Ri Vuj richin ri Mosia

1 Xcʼulvachitej cʼa chi ri Mosia xuben achiʼel ri rutataʼ xuchilabej can chire, y xuyaʼ jun rutzijol chupan chijun ri ruvachʼulef riʼ. Cʼa cʼariʼ, ri vinakiʼ xquimol quiʼ chupan chijun ri ruvachʼulef riʼ. Cʼariʼ, xebe cʼa akʼanij acuchi cʼo vi ri lokʼolej runimajay ri ri Ajaf, richin queriʼ nicacʼaxaj ri xtubij chique rijeʼ ri Benjamín, ri rutataʼal ri tinamit.

2 Can e janíla vi vinakiʼe cʼo, y xa romariʼ tok man xeʼajilex ta. Rijeʼ janíla e quivinakirisan can y e quiqʼuiytisan can chupan ri ruvachʼulef.

3 Chukaʼ xequicʼuaj quiqʼuin rijeʼ ri nabiyelaxelaʼ e cʼo chupan ri quikʼataj chicopiʼ, richin niquiben camelabel sujunic y poron sujunic, achiʼel cʼa nubij ri rupixaʼ ri Moisés.

4 Queriʼ cʼa chukaʼ yetiquir niquimatioxij chire ri Ajaf ri qui Dios ri xelesan pe quichin rijeʼ chupan ri ruvachʼulef Jerusalem. Rijaʼ chukaʼ xerucol rijeʼ pa quikʼaʼ ri yeʼetzelan quichin, y xerutek chojmilej tak achiʼaʼ richin xeʼoc ri quitijonelaʼ. Chukaʼ xutek jun chojmilej achin richin xoc ri rutataʼal ri tinamit. Ri tataʼal riʼ xutiquiribaʼ ri uxlanibel cʼuʼx chupan ri ruvachʼulef Zarajemla. Chukaʼ xerutijoj rijeʼ richin xequitakej ri rupixaʼ ri Dios, richin queriʼ, yequicot cʼa y nicʼojeʼ ri cajovabal chire ri Dios y chique conojel ri vinakiʼ.

5 Xcʼulvachitej cʼa chi tok xeʼapon acuchi cʼo vi ri lokʼolej runimajay ri Ajaf, xquiben cʼa ri quimoʼc pa ri rusutilen. Chijun achin xcʼojeʼ, ri ruchinamit riqʼuin. Ri e cʼo chupan ri ruchinamit e jareʼ: ri rixjayil y ri rucʼajol y ri rumiʼal, y chukaʼ ri quicʼajol y ri quimiʼal rijeʼ, nabey cʼa ri nimalaxel y ruqʼuisibel ja ri chakʼlaxel. Chiquijujunal chinamit e chʼaron cʼa quiqʼuin ri chʼakaʼ chic.

6 Xquibanalaʼ cʼa ri quimoʼc y xquisutij rij ri lokʼolej runimajay ri Ajaf. Ronojel ri achiʼaʼ xquiben cʼa chi ri ruchiʼ ri quimoʼc xuqʼuek riʼ chuvech ri lokʼolej runimajay r Ajaf. Riqʼuin cʼariʼ, yetiquir ta yecʼojeʼ can pa ri quimoʼc y nicacʼaxaj ri chʼabel ri xtubij ri tataʼal Benjamín chique.

7 Ri molaj vinakiʼ janíla nim y ri tataʼal Benjamín man xtiquir ta xerutijoj conojel, xaxe oc chupan ri rutzʼak ri lokʼolej runimajay ri Ajaf. Roma cʼariʼ tok rijaʼ xutek rupabaxic jun nucʼun palibel richin cʼo banel richin xticacʼaxaj ri vinakiʼ ri xtubij rijaʼ chique.

