn no mu.

13 Na wɔbrɛɛ hɔn ho adze araa wɔ famu mpo, dze hɔn ho hyɛɛ nkowaasom nkɔndua ase, gyaa hɔn ho dze maa ɔhwe nye akɔnaaba ne dzi nye adzesoadze biara a hɔn atamfo pɛɛ dɛ wɔdze soa hɔn no mu.

14 Na wɔbrɛɛ hɔnho adze kɔr ahobrɛadze ne bun mu mpo; na wosũ dzendzenndzen frɛɛ Nyame; nyew, wosũi frɛɛ hɔn Nyankopɔn adzekyee nyinara mu dɛ onyi hɔn mfi hɔn amandzehu mu.

15 Na afei Ewuradze yɛɛ nyaa dɛ obetsie hɔn sũfrɛ osian hɔn emumuyɛ ntsi; naaso Ewuradze tsiee hɔn sũ, na ɔhyɛɛ ase goow Lamanfo no hɔn akoma; naaso Ewuradze hun dɛ ɔnnsɛ dɛ ɔgye hɔn fi nkowaasom mu.

16 Na ɔbaa dɛ wɔhyɛɛ ase dɛ wɔreyɛ prɔmprɔm nkakrankakra wɔ asaase no do, na wɔhyɛɛ ase dɛ worinya ewifua pii, nye nguankuw na anantwikuw, dɛm ntsi ɔkɔm anndze hɔn.

17 Afei nna mbaa a wɔwɔ hɔ no dɔɔ sõ sen mbanyin no; dɛm ntsi ɔhen Limhi hyɛɛ mbra dɛ ɔbanyin biara mma biribi ma wɔmfa mboa ekunafo nye hɔn mba, amma ɔkɔm ennku hɔn; na wɔyɛɛ iyi osiandɛ hɔn a wokum hɔn no dɔɔ sõ.

18 Afei Limhi no nkorɔfo no bɔɔ mu yɛɛ kuw kor dɛ mbrɛ wobotum, hwɛɛ hɔn ewifua nye hɔn nguankuw do yie.

19 Na ɔhen nankasa so suroo dɛ no nko bɛtra afasu a wɔatow no wɔ kurow no ho no, gyedɛ n’aweɔmfo kã no ho, osuroo dɛ annhwɛ a nna ɔakɔtɔ Lamanfo nsa mu.

20 Na ɔmaa no nkorɔfo no weɔɔn asaase a etwa hɔn ho ehyia no yie ama wɔnam kwan bi do eetum akyer asɔfo no a woewia Lamanfo hɔn mbabaa dze hɔn eguan akɔ sar no do no a ɔnam dɛm ntsi ma dɛm ɔsɛɛ kɛse a ɔtse dɛm aba hɔn do no.

21 Na wɔpɛɛ dɛ wɔkyer hɔn na wɔtwe hɔn aso; osiandɛ wɔaba Nephi asaase do anafua, na wɔabɔsoa hɔn ewifua nye hɔn ndzɛmba a ɔsom bo pii kɔ; dɛm ntsi nna wɔretsɛw hɔn.

22 Na ɔbaa dɛ basabasayɛ biara ammbɛda Lamanfo na Limhi no nkorɔfo no ntamu, kesii aber mpo a Ammon nye no nuanom baa asaase no do.

23 Na ɔhen no na n’aweɔmfo fiir edzi kɔr kurow no mbobow ekyir, na hɔ na wohun Ammon na no nuanom no; wɔdween dɛ wɔyɛ Noah n’asɔfoe no, dɛm ntsi ɔmaa wɔfaa hɔn na wɔkyekyeer hɔn dze hɔn too efiadze. Na sɛ wɔyɛ Noah n’asɔfoe no a nkyɛ ɔmaa wokum hɔn.

24 Mbom aber a ohun dɛ ɔnntse dɛm, na mbom wɔyɛ n’enuanom, na wofi Zarahemla asaase do bae no, dɛw kɛse hyɛɛ no mã.

25 Afei ansaana Ammon rebɛba hɔ no, ɔhen Limhi somaa nyimpa kakra bi dɛ wɔnkɔhwehwɛ Zarahemla asaase no; na mbom woennhu hɔ, na wɔyeew wɔ sar no do.

26 Naaso, wohun asaase a nna dɔm wɔ do ara yie; nyew, asaase a mbiew a ho akokwa ahyɛ do mã; nyew, asaase a nkyɛ nyimpa pii wɔ do na wɔasɛɛ no; na wosusuu dɛ ɔyɛ Zarahemla asaase, ntsi wɔsaan hɔn ekyir baa Nephi asaase do, wodur asaase no do no, annkyɛr biara na Ammon bae.

27 Na wɔdze nkyerɛwee bi bae, nkorɔfo no a wohun hɔn mbiew no hɔn nkyerɛwee mpo; na woekrukye no wɔ boran mprɛtse do.

28 Na afei dɛw hyɛɛ Limhi ma bio ber a ɔtsee fii Ammon n’anomu dɛ ɔhen Mosiah wɔ akyɛdze a ofi Nyame hɔ a ɔbɛma oetum akyerɛ nkrukye no ase no; nyew, na Ammon so n’enyi gyee.

29 Naaso awerɛhow hyɛɛ Ammon na no n’enuanom no ma osiandɛ woekuku hɔn enuanom no mu pii.

30 Na bio ɔhen Noah nye n’asɔfoe so ama nkorɔfo no ayɛ emumuyɛdze pii etsia Nyankopɔn; na wosũi so dze maa Abinadi no wu; nna Alma nye dɔm a wɔka no ho kɔree no so, hɔn a wɔnam Nyankopɔn n’ahoɔdzen na no tum do nyaa gyedzi gyee nsɛm a Abinadi kãe no too mu no kyekyeer Nyame n’asɔr.

31 Nyew, wosũi wɔ hɔn nkɔree no ntsi, osiandɛ wonnyim bea a woeguan kɔ. Nkyɛ wɔdze enyigye bɔdɔm hɔn, osiandɛ hɔn so nye Nyame edzi ahyɛmu dɛ wɔbɔsom no na woedzi ne mbrasɛm do.

32 Na afei ofitsi ber a Ammon bae n’ekyir no, ɔhen Limhi nye no nkorɔfo no mu dodowara so nye Nyame edzi ahyɛmu dɛ wɔbɔsom no na woedzi ne mbrasɛm do.

33 Na ɔbaa dɛ ɔhen Limhi nye no nkorɔfo no mu dodowara pɛɛ dɛ wonuma hɔn; mbom nna obiara nnyi asaase no do a oenya tumdzi bi efi Nyame hɔ. Na Ammon ammpɛ dɛ ɔbɛyɛ dɛm adze yi, nna obu noho dɛ ɔyɛ akowaa a onndzi mu.

34 Dɛm ntsi dɛm aber no wɔammboa hɔn ano annkyekyer asɔr, mbom nna wɔrotweɔn Ewuradze no Sunsum. Afei nna wɔpɛ dɛ wɔbɛyɛ dɛ mbrɛ Alma nye n’enuanom no mpo, a woeguan kɔ sar no do no tse.

35 Wɔpɛɛ dɛ wonnuma hɔn ma ɔyɛ dasegye dɛ wɔpɛ dɛ wɔdze hɔn akoma nyinara som Nyame; naaso wɔmaa mber guu mu ara yie; na wɔbɛkã hɔn enuma ho nsɛm ekyir yi.

36 Na afei Ammon na no dɔm, nye ɔhen Limhi na no dɔm hɔn aperdzi ara nye dɛ wobefi Lamanfo nsa na woefi nkowaasom mu.