1 CʼA cʼariʼ, ri tataʼal Benjamín xutanabaʼ rutzijoxic ri chʼabel ri xubij ri takonaxel richin ri Ajaf chire rijaʼ. Jariʼ tok rijaʼ xutzuʼ cʼa ri nimalej molaj vinek, y rijeʼ can e tzakinek vi pa ri ulef roma can xquimey vi ri Ajaf.

2 Rijeʼ xquinabej cʼa can chi rijeʼ xa e aj tzʼil chʼaculaj, y man e nim ta chuvech ri pokolaj richin ri ruvachʼulef. Conojel rijeʼ can cof vi xesiqʼuin junan y quereʼ xquibij: Tajoyovaj kavech. Tabanaʼ cʼa chi ri tojbalil mac ri niban riqʼuin ri ruquiqʼuel ri Cristo nisamej koma roj, richin queriʼ xkojcuyutej cʼa chique ri kamac, y xtichʼajchʼojirisex ri kánima. Nikanimaj cʼa ri Jesucristo, ri Rucʼajol ri Dios, ri xutzʼuc ri caj, y ri ruvachʼulef, y ronojel, y xtikaʼ pe quiqʼuin ri vinakiʼ vaveʼ chuvachʼulef.

3 Xcʼulvachitej cʼa chi tok quibin chic re chʼabel reʼ, ri Uxlabel richin ri Ajaf xpe ka quiqʼuin rijeʼ, y xenoj riqʼuin quicoten. E cuyutajinek cʼa chic ri quimac y xcʼojeʼ uxlanibel cʼuʼx pa ri quinabebal. Ronojel reʼ xa roma can xquicukubaʼ vi quicʼuʼx riqʼuin ri Jesucristo ri xtipe cʼa, achiʼel ri chʼabel ri xubij ri tataʼal Benjamín chique.

4 Cʼariʼ, ri tataʼal Benjamín xujek ruchiʼ y xuchop ruchʼabalixic jun chic bey. Quereʼ xubij chique: Vachibil y vachʼalal, vijaʼtzul y nuvinak, ninvajoʼ cʼa chi nivacʼaxaj pe jun bey chic, richin chi nikʼax chivech rix ri chʼakaʼ chic chʼabel ri xtinbij chive.

5 Kitzij cʼa, chi rucʼamon chi ri etamabel chirij ri rutzil ri Dios ix rucʼason cʼa vacami, richin chi ninaʼ chi rix xa ix manjun, y chi ix tzakinek, y chi rix manek ri ivicʼaʼtz.

6 Ninbij cʼa chive chi rucʼamon chi inaben chic ri rutzil ri Dios, y ri nimalej ruchukʼaʼ, y ri utzilej runojibal, y ri rucochʼibal, y chi man chaʼnin ta noyover quiqʼuin ri e aj re ruvachʼulef. Rucʼamon cʼa chukaʼ chi ivetaman chic chirij ri tojbalil mac ri chojmirisan pa tok rutiquiribel ri ruvachʼulef, richin chi xticolotej ri rucukuban riʼriqʼuin ri Ajaf, y ri nitaken chi utzil ri rupixaʼ, y ri nicochʼon chupan ri cukubabel cʼuʼx, cʼa pa ri ruqʼuisibel ri rucʼaslen. Yichʼo cʼa vaveʼ chirij ri rucʼaslen ri camel chʼaculaj.

7 Ninbij cʼa chive chi ri vinek ri queriʼ xtuben, can xticolotej vi roma ri tojbalil mac. Ri tojbalil mac riʼ chojmirisan pa tok rutiquiribel pe ri ruvachʼulef, chique conojel vinakiʼ ri xecʼojeʼ tok xtzak ri Adán, y ri yecʼojeʼ vacami, y chukaʼ ri xquecʼojeʼ apon, cʼa pa ri ruqʼuisibel re ruvachʼulef reʼ.

8 Jareʼ ri rubeyal achojroma nipe vi ri colotajic. Can manek vi jun chic colotajic, xaxe re jun reʼ ri xtzijox can. Chukaʼ manek chic banel richin nicolotej jun vinek, can xaxe vi ri xinbij can chive.

9 Tinimaj cʼa ri Dios. Tinimaj cʼa chi can cʼo vi y chi rijaʼ xutzʼuc ronojel ri cʼo chicaj y ri cʼo chuvachʼulef. Tinimaj chi rijaʼ cʼo ronojel utzilej runojibal y ronojel uchukʼa chicaj y chukaʼ chuvachʼulef. Tinimaj chi ri vinek man nikʼax ta chiquivech rijeʼ ronojel ri nikʼax chuvech ri Ajaf.

10 Tinimaj cʼa chi cʼo chi nitzʼolin pe icʼuʼx chupan ri imac y yeʼiyaʼ can, y nichʼutinirisaj iviʼ chuvech ri Dios, y nicʼutuj chire riqʼuin ri kitzij irayibal chi rijaʼ tucuyuʼ cʼa ri imac. Vacami cʼa, vi ninimaj ronojel reʼ, can tibanaʼ vi cʼa.

