1 Na ɔbaa dɛ Lamanfo hɔn hen no n’enyi gyee Amulon ho; dɛm ntsi, Lamanfo hɔn hen no maa kwan dɛ wɔnyɛ ɔno na n’enuanom no akyerɛkyerɛfo wɔ no nkorɔfo no do, nyew, wɔ dɔm a wɔwɔ Shemlon asaase do, nye Shilom asaase do, nye Amulon asaase do no mpo.

2 Osiandɛ Lamanfo no afa dɛm nsaase no nyinara; dɛm ntsi Lamanfo hɔn hen no dze ahemfo sisii dɛm nsaase no nyinara do.

3 Na afei Lamanfo hɔn hen no ne dzin dze Laman, wɔdze n’egya ne dzin too no; dɛm ntsi wɔfrɛɛ no ɔhen Laman. Na odzii hen wɔ dɔmtutuw do.

4 Na ɔyɛɛ Amulon n’enuanom no akyerɛkyerɛfo wɔ asaase biara a no nkorɔfo wɔ do no do; na dɛm maa wɔhyɛɛ ase dze Nephi kasa kyerɛkyerɛɛ Lamanfo dɔm no nyinara.

5 Na wɔyɛ nkorɔfo a wɔdodɔ hɔnho nkorkor; naaso wonnyim Nyame; afei so Amulon n’enuanom no annkyerɛ hɔn biribiara a ɔfa Ewuradze hɔn Nyankopɔn ho, anaa Moses mbra no; nna wɔannkyerɛkyerɛ hɔn Abinadi ne nsɛm no so;

6 Mbom wɔkyerɛɛ hɔn dɛ wɔnkyerɛw hɔnho nsɛm nsie, na wɔnkyerɛkyerɛw hɔn ho nkorkor.

7 Na dɛm maa Lamanfo no hɔn sika hyɛɛ ase dɛ ɔrodɔr, na wɔhyɛɛ ase dɛ wɔnye hɔn ho ridzi gua na wɔyɛɛ akɛsefo, na wɔbɛyɛɛ ndabrabafo nye wiadze mu enyansafo, nyew, nyimpa ndabrabafo a hɔn enyigye wɔ emumuyɛdze ahorow nyinara mu nye epoobɔ ho, mbom wɔammfa iyinom annyɛ hɔnankasa hɔn enuanom.

8 Na afei ɔbaa dɛ Amulon hyɛɛ ase dɛ ɔrekyerɛ no tum wɔ Alma nye n’enuanom do, na ɔhyɛɛ ase tseetsee no, na ɔmaa ne mba kwan dɛ wɔntseetsee hɔn mba.

9 Osiandɛ Amulon nyim Alma, dɛ nkyɛ ɔyɛ ɔhen n’asɔfoe no mu kor, na dɛ ɔno na ɔgyee Abinadi ne nsɛm no dzii ma woyii no edzi fii ɔhen no enyim, na dɛm ntsi, no bo fuuw no, na ɔno ɔhyɛ ɔhen Laman n’ase, naaso ɔkyerɛɛ no tum wɔ hɔn do, na ɔdze edwuma soaa hɔn, na ɔmaa edwuma ahwɛdofo hwɛɛ hɔn do.

10 Na ɔbaa dɛ hɔn amandzehu yɛɛ kɛsenara ma wɔhyɛɛ ase sũu dzendzenndzen kyerɛɛ Nyankopɔn.

11 Na Amulon hyɛɛ hɔn dɛ wonngyaa hɔn sufrɛ no; na ɔmaa aweɔmfo weɔɔn hɔn ama sɛ wohu dɛ obi refrɛ Nyame a woeku no.

12 Na Alma nye no nkorɔfo no amma hɔn ndze do ammfrɛ Ewuradze hɔn Nyankopɔn, mbom wohuee hɔn akoma maa no; na ɔnodze onyim hɔn akoma mu adwendwen.

