1 Ac tukun ma inge tukun Mosiah el oraclah oacna pahpah tuhmwacl el sapkihn nuh sel, ac el oraclah sie fahkwack nuh fin acn nuhkwewa we, mwet ah tuhkweni nuh sie tuhkuh ke acn nuhkwewa, tuh elos in kuh in som nuh ke tempuhl in lohng kahs suc tohkohsrah Benjamin el ac fah sruhmuhn nuh selos.

2 Ac oasr pihsac na puhs se, puhkantwen oruh elos tiac kuh in oacwaclah; tuh elos arulacna puhkantweni ac kapkapwack fin acn uh.

3 Ac elos oacyacpac eis fahko se ma wo emet ke un sip nahtuhlos, tuh elos in kuh in oruh kihsac ac mwe kihsac fihrihr in fal nuh ke masap lal Moses.

4 Ac oacyacpac elos in kuh in sang kuloh nuh sin Leum God lalos, suc usaclos me liki acn Jerusalem, ac suc usaclos me liki poun mwet lokoalok lalos, ac srihsrngiyac mwet suwohs in mwet luti lalos, ac oacyacpac sie mwet suwohs in tohkohsrah lalos, suc oakiyac mihs nuh fin acn Zarahemla, ac suc lotwelos in liyacacng masap luhn God, tuh elos in kuh in engan ac nwacnwaclah ke luhngse nuh sin God ac mwet nuhkwewa.

5 Ac tukun ma inge ke elos tuhkuh nuh ke tempuhl, elos tulohkohnwack lohm nuknuk selos yen nuhkwewa raunyak, kais sie mukul in wi sucu lal, pa nuh ke muhtwacn kiyacl, ac wen nahtuhl, ac acn nahtuhl, ac wen nahtuhlos, ac acn nahtuhlos, e ke ma mahtuh emet ne ke ma srihk emet, kais sie sucu nuhkwewa srenglah liki sucu sahyac.

6 Ac elos tulohkohnwack lohm nuknuk selos raunweack tempuhl, mukul nuhkwewa oruh motonoac in lohm nuknuk se ah in oan ngwet nuh ke tempuhl, tuh ohinge elos in kuh in muhta na lun lohm nuknuk selos ac lohng kahs suc tohkohsrah Benjamin el ac sruhmuhn nuh selos;

7 Tuh un mwet ah arulacna puhkantwen oruh tohkohsrah Benjamin el koflah lotwelos nohfohn lun muhtuhnpot ke tempuhl, ohinge el oruh tuh sie taor in muhsahyak, tuh ohinge mwet lal in kuh in lohng kahs suc el ac sruhmuhn nuh selos.

8 Ac tukun ma inge el muhtwacwacack in sramsram nuh sin mwet lal ke taor sac; ac elos tiac kuh in lohng nohfohn kahs lal ke srihpen puhslaciyacn un mwet ah; ohinge el oruh tuh kahs ma el sruhmuhn ah in kuh in sihmlac ac suhpweyucklac nuh inmahsrlolos suc tiac kuh in lohng puhsrwacl, tuh elos in kuh pac in eis kahs lal.

9 Ac pa inge kahs suc el sruhmuhn ac oruh in sihmlac, fahk: Mwet wiyuck, kowos nuhkwewa suc sifacna tuhkweni nuh sie, kowos suc kuh in lohng kahs luhk suc nga fah sruhmuhn nuh suwos ke lwen se inge; tuh nga tiac sapkihn nuh suwos in tuhkuh in lain kahs suc nga fah sruhmuhn, tuhsruhk kowos in lohng yuc, ac ikacslah insrewos tuh kowos in lohng, ac insiowos tuh kowos in kahlwem, ac nuhnak lowos an lah ma lukmac luhn God in kuh in ikacklah kowos in liye.