11 Rix ivetaman chic ri rucʼojlemal ri Dios, y inaben ri rutzil, y inaʼon ri rajovabal, y ix cuyun chique ri imac, y reʼ nuben chi can janíla vi niquicot ri ivánima. Ninbij cʼa chive jun chic bey achiʼel xinbij can, vi can que vi reʼ ibanon, tokaʼ cʼa chukaʼ chiʼicʼuʼx chi can nim vi ri Dios y rix xa ix manjun. Tokaʼ cʼa chiʼicʼuʼx jantapeʼ ri rutzil rijaʼ y chi rijaʼ man chaʼnin ta noyover iviqʼuin rix ri man ix rucʼamon ta. Can janíla vi tichʼutinirisaj cʼa iviʼ, y tivoyoj ri rubiʼ ri Ajaf kʼij Kʼij, y tichʼiquibaʼ iviʼ cof pa ri cukubabel cʼuʼx riqʼuin ri achique xubij ri takonaxel chi xticʼulvachitej cʼa.

12 Can kitzij vi ninbij chive chi vi niben queriʼ, junelic xquixnoj riqʼuin ri quicoten y ri rajovabal ri Dios. Junelic chukaʼ xquecuy ri imac y xquixqʼuiyer riqʼuin ri etamabel chirij ricʼojlemal richin ri tzʼucuyon ivichin. Jariʼ ri etamabel richin ri choj y ri kitzij.

13 Man xtirayij ta xtisoc iviʼ, xa xtirayij xquixcʼaseʼ riqʼuin uxlanibel cʼuʼx, y xtiyalaʼ chive chiʼijujunal ri rucʼamon chi xtiyaʼox chive.

14 Xtiben cʼa chi ri ivalcʼual cʼo quitziak, y man yenum ta. Chukaʼ man xtiyaʼ ta kʼij chi rijeʼ niquikʼej ri rupixaʼ ri Dios, ni tak chukaʼ niquichapalaʼ quiʼ, y yetojojen, y niquisamajij cʼa ri itzel vinek, roma xa ja rijaʼ ri rajaf mac. Ja rijaʼ ri itzel uxlabel achojchij xetzijon vi ri katiʼt kamamaʼ. Ja rijaʼ ri netzelan richin ronojel ri chojmilal.

15 Xa xqueʼitijoj rijeʼ richin yebiyin chupan ri bey richin ri kitzij y ri utzilej naʼoj. Xqueʼitijoj richin chi nicajoʼ quiʼ y niquitolaʼ quiʼ chiquivech.

16 Rix chukaʼ xqueʼitoʼ ri vinek ri nicʼatzin ri itoʼonic chique. Chukaʼ xtiyaʼ jubaʼ ri cʼo iviqʼuin chire ri can nicʼatzin vi chire. Man xtiben cʼa chi ri mebaʼ cochinel nucʼutuj na chive, y xa man niyaʼ ta chire, y chukaʼ man ta cʼa xtixovaj richin chi nicom.

17 Riqʼuin jubaʼ xtabij quereʼ: Re achin reʼ rucʼamon ka chire can rijaʼ re kʼaxomal reʼ. Roma cʼariʼ tok man xtintoʼ ta, y man xtinyaʼ ta chire jubaʼ ri nukʼutun, ni tak chukaʼ jubaʼ ri cʼo viqʼuin, richin chi man ta nutij pokonal. Can choj vi chi rijaʼ cʼo re cʼajisabel reʼ chirij.

18 Jacʼa yin ninbij chive chi ri nibanon queriʼ janíla cʼatzinel chi rijaʼ nitzolin pe rucʼuʼx. Vi man nitzolin ta pe rucʼuʼx, rijaʼ xtisach jumul, y man xticʼojeʼ ta ri rucʼojlibal chupan ri rajavaren ri Dios.

19 Can kitzij vi cʼa, ¿la man oj mebaʼiʼ tak cochinelaʼ ta cami roj konojel? ¿La man xaxe ta cami riqʼuin ri Dios nikacʼul vi ronojel ri kakʼutun, y ri katziak, y ri kakʼana puak, y ri kasaka puak, y ronojel ruvech beyomel ri cʼo kiqʼuin?

20 Can kitzij vi, vacami yan rix yixchʼo akʼanij pa rubiʼ rijaʼ y can nicʼutuj vi chi tucuyuʼ ri imac. ¿La rubanon cami cʼa rijaʼ chi xicʼutuj chire y xa manek xuyaʼ ta chive? Mani. Rijaʼ rutixon ri Ruxlabal pan iviʼ rix y rubanon chi xnoj ri ivánima riqʼuin quicoten. Rubanon cʼa chi xkʼil ri ichiʼ y can manek vi nibij, roma can janíla nim ri iquicoten.

