1 Ao e koro bukina bwa te bwainikirinaki are karaoaki nakon te ekaretia mai irouia ake a aki kakoaua e rikirake ni korakora ao a moanna ni ngurengure kaain te ekaretia, ao a tangitang nakoia aia mataniwi ibukin aio; ao a tangitang nakon Aramwa. Ao e uotarake te tang aio Aramwa nakon aia uea ae Motiaea. Ao e maroro Motiaea ma ana ibonga ibukina.

2 Ao e koro bukina bwa e kanakoa ana taeka te uea ae Motiaea ni kabwanina aon te aba bwa a na akea te aomata ae aki kakoaua ae e na bwainikirinia aomata ake kaain ana ekaretia te Atua.

3 Ao e a buti nako te tua nakoia ekaretia ni kabane bwa akea te bwainikirinaki imarenaia, ao e na reke te boraoi i marenaia aomata ni kabane;

4 E na riai n aki uruakaki te rau n te kamoamoa ke te kainikatonga; bwa e riai te aomata nako n iangoa raona n aron iangoana i bon irouna, ni mwakuri ma oin korakoraia ibukin maiuna.

5 Eng, ao a riai aia ibonga ma aia tia reirei ni kabonganai korakoraia ibukin maiuia, n taainako ma ti n tain te aoraki, ke n tain kainnanoakia; ao ni karaoan bwaai aikai, ao a korakora n reke irouia ana akoi te Atua.

6 Ao e a rikirake te rau iaon te aba; ao a rikirake mwaitia aomata, ao a moanna ni kabuta aon te aonaba, eng, i meang ao i maiaki, i mainiku ao i maeao, a katei kaawa aika a korakora ma aika a uarereke ni katabwanina te aba.

7 Ao e kawariia te Uea ao e kakabwaiaia, ao a riki bwa te botanaomata ae bubura ma ni kaubwai.

8 Ngkai natin Motiaea mwaane bon raoia aika a aki kakoaua; ao raoia bon natin Aramwa temanna, ae arana Aramwa, n ingoana tamana; ma e riki bwa te aomata ae moan te buakaka ao tia taromauri boua. Bon te aomata ngaia ae baati n taetae, ao e taekina te kewe nakoia aomata; mangaia ae e kairia aika a mwaiti bwa a na katotongnga ni karaoi buakaka ake e a tia ni karaoi.

9 Ao e riki bwa te bwai ni katabetabe ibukin butiraoin ana ekaretia te Atua; ao e anai nanoia aomata; ao e karika te kauntaeka imarenaia aomata; are e a karekea iai ana tai ana kairiribai te Atua ni kabongana mwaakana iaoia.

10 Ao e koro bukina bwa ngke e waaki ni kataia ni kamauna ana ekaretia te Atua, bwa e koaua ae mwakuri ni karaba ma natin Motiaea mwaane ni kataia ni kamauna te ekaretia, ao ni kairia nako ana botanaomata te Uea, ni kaitaraa ana tua te Atua, ke are e taekinna te uea—

11 Ao n aron are I taekinna nakoimi, ngke a tabe ni waaki ni kaitaraa te Atua, taraia, e kaoti ana anera te Uea nakoia; ao e ruo n aiaron te nang; ao e taetae n aiaron te baa, are e a ruru iai aontano are a tei iai.

12 Ao moan te korakora miimia, ao a bwaka nako aontano, ao a aki oota n taeka ake e taekin nakoia.

13 E ngae n anne ao e manga tabeka riki bwanaana, ni kangai: Aramwa, teirake kaetiko, bwa bukin tera ngkai ko bwainikirina ana ekaretia te Atua? Bwa e kangai te Uea: Aio au ekaretia, ao N na kateia; ao akea ae e na kamauna, ma ti riaon te tua irouia au botanaomata.

