1 Ac sifilpacna mwet wiyuck, nga pahngon lohacng lowos, tuh oasr pac ma nga ke sruhmuhn nuh suwos; tuh liye, oasr ma nga ac fahk nuh suwos ke ma suc ac fah tuhkuh.

2 Ac ma suc nga fah fahk nuh suwos oreklac kahlwem nuh sihk sin sie lipufacn sin God. Ac el fahk nuh sihk: Tuhkahkwek; na nga muhtwaclihk, ac liye el tu ye muhtuhk.

3 Ac el fahk nuh sihk: Tuhkahkwek, ac lohng kahs suc nga fah fahk nuh sum; tuh liye, nga tuhkuh in ahkkahlwemye nuh sum pweng wo ke engan yohk.

4 Tuh Leum El lohng pruhe lom, ac nuhnuhnkuh ke suwohswohs lom, ac suhpweyuc me in ahkkahlwemye nuh sum tuh kom in enganwack; ac tuh kom in ahkkahlwemye nuh sin mwet lom, tuh elos in oacyacpac sesseslah ke engan.

5 Tuh liye, pacl ac tuhkuh, ac tiac paht, tuh ke kuh, Leum Kuhlacna Suc kol, Suc tuh, ac pa moul ma pahtpaht nuh ke moul ma pahtpaht nuhkwewa, fah oactui liki inkuhsrao inmahsrlon tuhlihk nuhtin mwet, ac fah muhta ke lohm muhtahl ma oreklac ke kle, ac som nuh inmahsrlon mwet uh, oruh mwenmwen sakihrihk, ac unwelah mwet mas, ahkmoulyeack mwet misac, oruh mwet ul in fahsr, mwet kun in eis liyactwen lalos, ac mwet sohlohng in lohng, ac unwelah kain in mas nuhkwewa.

6 Ac El fah luhswack devil, kuh nguhn fohkfohk suc muhta ke insiacn tuhlihk nuhtin mwet.

7 Ac liye, El fah kweokkihn mwe sruhf, ac waek luhn mahno, masrinsrwacl, maluh, ac ullac, yohk liki ma mwet uh kuh in kweokkihn, sahyacn na misac; tuh liye, srah tuhkuh ke pat nuhkwewa, ngal Lal upaclaclac ke muhnahs ac ma koluk luhn mwet Lal.

8 Ac El fah pahngpahng Jisus Kraist, Wen nuhtin God, Pahpah inkuhsrao ac facluh, Mwet in Oraclah luhn ma nuhkwewa ke muhtwacwacack ah me, ac ninac Kiacl fah pahngpahng Mary.

9 Ac liye, El sifacna tuhkuh, tuh molwelah kuh in tuhkuh nuh sin tuhlihk nuhtin mwet in luhlahlfongi ke Inel; ac tukun ma inge nuhkwewa elos fah motko Kacl muh sie mukul, ac fahk lah oasr sie devil Yohrohl, ac ahkkolukyacl, ac fah sruhpsruhlwack.

10 Ac El fah moulyak ke lwen ahktolu liki misac; ac liye, El tu in nuhnuhnkuh facluh; ac liye, ma inge nuhkwewa oreklac tuh sie nuhnuhnkuh suwohswohs kuh in tuhkuh nuh sin tuhlihk nuhtin mwet.

11 Tuh liye, ac oacyacpac srahl iwaclah ma koluk lalos suc puhtatlac ke tahfonglac lal Adam, suc misac tiac etuh ke kena luhn God kaclos, kuh suc ma sikalweni in koluk na.

12 Tuhsruhk tuh we, we nuh sin el suc ma etuh tuh el lain God! Tuh molwelah tuhkuh nuh sin tiac sie mwet sahyacn ke auliyak ac luhlahlfongi ke Leum Jisus Kraist.

13 Ac Leum God El suhpwacma mwet pahluh muhtahl Lal inmahsrlon tuhlihk nuhtin mwet nuhkwewa, in ahkkahlwemye ma inge nuh sin mwet, muhtuhn facl, ac puhsra nuhkwewa, tuh ohinge el suc luhlahlfongi lah Kraist El ac tuhkuh, el kuh in eis nwacsnwacslah luhn ma koluk lalos, ac kaksak ke enganwack yohk, finne in muh El tuhkuh tari inmahsrlolos.

14 Tuhsruhk Leum God El liye tuh mwet Lal mwet lihkkeke, ac El srihsrngi nuh selos sie masap, finne masap lal Moses.

15 Ac akucl, ac ma usrnguck, ac kain in ma, ac nguhna pucspucs El ahkkahlwemye nuh selos, ke tuhkuh Lal; ac oacyacpac mwet pahluh muhtahl sruhmuhn nuh selos ke tuhkuh Lal; ac tuhsruhk insiaclos kwekwe, ac tiac kahlwem kac lah masap lal Moses wacngihn ma ac oruh sahyacn na iwaclah luhn srah Lal.