8 Xcʼulvachitej cʼa chi rijaʼ xpaʼeʼ pa ruviʼ ri nucʼun palibel y xutiquiribaʼ ri dchʼoven quiqʼuin ri ruvinak. Man riqʼuin vi riʼ, man conojel ta rijeʼ xetiquir xcacʼaxaj ri ruchʼabel roma can janíla vi nim ri molaj vinakiʼ riʼ. Roma cʼariʼ, rijaʼ xuben chi xetzʼibex ri xubij y xetak el quiqʼuin ri man xetiquir ta xcacʼaxaj ri ruchʼabel. Riqʼuin cʼariʼ, rijeʼ chukaʼ xetiquir xquicʼul ri ruchʼabel.

9 Jareʼ cʼa ri ruchʼabel ri xubij rijaʼ y xuben chi xetzʼibex can. Xubij cʼa quereʼ: Vachʼalal, rix ivonojel imolon pe iviʼ richin nivacʼaxaj ri chʼabel ri xtinbij chive vacami. Yin man ix invoyon ta richin xixpe vaveʼ richin yixetzʼan quiqʼuin ri chʼabel ri xtinbij chive. Xa ninvajoʼ chi yinivacʼaxaj ta cʼa. Ninvajoʼ cʼa chi nijek ri ixiquin richin xtivacʼaxaj, y chi nijek ri ivánima richin nikʼax chivech, y chi nijek ri inojibal richin xquekʼalajirisex chivech rix ri evan etamabel richin ri Dios.

10 Chukaʼ man ix invoyon ta richin xixpe vaveʼ richin nixibij iviʼ chinuvech, o richin ninojij chi yin man xaxe ta in jun achin camel.

11 Yin xa in junan iviqʼuin rix. In cʼo cʼa pa rukʼaʼ ronojel ruvech yabil richin ri chʼaculaj y ri nojibel. Man riqʼuin vi riʼ, yin in chaʼon roma re vinakul reʼ, y in turusan roma ri nataʼ, y ri Ajaf ruyaʼon kʼij chuve richin yinoc jun ucʼuey bey y jun rutataʼal re tinamit reʼ. Chukaʼ in toʼon can roma ri nimalej ruchukʼaʼ ri Ajaf richin yisamej ivoma rix riqʼuin ronojel ri rayibal y nojibel, y ri uchukʼaʼ ri ruyaʼon pe ri Ajaf chuve.

12 Ninbij cʼa chive chi yatajinek kʼij chuve pa nucʼaslen, cʼa pa re kʼij reʼ, richin yisamej ivoma rix. Man nucanon ta pe iviqʼuin rix ri kʼana puek, o ri saka puek, o chʼakaʼ chic beyomel.

13 Chukaʼ man nuyaʼon ta kʼij chi rix yixtzʼapix pa cheʼ, o chi yixcʼojeʼ pa quikʼaʼ chʼakaʼ chic, o chi yixcamisan, o yixyojon, o yixelekʼ, o yixtzʼiʼin. Chukaʼ man nuyaʼon ta kʼij richin niben xabachique itzel. Ix nutijon cʼa richin yeʼitakej ri rupixaʼ ri Ajaf riqʼuin ronojel ri e ruchilaben chive.

14 Can ja vi yin chukaʼ in samajinek riqʼuin ri nukʼaʼ richin yixinsamajij rix, richin queriʼ man ix ejkan ta cʼa riqʼuin tojonic chuve. Riqʼuin cʼariʼ, chukaʼ man yaʼon ta chivij ri achique cʼayef richin nivejkaj. Ronojel reʼ ri nubin can, rix itzʼeton can vacami.

15 Man riqʼuin vi riʼ, vachʼalal, man nubanon ta ronojel reʼ richin yibananen. Chukaʼ man ninbij ta chive ronojel reʼ richin yixinsujuj. Xa quereʼ ninbij chive richin nivetamaj chi yitiquir yinapon riqʼuin ri Dios vacami riqʼuin ri chʼajchʼoj nunabebal.

16 Can kitzij vi ninbij chive chi man ninvajoʼ ta yibananen, xa roma tok xinbij chive chi in samajinek pe ivoma rix pa ri nucʼaslen yin. Xa pa ri rusamaj ri Dios in cʼo vi can.

