1 Vachʼalal, jun chic bey ninvajoʼ chi yinivacʼaxaj utz, roma cʼa cʼo na ri xtinbij chive. Can kitzij vi chi cʼo ri xtinbij chive chirij ri xticʼulvachitej apon.

2 Ri achique xtinbij chive rix, xbitej cʼa chuve yin roma jun takonaxel richin ri Dios. Rijaʼ quereʼ xubij chuve: Cacʼastej. Jariʼ tok xicʼastej, y can kitzij vi chi rijaʼ paʼel chinuvech.

3 Quereʼ cʼa xubij chuve: Cacʼastej y tavacʼaxaj ri xtinbij chave. Roma cʼa can kitzij vi chi in petenek richin ninyaʼ chave utzilej rutzijol richin nimalej quicoten.

4 Ri Ajaf racʼaxan cʼa ri lokʼolej achʼoven riqʼuin rijaʼ y rutzʼeton ri achojmilal. Rijaʼ in nutakon pe cʼa richin ninbij chave chi cʼo rubeyal richin yaquicot. Chukaʼ ninbij chi cʼo rubeyal richin nakʼalajirisaj chiquivech ri avinakul chi utz yequicot rijeʼ chukaʼ.

5 Roma can kitzij vi chi petenek ri kʼij y xa jubaʼ chic apon tok ri Ajaf Ronojel Tiquirel xtikaʼ pe pa ri caj riqʼuin ri ruchukʼaʼ rijaʼ chiquicojol ri calcʼual ri achiʼaʼ vaveʼ chuvech re ruvachʼulef. Ja rijaʼ ri nikʼaton tzij, y ri xcʼoje jantapeʼ, y xticʼojeʼ cʼa chukaʼ benek ruvech. Rijaʼ xticʼaseʼ cʼa chuvech re ruvachʼulef riqʼuin jun ruchʼacul richin chʼabek ulef, y xtibe cʼa chiquicojol ri vinakiʼ, y xqueruben nimalej tak samaj. Xqueruchʼajchʼojirisaj ri yavaʼiʼ y xqueruyec pe ri caminakiʼ. Xtuben chi ri e jetzʼ xquebiyin, y chi ri e moy xquetzuʼun, y chi ri e tʼoj xqueʼacʼaxan. Xquerakʼomaj cʼa ronojel ruvech yabil.

6 Chukaʼ xquerelesaj el ri aj tzayiʼ, o pa jun chic chʼabel, ri itzel tak uxlabel ri yecʼaseʼ pa ri cánima ri vinakiʼ e aj re ruvachʼulef.

7 Rijaʼ xtutij kʼaxomal richin ri ruchʼacul, y chukaʼ xtitejtobex, y xtinum, y xtichaker ri ruchiʼ, y xticos. Ronojel cʼariʼ man nitiquir ta nucochʼ jun vinek, xa nicom. Can kitzij vi cʼa chi ri ruquiquʼuel xtel pe chupan chijun ri rutzʼokpinbel ri ruchʼacul. Riʼ xtibanatej xa roma can janíla vi xtikʼaxon ri ránima coma ri quimac y ri itzel banobel quichin ri ruvinak.

8 Rijaʼ xtubiniʼaj Jesucristo, ri Rucʼajol ri Dios, ri Tataʼixel richin ri caj y ri ruvachʼulef y ri Tzʼucunel richin ronojel, c/a pa tok rutiquiribel pe. Ri ruteʼ rijaʼ xtubiniʼaj María.

9 Rijaʼ xtipe cʼa quiqʼuin ri ruvinakul rijaʼ richin chi ri colotajic xtiyaʼox cʼa chique conojel ri vinakiʼ vi niquicukubaʼ cʼa quicʼuʼx riqʼuin ri rubiʼ rijaʼ. Man riqʼuin vi riʼ, tok xtibanatej can ronojel reʼ, rijeʼ xtiquinojij chi rijaʼ xa xabachique achin. Cʼa cʼari, xtiquibij chi cʼo jun aj tzay riqʼuin y xtiquisoc y xtiquirip chuvech ri paban kʼeban cheʼ.