21 Can ja vi cʼa ri Dios ri xtzʼucun ivichin, y ri achojiqʼuin yixtzuʼun vi richin nuyaʼ chive ri icʼaslen, y ronojel ri cʼo iviqʼuin, y ri achique yixoc vi rix. Vacami cʼa, rijaʼ nuyaʼ chive rix xabachique ri nicʼutuj chire, vi choj riʼ, y vi nicʼutuj riqʼuin cukubabel cʼuʼx, y vi can ninimaj vi chi xticʼul. Roma cʼariʼ tok janíla rucʼamon chi rix chukaʼ niyaʼ jubaʼ ri cʼo iviqʼuin chique ri chʼakaʼ chic.

22 Vi nitzʼet y xa nivetzelaj ri achin ri nicʼutun chive chi niyaʼ jubaʼ chire ri cʼo iviqʼuin richin chi man nicom ta, can choj vi chi xquixetzelex chukaʼ rix roma xivevaj can chuvech rijaʼ ri cʼo iviqʼuin. Ri cʼo cʼa iviqʼuin xa man ivichin ta rix, xaxe cʼa richin ri Dios. Can richin vi rijaʼ chukaʼ ri icʼaslen. Man riqʼuin vi riʼ, rix xa man nicʼutuj ta akʼanij chire rijaʼ, y man nitzolin ta pe icʼuʼx pa ri itzel ri ibanon.

23 Ninbij cʼa chive: Joʼoc ruvech ri achin ri nuben queriʼ, roma ronojel ri cʼo riqʼuin xa xtiqʼuis cʼa, junan riqʼuin rijaʼ. Reʼ ninbij cʼa chique ri e cʼo quibeyomel richin re ruvachʼulef.

24 Yichʼo cʼa chukaʼ iviqʼuin rix ri ix mebaʼiʼ ri manek can ta qʼuiy cʼo iviqʼuin, xa yixtiquir yixcʼaseʼ kʼij kʼij. Yichʼo cʼa chivij rix ri man niyaʼ ta chire ri nicʼutun, roma can manek vi ta iviqʼuin. Ninvajoʼ cʼa chi nibij pan ivánima quereʼ: Man ninyaʼ ta roma manek viqʼuin. Vi xa ta cʼo viqʼuin, ninyaʼ ta cʼa chire.

25 Vacami cʼa, vi queriʼ nibij pan ivánima, manek cʼa ri imac. Vi xa man ta queriʼ, yixetzelex ta cʼa. Can choj vi chi yixetzelex, roma nimunij cʼa achique ri manjani ticʼul.

26 Vacami cʼa, roma ri xinbij can chive, o pa jun chic tzij, xinbij chive quereʼ richin chi yecuyutej ri imac kʼij, y richin chi yixtiquir yixbiyin chʼajchʼoj chuvech ri Dios. Roma cʼariʼ, ninvajoʼ ta chi niyaʼ jubaʼ ri cʼo iviqʼuin chique ri e mebaʼiʼ, y chiʼijujunal xtiyalaʼ achiʼel cʼa yixtiquir, richin chi yeʼivilij ri yenum, y niyaʼ tziek chique ri manek quitziak, yeʼikʼejelaʼ y yeʼitoʼ ri yavaʼiʼ riqʼuin ri richin ri uxlabel y chukaʼ ri richin ri chʼaculaj, achiʼel cʼa ri nicajoʼ rijeʼ.

27 Titzʼetaʼ cʼa chukaʼ chi ronojel reʼ nibanatej cʼa riqʼuin utzilej nojibel y chojlen. Man nicʼutux ta cʼa chi ri vinek nanin janíla chuvech ri xa man nitiquir ta chic nuben. Man riqʼuin vi riʼ, chukaʼ nicʼatzin chi nutij rukʼij richin queri nuchʼec cʼa ri rajel. Roma cʼariʼ, cʼo chi nibanatej ronojel riqʼuin chojlen.

28 Ninvajoʼ cʼa chukaʼ chi nokaʼ cʼa chiʼicʼuʼx chi tok nikajon jun vinek riqʼuin jun rachibil, rucʼamon chi nutzolij pe ri kajoʼn riʼ can achiʼel vi xuyaʼ rutzij. Vi man ta queriʼ niben, yixmacun ta cʼa. Riqʼuin cʼa jubaʼ, queriʼ xtiben chi ri ivachibil xtimacun chukaʼ.

29 Pa ruqʼuisibel, man yitiquir ta ninbij chive ronojel achojroma yixmacun vi. E cʼo jalajoj quivech bey y banel richin chi yixmacun. Man yitiquir ta ninvajilaj ronojel, roma can e janíla vi.

30 Xa jareʼ yitiquir ninbij chive. Vi man ta nichajij iviʼ, y man ta nichajij ri inojibal y ri ichʼabel y ri ibanobal, y vi man ta yeʼitakej ri rupixaʼ ri Dios y man ta nicukubaʼ icʼuʼx junelic riqʼuin ri ivacʼaxan chirij ri rupetebal ri Ajaf, cʼa pa ri ruqʼuisibel ri icʼaslen, cʼari cʼo ta chi yixsachtej. Vacami, achin, tokaʼ cʼa chacʼuʼx y man casachyaj.