10 Nga tiac sapkihn kowos in tuhkuh kowos in sahngweng sihk, kuh kowos in nuhnkuh muh nga sie na liki sie mwet moul.

11 Tuhsruhk nga oacna kowos, puhlakihn ohiyac nuhkwewa ke kweok luhn mahno ac nuhnak; ne ohinge nga suleyucklac sin mwet inge, ac akmuhsralah sin pahpah tuhmuhk, ac ahkkweyeyuck ke poun Leum tuh nga in sie mwet kol ac tohkohsrah luhn mwet inge; ac liyeyuckyang ac karihngihnyuck ke kuhiyacn kuh lal, in kuhlwacnsuhpwe kowos ke kuh, nuhnak, ac kuh nuhkwewa suc Leum El use nuh sihk.

12 Nga fahk nuh suwos lah nga ahkkweyeyuck in sislah pacl luhk in kuhlwacnsuhpwe kowos, finne ne ke pacl se inge, ac tiac suk kol kuh selfuh kuh kuhtwena kain in mwe kahsruhp lowos;

13 Nga tiac pac lwelah tuh kowos in srohoh ke acn in kaclpous, kuh kowos in kuhmahkihnyuck sie sin sie, kuh kowos in ahkmas, kuh fuhnmweti, kuh pihsrapasr, kuh kosro; kuh finne nga tiac pac lwelah tuh kowos in oruh kuhtwena ohiyac suhfal, ac luti kowos tuh kowos in liyacacng masap luhn Leum, ke ma nuhkwewa suc El sapkihn nuh suwos—

14 Ac finne nga, nga sifacna, orekma ke pouk sifacna tuh ngwacn kuh in kuhlwacnsuhpwe kowos, ac tuh kowos in kuh in tiac toasr ke molin tax, ac tuh in wacngihn ma tuhkuh nuh yuruwos suc mwe ahksuhpwacr—ac ma inge nuhkwewa suc nga sramsramkihn, kowos sifacna mwet lohoh kac ke lwen se inge.

15 Ne ohinge, mwet wiyuck, nga tiac oruh ma inge tuh ngwacn tuhngahk, nga tiac pac fahk ma inge tuh ohinge ngwacn tuhkahkihn kowos; tuhsruhk nga fahk ma inge nuh suwos tuh kowos in etuh lah nga kuh in topuk ke nuhnak mwesahs ye muhtuhn God ke lwen se inge.

16 Liye, nga fahk nuh suwos lah ke srihpen nga fahk nuh suwos lah nga sislah pacl luhk in kuhlwacsapi kowos, nga tiac ke tuhngahk, tuh nga kuhlwacnsap muhkwena luhn God.

17 Ac liye, nga fahk nuh suwos ma inge tuh kowos in etuh in lahlmwetmwet; tuh kowos in etuh lah ke kowos kuhlwacnsapuh mwet wiyowos kowos kuhlwacnsapuh God lowos.

18 Liye, kowos pahngonyuc tohkohsrah lowos; ac fin nga, suc kowos pahngon tohkohsrah lowos, orekma in kuhlwacnsuhpwe kowos, na yac kowos ac tiac orekma in kuhlwacnsapuh sie sin sie?

19 Ac oacyacpac liye, fin nga, suc kowos pahngon tohkohsrah lowos, suc sislah pacl la in kuhlwacnsuhpwe kowos, ac kuhlwacnsapuh God, tiac eis kuhtwena kihsen kuloh suwos, O fuhkah kowos in sang kuloh nuh sin Tohkohsrah inkuhsrao lowos!

20 Nga fahk nuh suwos, mwet wiyuck, lah kowos fin sang nuhkwewa kuloh ac kaksak suc nguhnuwos nohfohn kuh in sruok, nuh sin God Suc orekowoslac, ac liyekowosyang ac karihngihnkowosyang, ac oruh tuh kowos in engan, ac acsot tuh kowos in moul in mislac yurun sie sin sie—

21 Nga fahk nuh suwos lah kowos fin kuhlwacnsuhpwacl suc orekowoslac e ke muhtwacwacack ah, ac karihngihnkowos ke lwen nuh ke lwen, in oruh kowos momong, tuh kowos in muhta moul ac mukwi ac oruh fal nuh ke luhngse lowos, ac finne in suhpang kowos ke pacl se nuh ke sie pac—nga fahk, kowos finne kuhlwacnsuhpwacl ke nguhnuwos nohfohn tuhsruhk kowos ac mwet kuhlwacnsap wacngihn srihpac.

