1 Ao e koro bukina bwa a oki ana botanaomata Rimwaai nakon ana kaawa Nibwaai, ao a manga maiu naba iai i nanon te rau.

2 Ao e koro bukina bwa i mwin boong aika a mwaiti ao a manga rikirake naba unin nanoia Reimwanaite irouia Nibwaite, ao a manga moanna n riaoan taian tia n taabo aika a mwaiti.

3 Ma a maaku n tiringia, ibukin te tuea are e a tia ni karaoia aia uea nakon Rimwaai; ma a batibooi tabaia, ma ni kaoti mwaakaia iaoia; ao a katokai uota aika a rawawata iaon nukaia, ao a kammwakuria n ai aroia aati ake aki tataetae—

4 Eng, a karaoaki bwaai aikai ni kabane bwa e aonga ni koro bukin ana taeka te Uea.

5 Ao ngkai e korakora rawawataia Nibwaite, ao akea te kawai are a na kona iai ni kamaiuaki mai nanon baia, bwa a katobibiaki irouia Reimwanaite.

6 Ao e koro bukina bwa a moana ngurengureia te botanaomata iroun aia uea ibukin korakaia; ao a tangiria bwa a na teirake ni kaaitaraia n te buaka. Ao a kakorakaia te uea n tangitangiia; mangaia ae e kariaia bwa a na karaoa are a kukurei nanoia iai.

7 Ao a manga botiia riki, ao a katokai aia bwai ni buaka, ao a kaaitaraia Reimwanaite bwa a na kaeia nako mai abaia.

8 Ao e koro bukina bwa a konaki irouia Reimwanaite, ao a kakerikakia, ao a tiringia aika a mwaiti mai buakoia.

9 Ao ngkai e a korakora te tang ma te bwaebwaeti i buakoia ana botanaomata Rimwaai, aine aika a mate buuia ibukiia buuia, naati mwaane ma aine ibukiia tamaia, ao taari ibukiia tariia.

10 Ngkai a mwaiti aine ake a mate buuia iaon te aba, ao a korakora tangiia man te bong teuana nakon te bong teuana, bwa e korakora maakakia Reimwanaite irouia.

11 Ao e koro bukina bwa e rikirake unin nanoia ake nikiraia ana botanaomata Rimwaai n tangitangiia irouia Reimwanaite; ao a mwananga riki n nako ni buaka, ma a manga konaki naba, ao a mwaiti riki aika a mate.

12 Eng, a manga mwananga riki te kateniua n tai, ao titebo naba mwiina; ao a manga oki naba ake a aki tiringaki nakon ana kaawa Nibwaai.

13 Ao a kamangoria n aiaron te bubu, ni kariaia rawawatan te tautoronaki, ni kariaia bwa a na kataereaki, ao ni kanakoaki nakon te tabo teuana ke teuana, ao ni karawawataki, n aron takun nanoia aia kairiribai.

14 Ao a karinanoia nakon are te kabanea n rinano; ao a kakorakora aia tataro nakon te Atua; eng, ni kabwanina aia bong n tataro nakon te Atua bwa e na kamaiuia man korakaia.

15 Ao e waeremwe te Uea n ongo aia tataro ibukin aia buakaka; ma e bon ongo te Uea aia tataro, ao e moana kamarauan nanoia Reimwanaite bwa a na kabebetea rawawataia; ma e nooria te Uea bwa e tuai n roko tain kamaiuakia man te tautoronaki.

16 Ao e koro bukina bwa a moanna ni kakabwaiaki iaon te aba teutana i mwin teutana, ao a moanna n rikirake uaan aia wiita, ma aia tiibu, ma aia kao, ao a aki manga taonaki n te baki.

17 Ngkai e a korakora mwaitia aine, nakon mwaitia mwaane; mangaia ae e tua te uea ae Rimwaai nakoia mwaane ni kabane bwa a na tibwaua aia bwai ibukin buokaia aine ake akea buuia ao ma natiia, bwa aonga n aki mate n te baki; ao a karaoa aio ibukina ngkai e korakora mwaitia ake a tia n tiringaki.

18 Ngkai a botaki ana botanaomata Rimwaai n te rabwata ae ti teuana n aron are a kona, ao a taurabwai aia wiita ma aia nanai ni man;

19 Ao e maroaa te uea n nako tinanikun oon te kaawa, ma e aki ngkana iai ana tautia i rarikina, bwa e maaku bwa rimwi e reke i nanon baia Reimwanaite.