17 Can kitzij vi cʼa ninbij chive ronojel reʼ richin nivetamaj utzilej nojibel. Riqʼuin cʼareʼ, nivetamaj chi tok yixsamej coma ri chʼakaʼ chic vinakiʼ, ja ri rusamaj ri Dios niben.

18 Can kitzij vi ibin can chi yin in rutataʼal ri itinamit rix. Y vi yin, ri achojche nibij rix chi in rutataʼal ri itinamit, can yisamej vi ivoma rix, ¿la man ta cami rucʼamon chi rix nisamajij cʼa iviʼ chukaʼ?

19 Can kitzij vi chi yin, ri nibij rix chi in rutataʼal ri itinamit, in samajinek ivoma rix pa nucʼaslen. Man riqʼuin vi riʼ, ja ri rusamaj ri Dios nubanon can. Vi rucʼamon cʼa chi nimatioxij chuve yin romariʼ, ¡can janíla vi rucʼamon chi nimatioxij chire ri chicajel Itataʼal!

20 Ninbij cʼa chive, vachʼalal, chi vi nimatioxij ta riqʼuin ronojel cʼavomanic y ruyaʼic kʼij ri nicʼojeʼ pan ivánima chire ri Dios ti tzʼucuyon ivichin, y chajiyon ivichin, y banayon chi yixquicot, y yoyon chi jebel yixcʼaseʼ junan chi utzil,

21 Ninbij cʼa chive chi vi rix nisamajij ta rijaʼ ri tzʼucuyon ivichin pa tok rutiquiribel, y ri chajiyon ivichin kʼij kʼij roma tok nusipaj ri ivuxlaʼ richin yixcʼaseʼ y yixsilon y nibanalaʼ ri achique nivajoʼ, y chukaʼ rijaʼ yixrilij jutakel—ninbij cʼa chive chi vi ta nisamajij rijaʼ riqʼuin ronojel ri ivánima, xa cʼa yixoc ta na man utzilej ta samajelaʼ.

22 Can kitzij vi rijaʼ xaxe nucʼutuj cʼa chive chi queʼitakej ri rupixaʼ. Rijaʼ rusujun cʼa chive chi vi yeʼitakej ri rupixaʼ, can xquixqʼuiyer vi chuvachʼulef. Rijaʼ manjun bey xtijalon riqʼuin ri rubin can. Roma cʼariʼ, vi yeʼitakej ri rupixaʼ, rijaʼ yixruturusaj y nuben chi yixqʼuiyer.

23 Nabey cʼa rijaʼ ix rutzʼucun y ruyaʼon chive ri icʼaslen. Roma cʼariʼ, can cʼo vi ri icʼas riqʼuin.

24 Ri rucaʼn jariʼ tok nucʼutuj chi tibanaʼ ri achique rubin can chive. Vi niben cʼa queriʼ, rijaʼ chaʼnin yixruturusaj. Queriʼ cʼa rijaʼ ix rutojon. Cʼa cʼariʼ, rix cʼa cʼo na icʼas riqʼuin rijaʼ, y can benek vi ruvech xticʼojeʼ ri icʼas rix. Roma cʼariʼ, ¿achique cʼa roma yixbananen?

25 Vacami cʼa nincʼutuj chive, ¿la cʼo cami rubeyal tok nibij chi janíla ikʼij? Yin ninbij chive chi manek. Rix xa manek rubeyal nibij chi can ta ix junan riqʼuin ri pokolaj richin ri ruvachʼulef. Man riqʼuin vi riʼ, rix xixtzʼucutej pe riqʼuin ri pokolaj richin ri ruvachʼulef. Vaveʼ cʼa, ri pokolaj xa richin ri tzʼucuyon pe ivichin.

26 Yin, achojcheʼ nibij chi in rutataʼal ri itinamit, man in janíla ta utz chivech rix. Yin chukaʼ xa in aj pokolaj. Rix nitzʼet cʼa chi yin in riʼj chic. Jubaʼ chic cʼa apon y xtinyaʼ cʼa can re camel chʼaculaj reʼ chupan ri ruvachʼulef.

