1 Ao e koro bukina bwa a bowi Amon ma te uea ae Rimwaai ma aomata ibukin aron karekean maiuia man te tautoronaki; ao a tua bwa a na botaki aomata ni kabane; ao a karaoa aio bwa aonga ni karekea bwanaia te botanaomata ae bwanin ibukin te bwai aio.

2 Ao e koro bukina bwa a aki kona ni kunea te kawai are a na kona iai ni kamaiuia man te tautoronaki, ma ti ngkana a uotia naba buuia ma natia, ma aia tiibu, ma aia kao, ma umwaia, ao ni mwananga nako nanon te rereua; bwa e rang ni korakora mwaitia Reimwanaite, mangaia are a aki kona ana botanaomata Rimwaai ni kaaitaraia, ngke a kataia n iangoa aron maiuia man tabekan te kabaang.

3 Ngkai e koro bukina bwa e mwananga Kiteon nako matan te uea, ao e kangai nakoina: Ngkai te uea, ko a tia n ongo nakon au taeka n taai aika a mwaiti n tain ara bobobuaka ma tarira, aika Reimwanaite.

4 Ao ngkai te uea, e koaua bwa I a tia n riki bwa te toro ae kakawaki ngai, ke e koaua bwa ko a tia n ongo n au taeka n taai aika a nako, ao a tia ni bongana nakoim, ao ibukin anne I tangiria bwa ko na ongo n au taeka n te tai aio, ao N na riki bwa am toro ao N na kamaiuia te botanaomata aio man te tautoronaki.

5 Ao e kariaia te uea bwa e na taetae. Ao e taku Kiteon nakoina:

6 Taraia te mataroa are mai buki, are man te oo are i buki, are i bukin te kaawa. Reimwanaite, ke tautia ake Reimwanaite, a kookoro ni manging n te tairiki; mangaia ae ti na kanakoa te taeka nakoia aomata ni kabane bwa a na ikotaki ma aia tiibu ma aia kao, bwa aonga ni kairia nako nanon te rereua n te tairiki.

7 Ao N na nako n ira am baire n anga te kabanea n angabwai ni wain nakoia Reimwanaite, ao a na koro ni manging; ao ti na otinako n te kawai ni karaba i angamaingin aia tabo ngkana a koro ni manging ao ni matu nako.

8 Mangaia are ti na otinako ma buura ao ma natira, ara tiibu, ma ara kao nako nanon te rereua; ao ti na ri rarikin aban Tiirom.

9 Ao e koro bukina bwa e ongo te uea n ana taeka Kiteon.

10 Ao e tua te uea ae Rimwaai nakoia ana botanaomata bwa a na botiia aia tiibu; ao e kanakoa te angabwai te wain nakoia Reimwanaite; ao e kanakoa riki te wain, bwa te bwai n tangira nakoia; ao a kangaeia ni mooi n te wain are kanakoa nakoia te uea ae Rimwaai.

11 Ao e koro bukina bwa a mwananga ana botanaomata te uea ae Rimwaai ngke e a tairiki nako nanon te rereua ma aia tiibu ao aia kao, ao a rirarikin aban Tiirom i nanon te rereua, ao a kabwakeea kawaia ni kaineta Taraemera, ao a kairaki iroun Amon ma tarina.

12 Ao a uoti aia koora, ma aia tirewa, ma aia bwai aika a kakawaki, ake a konai ni uoti, ao aia tianaki naba, nako nanon te rereua; ao a waakina mwanangaia.

13 Ao i mwin boong aika a mwaiti i nanon te rereua ao a roko i aban Taraemera, ao a kaitibo ma ana botanaomata Motiaea, ao a riki bwa kain ana botanaomata.

14 Ao e koro bukina bwa e butimwaia Motiaea ma te kimwareirei; ao e butimwai naba aia rongorongo, ao taian rongorongo naba ake a tia ni kuneaki irouia ana aomata Rimwaai.

15 Ao ngkai e koro bukina bwa ngke a nooria Reimwanaite ae a tia n nako ana botanaomata Rimwaai man abaia i nanon te tairiki, ao a kanakoa te taanga nako nanon te rereua bwa a na kakaaia;

16 Ao ngke a tia ni kakaaia i nanon uoua te bong, ao a aki kona n tou mwiin mwanekaia; mangaia are a bua i nanon te rereua.