10 Pa rox kʼij, rijaʼ xticʼastej pe chiquicojol ri caminakiʼ y xtiyacatej richin nukʼet tzij pa quiviʼ ri vinakiʼ ri e cʼo chuvachʼulef. Can kitzij vi chi ronojel reʼ xtibanatej richin chi xtipe jun chojmilej kʼatonic tzij pa quiviʼ ri calcʼual ri achiʼaʼ.

11 Can kitzij vi cʼa, ri ruquiqʼuel rijaʼ nutoj ri quimac ri xetzak roma ri kʼajonic pixaʼ ri xuben ri Adán. Jacʼa rijeʼ ri cʼa manjani tiquetamaj ri rurayibal ri Dios chique tok xecom. Je rijeʼ ri xemacun roma man quetaman ta ri rupixaʼ.

12 Man riqʼuin vi riʼ, ¡joʼoc ruvech ri etamayon richin ri pixaʼ y nupabaʼ riʼ chuvech ri Dios! Ri colotajic can man xtipe ta vi chire, xaxe cʼa vi nitzolin pe rucʼuʼx y nucukubaʼ rucʼuʼx riqʼuin ri Ajaf Jesucristo.

13 Ri Ajaf Dios e rutakon cʼa pe ri chʼajchʼojilej tak e yaʼol lokʼolej rutzijol chiquicojol ri calcʼual ri achiʼaʼ. Queriʼ rubanon cʼa richin chi niquikʼalajirisaj pe ronojel reʼ chiquivech conojel ijaʼtzul, tinamit, y chʼabel. Riqʼuin cʼariʼ, cʼo rubeyal richin chi conojel ri yeniman chi xtipe cʼa ri Cristo, xquecuyutej cʼa quimac y xquequicot janíla, achiʼel vi ta rijaʼ petenek chic quiqʼuin rijeʼ.

14 Man riqʼuin vi cʼariʼ, ri Ajaf xutzʼet chi ri ruvinak can cof vi ri cánima. Roma cʼariʼ tok xuyaʼ chique rijeʼ jun pixaʼ. Jariʼ ri rupixaʼ ri Moisés.

15 Rijaʼ xerucʼut chiquivech rijeʼ e qʼuiy retal, y meyel tak samaj, y cʼulvachitajic, y cʼutbel chirij cʼa tok xtipe. Chukaʼ ri chʼajchʼojilej tak e yaʼol lokʼolej rutzijol xechʼo quiqʼuin rijeʼ chirij ri rupetebal ri Cristo. Man riqʼuin vi riʼ, rijeʼ xquicovirisaj ri cánima. Can man xkʼax ta chiquivech chi ri rupixaʼ ri Moisés manek ta ricʼaʼtz vi man ta roma ri tojbalil mac ri niban riqʼuin ri ruquiqʼuel ri Ajaf.

16 Vi ta ri tak alcʼualaʼ quetaman yemacun, xa man ta yetiquir yecolotej. Vaveʼ cʼa, ninbij chive chi rijeʼ can e turusan vi. Roma can kitzij vi, stapeʼ cʼa rijeʼ yetzak roma ri chʼaculaj quicʼamon pe, achiʼel ri Adán, ja ri ruquiqʼuel ri Cristo cʼa nutoj ri quimac rijeʼ.

17 Chukaʼ ninbij cʼa chive chi man xtiyaʼox ta jun chic biʼaj ni jun chic bey achojroma xtipe vi ri colotajic chique ri calcʼual ri achiʼaʼ. Can xaxe vi xtipe riqʼuin y roma ri rubiʼ ri Cristo, ri Ajaf Ronojel Tiquirel.

18 Kitzij cʼa chi ja rijaʼ ri xtikʼaton tzij, y ri rukʼatonic tzij nijaʼ can choj vi. Ri alcʼual ri nicom tok cʼa cʼo pa ri ralcʼualal man xtisach ta. Ri vinakiʼ niquiqʼuen cʼa nimalej cʼayeval pa quiviʼ rijeʼ vi xa man niquichʼutinirisaj ta quiʼ achiʼel ri tak calcʼual. Queriʼ cʼa chukaʼ vi man niquinimaj ta chi ri colotajic xban, y nicʼojeʼ, y xtipe riqʼuin y roma ri tojbalil mac niban riqʼuin ri ruquiqʼuel ri Cristo, ri Ajaf Ronojel Tiquirel.

