1 Ngkai Aramwa i mwin kaongoana iroun te Uea taekaia ana taanga ni buaka te uea are Noa aika a na ekinakoia, ao n tia ni kaongoia naba ana botanaomata, mangaia are a botiia aia tiibu, ao a uoti aia wiita, ao a mwananga nakon te rereua i mwaain rokoia ana taanga te uea are Noa.

2 Ao e kakorakoraia te Uea, bwa aonga n aki reke irouia ana botanaomata te uea are Noa ao n tiringaki.

3 Ao a birinako i nanon waniua te bong nakon te rereua.

4 Ao a roko n te aba, eng, te aba ae moan te tamaroa man aoraoi, te aba ae moan te itiaki ranna.

5 Ao a katei umwaia, ao a moana ribanakin tanona, ao a moani katean taian kateitei; eng, a rang ni beku mwaaka, ao a kakorakoraia ni mwakuri.

6 Ao a tangiria te botanaomata bwa e na riki Aramwa bwa aia uea, bwa e korakora tangirana irouia ana botanaomata.

7 Ma e kangai nakoia: Taraia, e aki riai bwa e na iai ara uea; bwa e kangai te Uea: Ko na tai karieta te aomata temanna iaon temanna, ke e aki riai temanna n taku bwa e rietata riki nakon temanna; mangaia ae I tuangkami bwa e aki riai bwa e na iai ami uea.

8 E ngae n anne ao ngke arona bwa kam kona ni karekeia aomata aika a tau bwa ami uea ao e riai bwa e na iai ami uea.

9 Ma uringa ana buakaka te uea are Noa ma ana ibonga; ao ngai naba I a tia ni mwane n te bwai ni kamwane, ao ni karaoi bwaai aika a mwaiti aika a bati n ribaki imatan te Uea, ake a karika iai karaoan te rairannano irou ae korakora;

10 E ngae n anne, i mwin te korakai ae mwaiti, ao e a ongo au tataro te Uea, ao e kaekai au tataro, ao e karikai bwa te bwai ni mwakuri i nanon baina are e kairingkami iai nakon ataakin ana koaua.

11 E ngae n anne, ao I aki kakatonga n te bwai aio, bwa I aki tau bwa N na kakatonga iai.

12 Ao ngkai N na tuangkami, kam a tia ni bwainikirinaki iroun te uea are Noa, ao n tautoronaki irouna ma ana ibonga, ao ni kairaki irouia nakon karaoan te buakaka; ngaia ae kam kabaeaki ni kabaebaen te buakaka.

13 Ao ngkai kam a tia ni kamaiuaki ni mwaakan te Atua man taian kabaebae aikai; eng, ao mai nanon bain naba te uea are Noa ma ana botanaomata, ao mai nanon naba kabaebaen te buakaka, ma I tangiria bwa kam na kamatoaingkami i nanon te koaua aio are ngaia are kam a tia ni kainaomataki iai, ao kam na tai onimakina te aomata temanna bwa e na uea i aomi.

14 Ao tai onimakina naba temanna bwa e na riki bwa ami tia reirei ke ami minita, ma ti ngkana ana aomata te Atua, ae e nakonako ni kawaina, ao e tau ana tua.

15 Ao aikai ake e reireia iai ana botanaomata Aramwa, bwa e riai temanna n tangira raona n aiaron tangirana i bon irouna, ao e na akea te itabaraara imarenaia.

16 Ao ngkai, e riki Aramwa bwa aia ibonga ae rietata, are e riki bwa te tia katea naba aia ekaretia.

17 Ao e koro bukina bwa akea are kona ni karekea te kariaiakaki ni kabwarabwara ke n reirei ma ti mai irouna are bon mai iroun te Atua. Mangaia ae e katabuia aia ibonga ni kabane ma aia tia reirei ni kabane; ao akea ae katabuaki, ma ti mwaane aika a tau.

18 Mangaia ae a tarataraia aia botanaomata, ao a kamwarakeia ni bwaai aika a kaineti ma te raoiroi.

19 Ao e koro bukina bwa a rikirake kabwaiaia iaon te aba; ao a arana te aba arei bwa Eram.

20 Ao e koro bukina bwa a mwaiti aika a kariki ao e rikirake kakabwaiaia iaon te aba ae Eram; ao a katea te kaawa, ao a aranna bwa ana kaawa Eram.