27 Xinbij cʼa chi xisamej ivoma rix riqʼuin ri nunabebal chʼajchʼoj chuvech ri Dios. Riqʼuin cʼariʼ, nubanon cʼa chi nimol iviʼ vacami richin chi manek cʼa numac chuvech ri Dios. Queriʼ cʼa, rijaʼ man xtuyaʼ ta vejkal roma ri imac rix tok xquinapon chuvech ri Dios richin chi rijaʼ nukʼet tzij pa nuviʼ roma ri xubij chuve ivoma rix.

28 Ninbij cʼa chive chi nubanon chi nimol iviʼ richin chi ninchʼej el ri iquiqʼuel chirij ri nutziak. Queriʼ cʼa, vacami tok xa jubaʼ chic man yibe ka pa ri numukubal, can cʼo vi banel richin chi yibe riqʼuin uxlanibel nucʼuʼx. Chukaʼ cʼo cʼa beyal richin chi ri vuxlabal man camel ta yerachibilaj ri aj chicajel molaj bixanelaʼ richin nikabixaj ri cʼavomanic chire ri chojmilej Dios.

29 Chukaʼ ninbij chive chi nubanon chi nimol pe iviʼ, richin chi ninbij can chive chi yin man yitiquir ta chic yinoc ri itijonel, ni ta chukaʼ ri rutataʼal ri itinamit.

30 Roma cʼa, vacami ri nuchʼacul janíla nicʼaracʼot tok nintij nukʼij richin yichʼo iviqʼuin. Man riqʼuin vi ri, ri Ajaf nuyaʼ uchukʼaʼ chuve y ruyaʼon can kʼij richin yichʼo iciqʼuin rix. Rijaʼ rubin chuve chi ninkʼalajirisaj chivech rix vacami chi ri nucʼajol, Mosia, can noc vi jun rutataʼal ri tinamit y jun ucʼuey bey pan iviʼ rix.

31 Vacami cʼa, vachʼalal, ninvajoʼ ta chi xtiben cʼa achiʼel ri ibanon vi can. Rix e itaken ri nupixaʼ yin y chukaʼ ri rupixaʼ ri nataʼ. Chukaʼ ix beyomirisan, y ix chajin can, richin chi man ix tzakinek ta pa quikʼaʼ ri yeʼetzelan ivichin. Vi queriʼ xqueʼitakej cʼa ri rupixaʼ ri nucʼajol, o ri pixaʼ ri Dios xtuyaʼ chive roma rijaʼ, jariʼ tok, xquixqʼuiyer ta pa re ruvachʼulef, y ri yeʼetzelan ivichin man ta jun cuchukʼaʼ xticʼojeʼ pan iviʼ rix.

32 Man riqʼuin vi riʼ vachʼalal, tichajij cʼa iviʼ richin chi man xqueyacatej ta cʼaxinic chiʼicojol rix. Riqʼuin cʼariʼ, xtinimaj ta el rutzij ri itzel uxlabel achojchij xchʼo vi ri nataʼ, Mosia.

33 Can kitzij vi cʼa chi cʼo jun cʼajisabel pa ruviʼ ri niniman rutzij ri uxlabel riʼ. Roma vi rija nunimaj rutzij, y nicanej can, y nicom can chupan ri rumac, can nuqʼuen vi pe jun etzelanic pa ri ránima. Rijaʼ rukʼajon cʼa ri rupixaʼ ri Dios, stapeʼ cʼa retaman chic chi xa man utz ta nuben queriʼ. Roma cʼariʼ, tok ri tojbel ri nucʼul rijaʼ ja ri cʼajisabel jumul.