19 Ri vinek aj chʼaculaj xa jun etzelanel richin ri Dios. Queriʼ cʼa rubanon pe tok xtzak ri Adán. Queriʼ cʼa chukaʼ xtuben ri vinek junelic, vi man ta xtunimaj rutzij ri Lokʼolej Uxlabel, y xtuxovaj ta el ri achin aj chʼaculaj, y xtoc ta jun chojlaxel roma ri tojbalil mac ri xuben ri Cristo, ri Ajaf. Nicʼatzin cʼa chi xtoc achiʼel jun alcʼual ri nunimaj tzij, y nuchʼuchʼujirisaj ri ránima, y nuchʼutinirisaj riʼ, y nicochʼon, y can najovan vi, y nurayij nukasaj riʼ pa ronojel ri Ajaf nuben chire, achiʼel cʼa jun alcʼual nunimaj rutzij ri rutataʼ.

20 Chukaʼ ninbij chive chi xtapon ri kʼij tok ri etamabel chirij ri Colonel xtiquiratej cʼa chiquicojol conojel tinamit, ijaʼtzul, chʼabel, y vinakul.

21 Can kitzij vi chi tok xtapon ri kʼij riʼ, xaxe ri tak alcʼualaʼ xquetzʼetetej chʼajchʼoj roma ri Dios. Checonojel chic can xquetzʼetetej vi riqʼuin mac, vi man ta nitzolin ri quicʼuʼx pa quimac, y vi man ta niquicukubaʼ quicʼuʼx riqʼuin ri rubiʼ ri Ajaf, ri Dios Ronojel Tiquirel.

22 Vacami cʼa, e atijon chic ri avinak chique ri tijonic ri e ruchilaben can chave ri Ajaf ri a Dios. Roma cʼariʼ, rijeʼ man e chʼajchʼoj ta chic yetzʼet roma ri Dios, xa achiʼel cʼa ri chʼabel ri nubin chave.

23 Vacami cʼa, yin e nubin ri chʼabel ri e ruchilaben can chuve ri Ajaf.

24 Quereʼ cʼa nubij ri Ajaf: Re chʼabel reʼ, ja jun chojmilej kʼalajirisanic chirij re vinek reʼ pa ri kʼij richin ri kʼatonic tzij. Riqʼuin cʼareʼ, xtikʼat tzij pa quiviʼ conojel vinakiʼ achiʼel cʼa ri quisamaj, stapeʼ cʼa e utz riʼ o xa e itzel.

25 Vi ri quisamaj e itzel, cʼo chi niquitzʼet ri quimac y ri itzel quibanobal. Riʼ nuben chique chi niquivononelaʼ quiʼ chuvech ri Ajaf y yebe pa ri kʼaxomal y ri jumul cʼayeval, ri acuchi man yetiquir ta chic yetzolin vi pe. Roma cʼariʼ, rijeʼ quicʼamon ka etzelanic pa quiviʼ can rijeʼ.

26 Queriʼ cʼa, rijeʼ e kumuvirinek chic pa ri kumbel richin ri royoval ri Dios. Ri ruchojmilal man xtiquir ta chic xukʼet re cʼayeval reʼ chiquivech rijeʼ, achiʼel cʼa man xtiquir ta xukʼet chi xtzak ri Adán tok xutij ri ruvech cheʼ chʼaʼoj rij. Roma cʼariʼ, can junelic vi ri joyovabel man xtiquir ta chic xquerucol rijeʼ.

27 Ri quicʼayeval rijeʼ can achiʼel vi jun choy richin kʼakʼ y cʼaten yaʼal, y ri ruxak kʼakʼ man yechuputej ta, y ri rusibil nijotoyaj benek ruvech. Queriʼ cʼa ruchilaben cʼa ri Ajaf chuve yin. Amen.