1 Na tukun ma inge puhs na sin fihl kapwack se inge tiac kahlwem ke kahs lal tohkohsrah Benjamin, elos srwackna tuhlihk srihsrihk ke pacl se el sramsram nuh sin mwet lal; ac elos tiac luhlahlfongi ke ma mahtuh luhn pahpah tuhmwaclos.

2 Elos tiac luhlahlfongi ke ma suc sruhmuhnyuck ke moulyak luhn mwet misac, elos tiac luhlahlfongi pac ke tuhkuh luhn Kraist.

3 Ac inge ke srihpen suhlahlahlfongi lalos elos tiac kahlwem ke kahs luhn God; ac insiaclos kwekwe.

4 Ac elos tiac ke pacptaislac; tiac luhngse weacng alu uh pac. Ac elos mwet srisrilac ke luhlahlfongi lalos, ac tari muhta na wel fahfahlac, finne ke moul in ikoac lalos ac moul koluk; tuh elos tiac pahng nuh sin Leum God lalos.

5 Ac inge ke kol lal Mosiah ah elos tiac puhs tiac sun tahfuh oacna mwet luhn God; tuhsruhk ke srihpen oasr lalos inmahsrlon mwet wiyaclos elos puhsweni.

6 Tuh tukun ma inge elos kiyacpwelah mwet pucspucs ke kahs in ahkluhng lalos, suc oasr ke alu uh, ac elos oruh nuh selos in oruh ma koluk pucspucs; ohinge tuh oacna in ma se nuh selos suc oraclah ma koluk, suc oasr ke alu uh, in kaiyuck sin alu uh.

7 Ac tukun ma inge elos utuckuh nuh yurun mwet tol, ac utucklac nuh yurun mwet tol sin mwet luti; ac mwet tol elos usaclos nuh yohrohl Alma, suc pa mwet tol fuhlwact.

8 Inge tohkohsrah Mosiah el sang nuh sel Alma wal ke alu uh.

9 Ac tukun ma inge Alma el tiac etuh kaclos; tuhsruhk puhs mwet loh lainuhlos; ahok, mwet elos tu ac fahkwack ke ma koluk pucspucs lalos.

10 Inge wacngihn kuhtwena ma sikyak met ke alu uh; ohinge Alma el elyah in nguhnal, ac el oruh tuh elos in utucklac nuh yohrohl tohkohsrah.

11 Ac el fahk nuh sel tohkohsrah: Liye, puhs mwet suc kuht use nuh yurum, suc ahkkolukyeyuck sin mwet wiyaclos; ac elos utucklac ke kain in ma koluk. Ac elos tiac auliyak ke ma koluk lalos; ke ma inge kuht usaclosme nuh yurum, tuh kom in nuhnuhnkwaclos fal nuh ke orekma koluk lalos.

12 Tuh tohkohsrah Mosiah el fahk nuh sel Alma: Liye, ngwac tiac nuhnuhnkwaclos; ohinge ngwac usacltahloht nuh in poum in nuhnuhnkweyuck.

13 Ac inge nguhn lal Alma sifil elyah; ac el som ac siyuck sin Leum ke ma el fah oruh ke ma se inge, tuh el sahngweng tuh el ac oruh stuhuh ye muhtuhn God.

14 Ac tukun ma inge tukun el okwaclah nguhnal nohfohn nuh sin God, puhsren Leum tuhkuh nuh yohrohl, fahk:

15 Insewowo nuh sum, Alma, ac insewowo nuh selos suc pacptaislac ke kof luhn Mormon. Kowos insewowo ke srihpen kwacfeacng in luhlahlfongi lowos ke kahs nuhkwewa lal Abinadi mwet kuhlwacnsap Luhk.

16 Ac insewowo nuh selos ke srihpen fahfahlac luhlahlfongi lalos ke kahs muhkwena suc kom sruhmuhn nuh selos.

17 Ac insewowo nuh sum ke srihpen kom muhsahelah sie alu inmahsrlon mwet inge; ac elos muhsahyak, ac elos fah mwet Luhk.

18 Ahok, insewowo mwet inge suc kena in us Inek; tuh Inek elos fah pahngon; ac elos ma Luhk.

19 Ac ke srihpen kom siyuck Sihk ke mwet ma oraclah ma koluk, kom insewowo.

20 Kom mwet kuhlwacnsap Luhk; ac Nga olwelah nuh sum tuh kom fah eis moul ma pahtpaht; ac kom fah kuhlwacnsuhpweyuc ac som ke Inek, ac oracni nuh sie sip Nuhtihk.

