1 Na tukun ma inge tuh tukun wen nahtuhl Mosiah ahksahfye ma inge nuhkwewa, elos us sie u srihsrihk weluhlos ac fohlohklac nuh yurun pahpah tuhmwaclos, ac kena sel tuh elan sang nuh selos tuh elos in kuh in, weluhlos suc elos sulaclah, in som nuh fin acn Nephi tuh elos kuh in luti ma suc elos lohng, ac tuh elos in kuh in luti kahs luhn God nuh sin mwet wiyaclos, mwet Laman—

2 Tuh sahp elos in usaclos me nuh ke kahlwem luhn Leum God lalos, ac furohkohlos liki ma koluk luhn pahpah tuhmwaclos; ac tuh sahp elos in unwacloslac ke sruhnga lalos nuh sin mwet Nephi, tuh elos in oacyacpac utuckuh in engan in Leum God lalos, tuh elos in akawucki nuh sin sie sin sie, ac tuh in wacngihn fohs yohk fin acn nuhkwewa suc Leum God El sang nuh selos.

3 Inge elos kena tuh molwelah in ahkkahlwemyeyuck nuh sin mwet nuhkwewa, tuh elos tiac kuh in muhtweng tuh kuhtwena moul luhn mwet in tuhlac; ahok, finne nuhnak se ma kuhtwena moul in misac ne tok ma pahtpaht oruh elos in kusrusr ac rarrar.

4 Ac ohinge Nguhn luhn Leum orekma nuh selos, tuh elos mwet orek ma koluk. Ac Leum El liye fal nuh ke pahkotwen yohk Lal in liyaclosyang; ne ohinge elos kweokkihn ahngyahng yohk ke moul ke srihpen ma koluk lalos, kweokkihn yohk ac sahngweng tuh elos in lihsyuckyak ne tok ma pahtpaht.

5 Ac tukun ma inge elos kwacfe nuh sin pahpah tuhmwaclos ke lwen pucspucs tuh elos in kuh in som nuh fin acn Nephi.

6 Ac tohkohsrah Mosiah el som ac siyuck sin Leum fin el kuh in lwelah wen nahtuhl in som nuh inmahsrlon mwet Laman in luti kahs.

7 Ac Leum El fahk nuh sel Mosiah: Lwelah elos in som, tuh mwet pucspucs fah luhlahlfongi ke kahs lalos, ac elos fah eis moul ma pahtpaht; ac Nga fah kohllah wen nuhtum liki ye poun mwet Laman.

8 Ac tukun ma inge Mosiah el sang tuh elos in kuh in som ac oruh in fal nuh ke nguhsr lalos.

9 Ac elos som ke fuhfahsryucsr lalos nuh innimac in som luti kahs inmahsrlon mwet Laman; ac nga fah sang sie sramsram nuh ke ma elos ac oruh ingelac.

10 Inge wacngihn sie suc tohkohsrah Mosiah elan sang tohkohsrahi nuh se, tuh wacngihn oacna sie sin wen nahtuhl luhngse tohkohsrahi.

11 Ohinge el eis ma sihmlac suc sihmihsyucklac oan ke plwet prahs, ac oacyacpac plwet lal Nephi, ac ma nuhkwewa suc el sruok, ac karihngihn fal nuh ke masap luhn God, tukun lwenglah ac oruh lal in sihmihsyucklac ma sihmlac suc oan ke plwet kol ma konweyuckyak sin mwet lal Limhi, suc ma ituckyang nuh sel ke pahol Limhi.

12 Ac ma se inge el oruh ke srihpen kena yohk luhn mwet lal; tuh elos kena yohk in etuh ke mwet suc ma kuhnausyucklac.

13 Ac inge el luhngaslah ma inge ke orekmakihnyacn yot luo ma kapriyucki nuh ke ip luo ke sie fuhrem.

14 Ac ma inge ahkoeyucklac e ke muhtwacwacackiyac, ac utuckuh ke fihl nuh ke fihl, tuh srihpac la uh pa in luhngas kahs;

15 Ac ma inge liyeyuckyang ac karihngihnyuck ke poun Leum, tuh El fah konwacack mwet nuhkwewa ma sruok acn ma ma suhfal ac ke ma koluk luhn mwet Lal.

16 Ac el suc ma oasr se ma inge pahngpahng mwet liyactwen, tukun ohiyac ke pacl met ah.

17 Inge tukun Mosiah el ahksahfye in luhngas ma sihmlac inge, liye, ma inge sruhmuhn sie sramsram ke mwet suc kuhnausyucklac, ke pacl se ma elos kuhnanuclac met ke tuh muhsahyak sie taor fuhlwact, ke pacl se Leum El kuhnahoslah kahs luhn mwet uh ac elos fahsrelihk nuh fin facluh nohfohn, ahok, ac finne ke pacl met ah nuh ke oreklac lal Adam.

18 Inge sramsram se inge oruh mwet lal Mosiah in ahsor fahfahlac, ahok, elos nwacnwaclah ke suhpwacr, ne ohinge sang nuh selos kahlwem yohk, suc elos engankihn.

19 Ac sramsram se inge fah sihmlac ingelac; tuh liye, ac wo tuh mwet nuhkwewa fah etuh ke ma suc sihmlac ke sramsram se inge.

20 Ac inge, oacna ke nga fahk nuh sum, tukun tohkohsrah Mosiah el ahksahfye ma inge, el eis plwet prahs, ac ma nuhkwewa ma el liyacacng, ac sang ma inge nuh sel Alma, suc pa wen nahtuhl Alma; ahok, nohfohn na ma sihmlac ah, ac oacyacpac mwe orekmakihnyuck lweng ah, ac sang ma inge nuh sel, ac sapkihn nuh sel tuh elan liyacacng ac karihngihn ma inge, ac oacyacpac in karihngihn sie ma sihmlac ah ke mwet inge, sang ma inge ke fihl nuh ke fihl, finne ke ma inge ke utuckuh e ke na pacl se ma Lehi el som liki acn Jerusalem.