13 Na ɔbaa dɛ Ewuradze ne ndze baa hɔn nkyɛn wɔ hɔn amandzehu mu see dɛ: Hom mma hom etsir do na hom nya awerɛkyekyer, na minyim ahyɛmu a hom edzi akyerɛ me; na menye mo nkorɔfo bedzi ahyɛmu na meeyi hɔn efi nkowaasom mu.

14 Na mebɛma adzesoadze a wɔdze egu hom abatsir do no ayɛ har a hom renntse mpo dɛ ɔda hom ekyir, wɔ ber a hom wɔ nkowaasom mu mpo; na iyi na mebɛyɛ ama hom egyina ayɛ adasefo ama me ndaamba, na ama hom ehu nokwar no dɛ Emi, Ewuradze Nyankopɔn, mesera mo nkorɔfo wɔ hɔn amandzehu mu.

15 Na afei ɔbaa dɛ adzesoadze a wɔdze too Alma nye n’enuanom do no yɛɛ har; nyew, Ewuradze hyɛɛ hɔn dzen ama woeetum asoa hɔn adzesoadze no na wɔammberɛ, na enyigye mu na abotar na wɔdze gyaa hɔnho mu maa Ewuradze ne pɛ.

16 Na ɔbaa dɛ hɔn gyedzi na hɔn abotar yɛɛ kɛsenara ma Ewuradze ne ndze baa hɔn nkyɛn bio, dɛ: Hom ndzi dɛw na adze kyee no mebeyi hom efi nkowaasom mu.

17 Na ɔsee Alma dɛ: Ɔwo ibedzi nkorɔfo yi enyim akɔ, na menye hom bɔkɔ na mibeyi nkorɔfo yi efi nkowaasom mu.

18 Afei ɔbaa dɛ Alma nye no nkorɔfo no boaboaa hɔn nguankuw ano, na ɔnye hɔn ewifua so; nyew, adzesaaber no mu nyinara mpo nna wɔreka hɔn nguankuw boaboa ano.

19 Na adzekyee no Ewuradze maa nda heii tɔɔ Lamanfo no do, nyew, nye hɔn ndwuma do ahwɛfo no nyinara do; ma wɔdaa heii.

20 Na Alma nye no nkorɔfo no fii hɔ kɔr sar no do; na ber a wotuu hɔn kwan da no nyinara mu no, wosisii hɔn ntamadan wɔ bɔnsa bi mu, na wɔtoo bɔnsa no dzin Alma, osiandɛ ɔno na odzii hɔn kan wɔ sar kwan no do.

21 Nyew, na wɔ Alma bɔnsa mu hɔ no nna wɔdze hɔn ndaase maa Nyankopɔn osiandɛ oehu hɔn mbɔbɔr, na ɔmaa hɔn adzesoadze yɛɛ har, na oeyi hɔn efi nkowaasom mu, na wɔwɔ nkowaasom mu no, obiara enntum ennyi hɔn, gyedɛ Ewuradze hɔn Nyankopɔn nko.

22 Na wɔdze ndaase maa Nyankopɔn, nyew, hɔn mbanyin nyinara, na hɔn mbasiafo nyinara, nye hɔn mbofraba a wotum kasa nyinara maa hɔn ndze do wɔ hɔn Nyankopɔn n’ayɛyi mu.

23 Na afei Ewuradze see Alma dɛ: Ma wo ho nyɛ har na nye nkorɔfo yi mfi asaase yi do, na Lamanfo no enyanyan na woritsiw hom; dɛm ntsi hom mfi asaase yi do, na mebɛma Lamanfo no esanka wɔ bɔnsa yi mu amma woenntsiw nkorɔfo yi annkɔ ekyir bio.

24 Na ɔbaa dɛ wofii bɔnsa no mu, na wosii mu dze faa sar no do.

25 Na wɔkɛhyɛɛ sar no do bɛyɛ dadu nda ebien ekyir no, woduu Zarahemla asaase do; na ɔhen Mosiah so dze enyigye gyee hɔn.