21 E ngae n anne ao e nooria te Uea bwa e riai ni katuaia ana botanaomata; eng, e katai taotaonakin nanoia ma aia onimaki.

22 E ngae n anne—ane katuka ana onimaki irouna ao ngaia are e na uotaki rake n te kabanea ni bong. Eng, ao e a koaua naba aio nakoia te botanaomata aio.

23 Bwa taraia, N na kaotia nakoimi ae kam a tia n tautoronaki, ao akea ae kona ni kamaiungkamibwa bon ti te Uea ae Atuami, eng, are Atuan Aberaam ma Itaaka ma Iakobwa.

24 Ao e koro bukina bwa e kamaiuia, ao e kaota mwaakana ae moan te korakora nakoia, ao e korakora kimwareireia.

25 Bwa taraia, e koro bukina bwa n aia tai ni maeka i aban Eram, eng, i nanon te kaawa ae Eram, n tabe n ribana rarikin aia kaawa, ao e a kaoti aia taanga Reimwanaite iaon tian abaia.

26 Ngkai e koro bukina bwa a birinako tarin Aramwa man aia tawaana, ao a botaki i nanon te kaawa ae Eram; ao a rang ni maaku ibukina ngkai a kona n nooriia Reimwanaite ake a kaoti.

27 Ma e kawaria Aramwa ao e tei i buakoia, ao e kaungai nanoia bwa a riai n aki maaku, ma a riai n uringa te Uea ae Atuaia ao e na kamaiuia.

28 Mangaia ae a kain maakuia, ao a tataro nakon te Uea bwa e na kamaraui nanoia Reimwanaite, bwa a na aki tiringia, ma buuia, ao ma natia.

29 Ao e koro bukina bwa e kamarau nanoia Reimwanaite te Uea. Ao e mwananga Aramwa ma tarina n taenikai nako nanon baia; ao a taua aban Eram Reimwanaite bwa abaia.

30 Ngkai aia taanga Reimwanaite ake a rimwia ana botanaomata te uea are Rimwaai, a bon bua i nanon te rereua i nanon boong aika a mwaiti.

31 Ao taraia, a kuneia ana ibonga te uea are Noa, n te tabo ae aranna bwa Amuron; bwa a maeka iaon te tabo ae Amuron ao n unika aona.

32 Ngkai aran aia mataniwi ibonga bon Amuron.

33 Ao e koro bukina bwa e bubuti Amuron nakoia Reimwanaite; ao e kanakoia buuia, ake bon natia Reimwanaite ake aine, bwa a na bubuti nakoia mwaaneia, bwa a na aki tiringaki buuia.

34 Ao a nanoangaia Amuron ma tarina Reimwanaite, ao a aki tiringia ibukiia buuia.

35 Ao Amuron ma tarina a botaki ma Reimwanaite, ao a bon mwaamwananga i nanon te rereua ni kakaea aban Nibwaai ngke a kunea naba aban Eram, are kaainaki iroun Aramwa ma tarina.

36 Ao e koro bukina bwa a berita Reimwanaite nakon Aramwa ma tarina, bwa ngkana a kaota nakoia te kawai nakon aban Nibwaai ao a na kaoka nakoia maiuia ao inaomataia.

37 Ma ngke e a tia Aramwa ni kaota nakoia te kawai nakon aban Nibwaai ao aki kamatoa aia berita Reimwanaite; ma a kateia tautia ni katobibia aban Eram, bwa a na tarataraia Aramwa ma tarina.

38 Ao nikiraia a mwananga nakon aban Nibwaai; ao tabeman mai buakoia a oki nako aban Eram, ao a kairia buuia ma natia tautia ake a tiku n te aba.

39 Ao e kariaia aia uea Reimwanaite bwa e na riki Amuron bwa te uea man tautaeka iaoia ana botanaomata, ake a maeka iaon Eram; ma a na akea mwaakana ni karaoa ae kaitara ma ana baire aia uea Reimwanaite.