1 Ao e koro bukina bwa e rikirake tangiran Amuron iroun aia uea Reimwanaite, e kariaia aia uea Reimwanaite bwa e na riki ma tarina bwa taian tia reirei ibukiia ana botanaomata, eng, ao ibukiia naba te botanaomata ake a maeka iaon aban Tiemron, ma aban Tiirom, ao ma aban Amuron.

2 Bwa a bon tia Reimwanaite n reke irouia aaba aikai; mangaia ae e a tia aia uea Reimwanaite n rineia taian uea ibukiia aaba aikai.

3 Ao ngkai aran aia uea Reimwanaite bon Reimwan, are ingoanaki mai iroun tamana; mangaia ae e aranaki bwa te uea ae Reimwan. Ao e uea iaoia aomata aika moan te mwaiti.

4 Ao e rineia tarin Amuron bwa tia reirei n aaba ni kabane ake a tautaekanaki irouia ana botanaomata; mangaia ae e a reireiaki aia taetae Nibwaite i buakoia aia botanaomata Reimwanaite ni kabane.

5 Ao bon aomata ngaia aika a itangitangiri imarenaia; ma a aki ataa taekan te Atua; ao tarin Amuron a bon aki naba reiakin bwaai aika a kaineti ma te Uea ae Atuaia, ke ana tua Mote; ke n reireinia kanoan ana taeka Abinataai.

6 Ma a reireia bwa a na kaawakin aia rongorongo, ao bwa a na kokoroboki imarenaia.

7 Mangaia ae e a moanna n rikirake kaubwaia Reimwanaite, ao a moana te iokinibwai imarenaia ao a riki ni korakora, ao n riki bwa aomata aika a kamwamwane ma ni wanawana, n aron rabakaun te aonaba, eng, aomata aika moan te kamwamwane, aika a kukurei ni bwaai aika a buakaka, te iraa, ma tiaki nakoia oin tariia.

8 Ao e koro bukina bwa e a moanna Amuron ni kabongana mwaakana i aon Aramwa ma tarina, ao e moana bwainikirinana, ao e tua nakoia natina bwa a na bwainikirinia natia.

9 Bwa Amuron e kinaa Aramwa, ae bon ngaia temanna mai buakoia ana ibonga te uea, ao bwa ngaia temanna are kakoauai ana taeka Abinataai ao e kaeaki nako iroun te uea, mangaia are e un irouna; bwa e mena i aan te uea are Reimwan, ma e kabongana te mwaaka iaoia, ao e kakorakorai aia mwakuri, ao e kateia taan kammwakuri iaoia.

10 Ao e koro bukina bwa moan te korakora rawawataia ao a kakorakora aia tataro nakon te Atua.

11 Ao e tua Amuron bwa a na katoka aia tataro; ao e kateia taian tautia bwa a na tarataraia, ao ane kuneaki n tataro nakon te Atua e na tiringaki.

12 Ao Aramwa ma ana botanaomata a aki kabaibati bwanaia n tataro nakon te Uea ae Atuaia, ma a tataro i nanoia nakoina; ao e atai aia iango ake a mena i nanoia.

13 Ao e koro bukina bwa e roko irouia bwanaan te Uea i nanon aia tai n rawawata, ae kangai: Tabeki atuumi ao kabeebetei nanomi, bwa I ataa te berita ae tabu are kam a tia ni karaoia nakoiu; ao N na berita n ae tabu ma au botanaomata ao N na kamaiuia man te tautoronaki.

14 Ao N na kabeebetei naba taian uota ake a katokaki iaon angami, bwa kam na aki kona n namakin iaon nukami, n ami tai n tautoronaki; ao N na karaoa aio bwa kam aonga n riki bwa taan kakoaua ibukiu i mwin aio, bwa kam aonga n ataa te koaua bwa Ngai, te Uea ae te Atua, I bon kaakawariia au botanaomata i nanon aia tai n rawawata.

15 Ao ngkai e koro bukina bwa taian rawawata ake a katokaki iaon Aramwa ma tarina a kabeebeteaki; eng, ao e kakorakoraia te Uea bwa a na kona n uota uotaia ma te beebete, ao a karaoi nanon te Uea ma te kukurei ao te taotaonakinnano.

16 Ao e koro bukina bwa moan te korakora aia onimaki ma aia taotaonakinnano ao e a manga roko naba bwanan te Uea nakoia ni kangai: Kam na kabebeteaki, bwa n ningabong ao N na kamaiuingkami man te tautoronaki.

17 Ao e taku nakon Aramwa: Ko na kairia te botanaomata aio, ao N na nako ma ngkoe ni kamaiuia te botanaomata aio man te tautoronaki.

18 Ao e koro bukina bwa Aramwa ma ana botanaomata a botiia aia tiibu n te tairiki, ma aia wiita; eng, ao e bon bane aia tairiki arei ni botiia aia tiibu.

19 Ao ngke e a ingabong ao te Uea e a kamwanionakoia Reimwanaite ni matu, eng, ao a bane naba ni matu aia taan kammwakuri.

20 Ao a mwananga Aramwa ma ana botanaomata nako nanon te rereua; ao ngke e a bwanin aio bong ni mwananga ao a katei umwaia i nanon te mwarua, ao a arana te mwarua bwa Aramwa, ibukina ngkai e kaira kawaia nako nanon te rereua.

21 Eng, ao i nanon te mwarua are Aramwa ao a tataro ni kaitau nakon te Atua ngkai e a tia n nanoangaia, ma ni kabeebetei uotaia, ao ni kamaiuia man te tautoronaki; bwa a tia n tautoronaki, ao akea ae kona ni kamaiuia ma bon ti te Uea ae Atuaia.

22 Ao a anga aia kaitau nakon te Atua, eng, aia mwaane ni kabane ma aia aine ni kabane ma natia ni kabane ake a kona n taetae a bane n tabeki bwanaia n nebo nakon Atuaia.

23 Ao ngkai e taku te Uea nakon Aramwa: Kawaekoako ma te botanaomata aio ni kitana te tabo aio, bwa a tia n uti Reimwanaite ao a rimwingkami; mangaia ae kitana te tabo aio, ao N na katokia Reimwanaite n te mwarua aio bwa a na aki manga reitanako rimwiakia te botanaomata aio.

24 Ao e koro bukina bwa a kitana te mwarua, ao a reita mwanangaia nako nanon te rereua.

25 Ao i mwin tebwi ma uoua te bong i nanon te rereua ao a roko n aban Taraemera; ao e butimwaia te uea ae Motiaea ma te kimwareirei.