22 Ac liye, ma nuhkwewa ma El enenuh suwos pa in liyacacng masap Lal; ac El olwelah nuh suwos tuh kowos fin liyacacng masap Lal kowos fah kapkapwack fin acn uh; ac El tiac oruh siena liki ma suc El fahk; ohinge, kowos fin liyacacng masap Lal El ac ahkinsewowoye kowos ac oruh tuh in wo ohiyowos.

23 Ac inge, ke ma se met, El orekowoslac, ac acsot nuh suwos moul lowos, suc kowos sowemoul nuh Sel.

24 Ac ahkluo, El kena tuh kowos in oruh oacna ke El sapkihn nuh suwos; tuh kowos fin oruh, El ac sa in ahkinsewowoye kowos; ac ke ma inge El moli kowos. Ac kowos srwackna sowemoul nuh Sel, ac srack, ac fah, ne tok ac ma pahtpaht; ohinge, meac kowos ac tuhngahk kac an?

25 Ac inge nga siyuck, yac kowos kuh in fahk kuhtwena ma keiwos sifacna? Nga topuk kowos, Moh. Kowos tiac kuh in fahk lah kowos oacna puhk fin facluh; tuh kowos oreklac ke puhk fin facluh; tuhsruhk tuh liye, ma Lal Suc orekowoslac.

26 Ac nga, ne nga, suc kowos pahngon tohkohsrah lowos, tiac wo liki kowos; tuh nga oacyacpac ma ke puhk uh. Ac kowos liye tuh nga mahtohoh, ac apkuhran in fuhlweack mahno se inge nuh ke facluh suc tuhkuh kac me.

27 Ohinge, ke nga fahk nuh suwos lah nga kuhlwacnsuhpwe kowos, fuhfahsryucsr ke sie nuhnak mwesahs ye muhtuhn God, na nga ke pacl se inge oruh tuh kowos in tuhkweni nuh sie, tuh nga in sukokyak nwacsnwacs, ac tuh srahiowos in tiac tuhkuh nuh feik, ke nga fah tulac in nuhnuhnkweyuck sin God ke ma suc El sapkihn nuh sihk keiwos.

28 Nga fahk nuh suwos lah nga oruh tuh kowos in sifacna tuhkweni nuh sie tuh nga in kuh in sislah lweyuck luhk ke srah lowos, ke puhluhn pacl se inge ke nga apkuhran in som nuh ke kuclyuck luhk, tuh nga in kuh in som nuh ten ke mihs, ac nguhn kawihl luhk fah wi choir lucng on kaksakihn sie God suwohs.

29 Ac yohk liki, nga fahk nuh suwos lah nga oruh tuh kowos in sifacna toweni nuh sie, tuh nga in ahkkahlwemye nuh suwos lah nga tiac kuh in sifil mwet luti lowos, kuh tohkohsrah lowos.

30 Tuh finne ke pacl se inge, monuk nohfohn arulacna rarrar ke nga srihke in sramsram nuh suwos; tuhsruhk Leum God El kahsreyuc, ac sapkihn nuh sihk tuh nga in sramsram nuh suwos, ac El sapkihn nuh sihk tuh nga in fahkwack nuh suwos ke lwen se inge, lah wen nuhtihk Mosiah pa tohkohsrah ac mwet kol lowos.

31 Ac inge, mwet wiyuck, nga ke tuh kowos in oruh in oacna ke kowos kwacna oruh. Ke kowos liyacacng masap luhk, ac oacyacpac masap luhn pahpah tuhmuhk, ac kapkapwack, ac karihngihnyuck in tiac puhtatyang nuh in poun mwet lokoalok lowos, na kowos fin liyacacng masap luhn wen nuhtihk, kuh masap luhn God suc fah utuckot nuh suwos sel, kowos fah kapkapwack fin acn uh, ac mwet lokoalok lowos fah wacngihn kuh lalos keiwos.

32 Tuhsruhk, O mwet luhk, sensenkihn in wacngihn fohs sikyak inmahsrlowos, ac oruh kowos tuyak in ahkos nguhn koluk, suc sramsramkihnyuck sin pahpah tuhmuhk Mosiah.