21 Ac el suc fah lohng Puhsrwek fah sip Nuhtihk; ac kom fah isacl nuh ke alu uh, ac Nga fah oacyacpac isacl.

22 Tuh liye, pa inge alu Luhk; el suc pacptaislac fah pacptaislac nuh ke auliyak. Ac el suc kom eis fah luhlahlfongi ke Inek; ac Nga fah sukohsohk in nuhnakmuhnahs nuh sel.

23 Tuh Nga pa eis nuh feik ma koluk luhn facluh; tuh Nga pa oracloslac; ac Nga pa sang nuh sel suc luhlahlfongi nuh ke sahflah sie acn ke lwacpo lwacyot Luhk.

24 Tuh liye, ke Inek elos fah pahngonyuck; ac fin elos Etweyuc elos fah tuhkuh, ac fah eis sie acn ne tok ma pahtpaht ke lwacpo lwacyot Luhk.

25 Ac ma inge fah sikyak tuh ke ukuk ahkluo fah ukuki na elos suc tiac etweyuc fah tuhkuh ac fah tu ye Muhtuhk.

26 Ac na elos fah etuh lah Nga pa Leum God lalos, Nga pa Mwet in Molwelah lalos; tuhsruhk elos fah tiac moliyucklac.

27 Ac na Nga fah fahk nuh selos lah Nga tiac etwaclos; ac elos fah som nuh ke e wacngihn sahflahiyac ma ahkoeyucklac nuh sin devil ac lipufacn lal.

28 Ohinge Nga fahk nuh sum, tuh el suc fah tiac lohng Puhsrwek, el pacna fah tiac eis alu Luhk, tuh Nga fah tiac eisacl ke lwen sahflah.

29 Ohinge Nga fahk nuh sum, som; ac el na suc oruh ma koluk lainyuc, Nga fah nuhnuhnkwacl fal nuh ke ma koluk el oraclah uh; ac fin el taltal ke ma koluk lal ye motom ac Nga, ac auliyak ke pwacyeiyacn insiacl, kom fah nuhnakmuhnahs nuh sel, ac Nga fah oacyacpac nuhnakmuhnahs nuh sel.

30 Ahok, ac mwet Luhk fin kwacna auliyak Nga fah nuhnakmuhnahs nuh selos ke ma koluk lalos ma sang lainyuc.

31 Ac kom fah oacyacpac nuhnakmuhnahs nuh sin sie sin sie ke tahfonglac lalos; tuh pwacyena Nga fahk nuh suwos, el suc tiac nuhnakmuhnahs nuh sin mwet tuhlan lal ke el fahk muh el auliyak, el fah utuckuh nuh ke kuhnausyucklac.

32 Inge Nga fahk nuh sum, som; ac kuhtwena mwet suc fah tiac auliyak ke ma koluk lal el oacyacpac fah tiac oacwaclah inmahsrlon mwet Luhk; ac ma se inge fah akihlenyuck ke pacl se inge fahlac.

33 Ac tukun ma inge ke Alma el lohng kahs inge el suhmuhslah tuh elan us, ac tuh elan kuh in nuhnuhnkuh mwet ke alu sac fal nuh ke masap luhn God.

34 Ac tukun ma inge tuh Alma el som ac nuhnuhnkwaclos suc oasr ma koluk la, fal nuh ke kahs luhn Leum.

35 Ac el na suc auliyak ke ma koluk lalos ac taltal kac, elos fah weacng mwet ke alu uh.

36 Ac elos ma tiac taltal ke ma koluk lalos ac auliyak ke ma suhfal lalos, elos fah tiac oacwaclah inmahsrlon mwet ke alu uh, ac inelos fah iyucklac.

37 Ac tukun ma inge tuh Alma el ahkfahsrye mukwikwi nuhkwewa luhn alu uh; ac elos muhtwacwacack in sifil eis mislac ac in kapkapwack fahfahlac ke mukwikwi luhn alu uh, fahsryang nuh yurun God, eis mwet pucspucs, ac pacptaiselah mwet pucspucs.

38 Ac inge ma inge nuhkwewa Alma ac mwet kuhlwacnsap lal oruh nuh selos suc oasr ke alu uh, kwacfeacng nohfohn, luti kahs luhn God ke ma nuhkwewa, kweokkihn mwe kweok nuhkwewa, koaseyuck sin elos suc tiac ma ke alu luhn God.

39 Ac elos kai mwet wiyaclos; ac elos oacyacpac kaiyuck, mwet nuhkwewa ke kahs luhn God, fal nuh ke ma koluk lal, kuh ke ma koluk suc el oraclah, sapkihnyuck sin God in pruhe tiac tui, ac in sang kuloh ke ma nuhkwewa.