14 Ao e a manga kangai riki te anera: Taraia, e a tia te Uea n ongo aia tataro ana botanaomata, ao ana tataro naba ana toro ae Aramwa, ae tamam; bwa e a tia n tataro ma te onimaki ae korakora ibukim bwa ngkoe ae ko na anganaki ataakin te koaua; mangaia ae aio bukin ae I a roko iai bwa N na kaota nakoim mwaakan ao korakoran te Atua, bwa aonga ni kaekaki aia tataro ana toro n aron aia onimaki.

15 Ao taraia ko kona ni kaitaraa mwaakan te Atua? Bwa taraia, e aki ruru aontano ni bwanaau? Ao ko aki noorai ni matam? Ao I a tia ni kanakoaki mai iroun te Atua.

16 Ao I kangai nakoim: Nako, ao uringa aron tautoronakia ami bakatibu i aban Eram, ao i aban Nibwaai; ao uring bwaai aika moan te korakora ake e a tia ni karaoi ibukiia; bwa a bon tia n tautoronaki, ao e a tia ni kamaiuia. Ao ngkai I kangai nakoim, Aramwa, toua nako kawaim, ao tai manga kataia ni kaitaraa te ekaretia, bwa aonga ni kaekaki aia tataro, ao karaoia e ngae ngkana ko bon kan kamaunako i bon iroum.

17 Ao ngkai e koro bukina bwa aikai kabanean taeka ake e taekin te anera nakon Aramwa, ao e a kitanna.

18 Ao ngkai a bwaka Aramwa ma raona ake a mena i rarikina i aontano, bwa e korakora miimia; bwa a tia n noora ana anera te Uea n oin mataia; ao bwanaana aiaron te baa, are karurua te aonaba; ao a ataia bwa akea riki ma ti mwaakan te Atua ae kona ni karurua te aonaba ao ni kamwainginga n aiaron ae e na bwenaua.

19 Ao ngkai e rang ni korakora miimiin Aramwa ao e a aki kona n taetae, ao e aki kona ni kauka wiina; eng, ao akea korakorana, ao e aki konai n tabeki baina; mangaia ae e a uotaki irouia ake a iria, n aiaron te aki konabwai, ni kaweneaki imatan tamana.

20 Ao a kaongoa tamana taekan bwaai ake a riki nakoia; ao e kimwareirei tamana, bwa e ataia bwa bon mwaakan te Atua.

21 Ao e tua bwa a na botaki aomata aika a mwaiti bwa a na kakoaua te bwai are e a tia ni karaoia te Uea ibukin natina, ao ma raona ake a iria.

22 Ao e tua bwa a na botaki ibonga; ao a moana aia aki mamatam, ao a tataro nakon te Uea ae Atuaia bwa e na kauka wiin Aramwa, bwa e aonga ni kona n taetae, ao bwa aonga naba ni kaokaki korakoran bwain rabwatana—bwa aonga ni kaukaki mataia aomata n noora ao n ataa raoiroin ao mimitongin te Atua

23 Ao e koro bukina bwa i mwin aia aki mamatam ma aia tataro i nanon te maan ae uoua te ngaina ao te bong, ao a oki korakoran bwain rabwatan Aramwa, ao e teirake ao e a taetae nakoia, n tuangiia bwa a na kukurei:

24 Bwa e taku, I a tia n rairananou man au bure, ao I a tia ni kabooaki iroun te Uea; taraia I a tia ni bungiaki i nanon te tamnei.

25 Ao e taku te Uea nakoiu: Ko na tai miimi bwa aomata ni kabane, eng, mwaane ma aine, aaba, reeti, neewe, ao botanaomata ni kabane, a na bane ni manga bungiaki; eng, manga bungiaki i nanon te Atua, ni bitaki man aia bwai n rabwata ma aroia ni bwaka, nakon te aro n raoiroi, ao ni kabooaki iroun te Atua, n riki bwa natina mwaane ma aine;

26 Ao ngkanne a na riki bwa aomata aika a boou; ma ngkana a aki karaoa aio, e na bon aki kona n reke irouia uean te Atua.