20 Ao e tua bwa a riai ana botanaomata n taratarai aaba ake a katobibiaki iai, bwa ngkana e burenibwai ao a na kona n reke irouia taian ibonga ake a birinako n te rereua, ake a tia n anaia aia aine Reimwanaite, ao ni karika te kamaunaki ae korakora bwa e na riki nakoia.

21 Bwa a rang ni kan karekeia bwa a na katuaiia; bwa a roko n aban Nibwaai n te bong, ao a uotinako aia wiita ma aia bwai aika kakawaki; mangaia ae a karabaia n tataningaiia.

22 Ao e koro bukina bwa a bon akea te kakumekume imarenaia Reimwanaite ma ana botanaomata Rimwaai, ni karokoa te tai are e roko iai Amon ma tarina nakon abaia.

23 Ao te uea e mena i tinanikun oon te kaawa n te tai anne ma ana tautia ao e a kuneia Amon ma tarina; ao ibukina ngke e taku bwa ngaia ana ibonga Noa, mangaia are e tua bwa a na tauaki, ao a na kabaeaki, ao a na karinaki i nanon te umwa ni kaikain. Ao ngke ngaia ana ibonga Noa ao a na bon tia n tiringaki.

24 Ma ngke e a ataia bwa tiaki, ao bon tarina ngaia ae a tia n roko mai aban Taraemera, ao e a onrake n te kimwareirei.

25 Ngkai e a tia te uea ae Rimwaai ni kanakoia tabeman mwaane bwa a na kakaea Taraemera i mwaain rokon Amon; ma a aki kunea, ao a bua i nanon te rereua.

26 Ma e ngae n anne ao a kunea te aba are e a tia ni maekanaki; eng, te aba ae rawata iaona taian rii ni kaokao; eng, te aba ae e a tia ni kaainaki ao n tia ni ekakinako; ao ngaia, a taku bwa Taraemera ao a okira aban Nibwaai, ao a roko n tian te aba, tabeua te bong i mwaain rokon Amon.

27 Ao a uota te rongorongo n oki ma ngaia, ae aia rongorongo aomata ake a kunei riia; ao a koreaki iaon bwaatua aika biti.

28 Ao ngkai e onrake Rimwaai n te kimwareirei ngke e ongo mai iroun Amon ae iai ana bwai n tituaraoi te Atua iroun te uea ae Motiaea, are e kona iai n rairi taian koroboki; eng, ao e kimwareirei naba Amon.

29 Ma e taonaki Amon ma tarina n te nanokawaki ngkai a mwaiti tariia ake a tia n tiringaki;

30 Ao riki ibukin ae a tia te uea ae Noa ma ana ibonga ni kariaia te botanaomata aio bwa a na karaoi bure aika a mwaiti ma buakaka ni kaitaraa te Atua; ao a tang naba ibukin maten Abinataai; ao ibukin naba mwanangan Aramwa ma aomata ake a iria, ake a tia ni katea ana ekaretia te Atua rinanon korakoran ma mwaakan te Atua, ma te onimaki nakon taeka ake e a tia n taekin Abinataai.

31 Eng, a bon tang ibukin mwanangaia, bwa a aki ataia bwa a birinako nakea. Ngke a ataia ao a na bon kukurei n iria, bwa a tia naba ni karaoa te berita ae tabu ma te Atua bwa ana toro irouna ma ni kaawakin ana tua.

32 Ao ngkai i mwin rokon Amon, ao e karaoa naba te berita ae tabu te uea ae Rimwaai ma te Atua, ao a karaoia naba aika a mwaiti mai buakoia ana botanaomata, bwa ana toro irouna ao a na kaawakin ana tua.

33 Ao e koro bukina bwa a kukurei ni bwabetitoaki te uea ae Rimwaai ma angiia ana botanaomata; ma akea iaon abaia ae iai irouna te kariaiakaki mai iroun te Atua. Ao e aki kan karaoa aio Amon, ibukina ngkai e taku i nanona bwa te toro ngaia ae aki tau.

34 Mangaia ae n te tai arei ao a aki katea te ekaretia imarenaia, bwa a tataninga rokon Tamnein te Uea. Ngkai a rang n tangiria n riki n aiaron Aramwa ma tarina, ake a tia ni biri nako nanon te rereua.

35 A tangiria bwa a na bwabetitoaki bwa taan kakoaua ma te kakoaua bwa a tauraoi n toro ibukin te Atua ma nanoia ni kabane; ma a taona taina; ao e na manga taekinaki taekan aia bwabetito rimwi riki.

36 Ao ngkai e na kabaneaki te iango i aon Amon ma ana botanaomata, ma te uea ae Rimwaai ma ana botanaomata, ngke a karekea maiuia mai nanon baia Reimwanaite ma tautoronakia.