33 Tuh liye, oasr sie ma koluk sruhmuhnyuck kacl suc tuyak in ahkos nguhn sacn; tuh el fin tahkuhnlah in ahksol, ac muhta na ac misac ke ma koluk lal, el na nihm koluk nuh ke moul lal sifacna; tuh el eis molo se kalyeiyuck ne tok ma pahtpaht, ke tahfonglac ke masap luhn God siena liki etuh lal sifacna.

34 Nga fahk nuh suwos, wacngihn inmahsrlowos, sahyacn tuhlihk srihsrihk nuhtuwos suc tiac lutiyuck ke ma inge, tuh in etuh lah kowos sowemoul ne tok ma pahtpaht nuh sin Pahpah tomowos inkuhsrao, in sang nuh Sel ma nuhkwewa ma oasr yuruwos ac oasr; ac oacyacpac lutiyuck ke ma sihmlac suc nwacnwack kahs in pahluh suc sruhmuhnyuck sin mwet pahluh muhtahl, finne tuhkuh ne ke pacl luhn pahpah tuhmwacsr, Lehi, ke el som liki acn Jerusalem;

35 Ac oacyacpac, ma nuhkwewa ma sruhmuhnyuck sin pahpah tuhmwacsr ne ingena. Ac liye, oacyacpac, elos sruhmuhn ke ma sapkihnyuck nuh selos sin Leum; ohinge, elos suwos ac pwacye.

36 Ac inge, nga fahk nuh suwos, mwet wiyuck, lah tukun kowos etuh kac ac lutiyuck ke ma inge nuhkwewa, kowos fin tahfonglac ac tiac oruh oacna ma suc sruhmuhnyuck, tuh kowos eiskowoslac liki Nguhn luhn Leum, tuh ac fah wacngihn acn la yuruwos in kol kowos nuh ke inkacnek in lahlmwetmwet tuh kowos in ahkinsewowoyeyuck, kapkapwack, ac karihngihnyuck—

37 Nga fahk nuh suwos, lah mwet se ma oruh ma se inge, el ac ahkkahlwemye in tuyak lain God; ohinge el tuyak in ahkos nguhn koluk, ac eklac in sie mwet lokoalok nuh ke ma suwohswohs nuhkwewa; ohinge, ac wacngihn acn lal yurun Leum, tuh El tiac muhta lun tempuhl tiac muhtahl.

38 Ohinge fin mwet sacn tiac auliyak, ac muhta ac misac oacna sie mwet lokoalok luhn God, ma toasr ke nuhnuhnkuh muhtahl ac okaswack nguhnan moul kawihl lal in etuh ke ma koluk lal sifacna, suc oruh elan lokweni ye muhtuhn Leum, ac nwacklah iniwacl ke mwactan ma koluk, ac waek, ac kweok, suc oacna sie e wacngihn sahflahiyac, suc fihrihr la sowack nuh lucng ne tok ac ma pahtpaht.

39 Ac inge nga fahk nuh suwos, tuh pahkotwen uh tiac kuh nuh sin mwet sacn; ohinge misac sahflah lal pa in kweok ne tok wacngihn sahflahiyac.

40 O, kowos mwet mahtuh nuhkwewa, ac oacyacpac mwet fuhsr, ac kowos tuhlihk srihsrihk suc kuh in kahlwem ke kahs luhk, tuh nga sramsram in kahlwem nuh suwos tuh kowos in kahlwem, nga pruhe tuh kowos in acsmak in esam ke ohiyac koluk lalos suc puhtatyang nuh ke tahfonglac.

41 Ac yohk liki, nga kena tuh kowos in motko ke mwe insewowo ac ohiyac engan lalos suc liyacacng masap luhn God. Tuh liye, elos ahkinsewowoyeyuck ke ma nuhkwewa, kwewana ke ikoac ac nguhn; ac elos fin muhtweng in luhlahlfongi ne ke sahflah elos eisyuck nuh inkuhsrao, tuh ohinge elos fah muhta yurun God ke sie ohiyac engan wacngihn sahflahiyac. O esam, esam lah ma inge pwacye; tuh Leum God El sramsramkihn.