27 I kangai nakoimi, bwa ngkana a aki karaoa aio, ao a na teweaki nako; ao I kakoaua aio, kioina ngkai I a tia ni kaniia teweau nako.

28 E ngae n anne, i mwin korakaiu i nanon te kaangaanga, n rairananou ni karokoa kaniian mateu, ao n ana nanoanga te Uea ao e nooria bwa e tau bwa e na kamaiuai man te kabuekaki are aki totoki, ao I a manga bungiaki i nanon te Atua.

29 E a tia ni kabooaki tamneiu man te aro ae kananokawaki ae moan te mao ma ana kabaebae te buakaka. I a tia ni mena i nanon te rua ae te kabanea n rootongitong; ma ngkai I a noora ootan te Atua ae moan te kamiimi. E a tia ni kammarakaki tamneiu n te karawawataki ae akea tokina; ma I a tia n anaaki, ao e aki manga kammarakaki tamneiu.

30 I tia n aki kakoaua au Tia Kaboai, ao ni kakewei bwaai ake a tia n taekinaki irouia ara bakatibu; ma ngkai a na ataia bwa e na bon roko, ao bwa e uringi bwaai ni kabane ake e kariki, e na kaoti nakoia ni kabane.

31 Eng, a na katorobubua bubua ni wae ni bane, ao a na bane neewe ni karaoiroia. Eng, n te kabanea ni bong, are a na bane n teirake iai aomata bwa a na motikaki taekaia irouna, ao a na kakoaua bwa bon ngaia te Atua; ao akana a tia n aki maeka ma te Atua iaon te aonaba, a na reke nakoia te moti are te katuaeaki ae aki totoki; ao a na mwaeiei, man ruru, ao ni kauangi i aan matana ake a noori bwaai ni kabane.

32 Ao ngkai e koro bukina bwa man te tai arei ao e a waaki Aramwa n reireia aomata, ao ake a mena naba i rarikin Aramwa n te tai are kaoti iai te anera nakoia, ni mwamwananga ni kabuta te aba, n tataekin nakoia aomata bwaai ake a tia n ongo man noori, ao n tataekina ana taeka te Atua i nanon te korakai ae bati, ngkai a bwainikirinaki irouia ake aki kakoaua, ao a oreaki naba irouia aika mwaiti mai buakoia.

33 Ma n rinanon kaangaanga aikai, ao a karekea te rau n nano nakoia kaain te ekaretia, ni kamatoai aia onimaki, ao ni kaungai nanoia bwa a na taotaonakinnano ao ni kekeiaki ni kaawakina ana tua te Atua.

34 Ao aman mai buakoia bon natin Motiaea aika mwaane; Ao araia bon Amon, Aaron, Aomna, ao Imnaai; aikai araia natin Motiaea aika mwaane.

35 Ao a mwamwananga ni kabuta aon aban Taraemera, ao nakoia aomata ni kabane ake a mena i aan ana tautaeka te uea ae Motiaea, ni kakaonimaki ni kamaoi ikoaki akea a tia ni karaoi nakon te ekaretia, ni kaoti aia bure ni kabane, n tataekin bwaai ake a tia n ongo man noori, ao ni kabwarabwarai taian taeka ni burabeti ma koroboki aika tabu nakoia ake iai nanoia ni kan ongora iai.

36 Ao a riki bwa ana bwai ni mwakuri te Atua ni karokoia aika a mwaiti nakon ataakin te koaua, eng, nakon ataakin aia Tia Kaboia.

37 Ao ai mwaitira kakabwaiaia! Bwa a tataekina te rau; ao a tia n tataekini rongorongo aika raraoi aika a tamaroa; ao a tataekinna nakoia aomata bwa e tautaeka te Uea.