34 Yin ninbij chive chi rix ivonojel ix tijon can chire ronojel reʼ. Xaxe cʼa ri tak ivalcʼual manjani quetijox chire ronojel reʼ. Ivetaman cʼa chi cʼo ri icʼas jumul chuvech ri chicajel Itataʼ, y rucʼamon cʼa chi niyaʼ iviʼ chire rijaʼ, y chukaʼ chi niyaʼ chire ronojel ri cʼo iviqʼuin. Chukaʼ ivonojel rix ix tijon can chire ri retal banobel, acuchi yetzʼibex vi ri lokʼolej rutzijol ri xquiyaʼ ri chʼajchʼojilej tak e yaʼol lokʼolej rutzijol, cʼa pa tok ri katataʼ Leʼi xel pe pa ri Jerusalem.

35 Ivetaman chukaʼ ronojel ri quibin can ri katataʼ kamamaʼ, cʼa pa re kʼij reʼ. Can kitzij vi cʼa, chi rijeʼ xquitzijoj ri achique ri Ajaf xuchilabej chique. Roma cʼariʼ tok can e choj vi y chukaʼ e kitzij.

36 Vacami cʼa vachʼalal, ninbij chive chi tok ivetaman ronojel reʼ y can ix tijon vi chic chire, vi nikʼej ri bitajinek can y nipabaʼ iviʼ chuvech, que cʼariʼ xa nivelesaj cʼa iviʼ riqʼuin ri Uxlabel richin ri Ajaf. Roma cʼariʼ, manek chic rucʼojlibal rijaʼ iviqʼuin rix, richin chi yixruyukej pa ri bey richin utzilej nojibel, richin queriʼ yixturusex cʼa y yixbeyomirisex y yixchajix.

37 Ninbij cʼa chive chi ri achin ri nuben queriʼ, can kʼalaj vi chi nupabaʼ riʼ chuvech ri Dios. Ja cʼariʼ tok nunimaj rutzij ri itzel uxlabel, y noc jun etzelanel richin ri chojmilal. Roma cʼariʼ, ri Ajaf manek chic ri rucʼojlibal riqʼuin, roma cʼa ri Ajaf man nicʼaseʼ ta chupan tzʼilolej jay.

38 Roma cʼariʼ, vi ri achin riʼ man nitzolin ta pe rucʼuʼx, xa noc cʼa can jun etzelanel richin ri Dios y nicom can queriʼ, jariʼ tok ri rurayibal ri lokʼolej kʼatoj tzij nuben chi ri rucʼaslemal rijaʼ, ri man camel ta, can nunataj vi ri mac chuvech. Riʼ nuben cʼa chi rijaʼ nuvononelaʼ riʼ chuvech ri Ajaf, y nunojisaj ri ránima riqʼuin ri macbel y ri kʼaxomal y ri bis. Riʼ junan riqʼuin jun kʼakʼ ri man nichuputej ta chic y ri ruxak nijoteʼ jumul.

39 Vacami cʼa ninbij chive chi ri joyovabel man nucol ta ri achin riʼ. Roma cʼariʼ, rijaʼ cʼo chi xtibe acuchi xtutij vi jun cʼayeval jumul.

40 Ivonojel rix ri ix rijilej tak achiʼaʼ y ri ix cʼajola/ ri ix alcʼualaʼ, ivonojel cʼa ri yekʼax chivech rix ri nuchʼabel yin, can choj vi in chʼovinek cʼa richin chi yekʼax chivech. Nincʼutuj cʼa chive chi tinataj ri cʼayevilej quibanon ri yekʼajon quichin ri pixaʼ.

41 Ninvajoʼ cʼa chukaʼ chi nichʼob rij ri turusanic y ri quicoten quichin ri yetaken ri rupixaʼ ri Dios. Can kitzij vi cʼa chi rijeʼ e turusan riqʼuin ronojel ri richin re ruvachʼulef y ronojel ri richin ri uxlabel. Vi yecochʼon chi utzil, cʼa pa ri ruqʼuisibel, can xquecʼulutej vi pa ri caj. Chiriʼ cʼa xquecʼojeʼ riqʼuin ri Dios pa quicoten jumul. Tokaʼ cʼa chiʼcʼuʼx, tokaʼ cʼa chiʼicʼuʼx chi ronojel reʼ can kitzij vi, roma ja ri Ajaf biyon can richin.