16 Ac finne ma ac kuh se tuh tuhlihk srihsrihk in koluk elos tiac kuh in moliyucklac; tuhsruhk nga fahk nuh sum elos ahkinsewowoyeyuck; tuh liye, oacna kacl Adam, kuh ke facluh, elos puhtatlac, ne ohinge srahn Kraist iwaclah ma koluk lalos.

17 Ac yohk liki, nga fahk nuh sum, lah ac fah wacngihn sie ine sahyac ac ituckyang kuh kuhtwena inkacnek kuh ohiyac ma molwelah kuh in tuhkuh nuh yurun tuhlihk nuhtin mwet, ke inen Kraist muhkwena, Leum Kuhlacna.

18 Tuh liye El nuhnuhnkuh, ac nuhnuhnkuh Lal suwohs; ac ahwowo uh tiac tuhlac ke elos fuhsr na misac; tuhsruhk mwet elos nihm ma koluk nuh ke nguhnalos sifacna sahyacn elos ahkpuhsisaclyelos sifacna ac eklac oacna tuhlihk srihsrihk uh, ac luhlahlfongi lah molwelah tuh oasr, ac oasr inge, ac fah tuhkuh, ke srah in iwaclah luhn Kraist, Leum Kuhlacna.

19 Tuh mwet luhngse ma luhn facluh el sie mwet lokoalok nuh sin God, ac nuh oasr na e ke puhtatlac lal Adam, ac e fah, ne tok ac ma pahtpaht, sahyacn el lohacng nuh ke kolyuck luhn Nguhn Muhtahl, ac sislah ma luhn mwet luhngse facluh ac eklac sie mwet luhlahlfongi ke iwaclah luhn Leum Kraist, ac eklac oacna sie tuhlihk srihsrihk, fihlpacp, fakpacp, mongfihsrwacsr, muhtweng, sesseslah ke luhngse, kena ahkostwen nuh ke ma nuhkwewa suc Leum El liye fal in oruh nuh sel, oacna ke sie tuhlihk fuhsr el ahkos pahpah tuhmwacl.

20 Ac yohk liki, nga fahk nuh sum, tuh pacl uh fah tuhkuh ke etwacack luhn Mwet Lango fah fahsrelihk nuh ke muhtuhn facl, un mwet, puhsra, ac mwet nuhkwewa.

21 Ac liye, ke pacl sac tuhkuh, wacngihn sie fah konweyuckyak wacngihn mwacta ye muhtuhn God, sahyacn tuhlihk srihsrihk, ke auliyak muhkwena ac luhlahlfongi ke inen Leum God Kuhlacna.

22 Ac finne ke pacl se inge, ke kom fah luti mwet lom ke ma suc Leum God lom El sapkihn nuh sum, finne ke pacl sacn elos fah tiac konweyuckyak in wacngihn mwactalos ye muhtuhn God, in fal nuh ke kahs nga sruhmuhn nuh suwos.

23 Ac inge nga sruhmuhn kahs suc Leum God El sapkihn nuh sihk.

24 Ac ohinge Leum El fahk: Elos fah tu oacna sie luhlahlfongi in fahkwack na kahlwem ma lain mwet inge, ke lwen in nuhnuhnkuh; yac elos fah nuhnuhnkweyuck, mwet nuhkwewa fal nuh ke orekma lal, lah elos wo, kuh lah elos koluk.

25 Ac elos fin koluk elos ac utucklac in akihlen ma suhfal ac ma koluk lalos sifacna, suc oruh elos in lokweni kac ye muhtuhn Leum nuh ke sie ohiyacn ahsor ac kweok ma wacngihn sahflahiyac, yac elos fah tiac kuh in sifil pac fohlohk; ke ma inge elos nihm ma koluk nuh ke nguhnalos sifacna.

26 Ohinge, elos nihm ke kuhp in kasrkuhsrak luhn God, suc nuhnuhnkuh suwohs tiac kuh in sifil lahfwekihn nuh selos likina in lahfwekihn lah Adam el puhtatlac ke srihpen ipeis lal ke fukun sahk oal; ke ma inge, pahkotwen uh tiac kuh in orekma nuh selos ne tok ma pahtpaht.

27 Ac kweok lalos oacna sie inluhluh in e ac yot fol, suc fihrihr kac wacngihn sahflahiyac, ac suc fofosr kac sowack nuh lucng ne tok ac ma pahtpaht. Tuh ohinge Leum El sapkihn nuh sihk. Amen.