1 Im kiiō, ālikin men kein eaar dedeļo̧k an kiin̄ Benjamin kōm̧m̧an jem̧ļo̧kin naan ko kar bōkļo̧k n̄an e jān enjeļ an Irooj, eaar bōk mejān im reito-reitak ipeļaakin ijo ioon jarlepju eo, im lo raar aolep wōtlo̧k n̄an laļ, bwe mijake Irooj eaar itok ioer.

2 Im raar kalimjek er make ilo wāween kanniōk eo aer, em̧ool dikļo̧k jān būn̄aln̄al in laļ. Im raar lam̧ōj kōn juon wōt ainikien, im ba: O Kwōn tūriam̧o, im kōjerbal bōtōktōkin pinmuur eo an Kraist bwe kōmin maron̄ bōk jeorļo̧k bōd in jero̧wiwi ko am̧, im būruōm̧ ren karreo, bwe kōmij tōmak ilo Jisōs Kraist, Nejin Anij, eo eaar kōm̧anm̧an lan̄ im laļ, im men otemjej; Eo enaaj wanlaļtak ilubwiljin ro nejin armej.

3 Im ālikin men kein ke raar kōnono naan kein Jitōbōn Irooj eaar wanlaļtak ioer, im raar obrak kōn lan̄lōn̄, im raar bōk jeorļo̧k in jero̧wiwi ko aer, im kar wōr aer aenōm̧m̧an in bōklōkōt, kōnke kar tōmak eo eļap aer ilo Jisōs Kraist, eo enaaj kar itok, ekkar n̄an naan ko kiin̄ Benjamin eaar kōnono n̄an er.

4 Im kiin̄ Benjamin eaar bar kōpeļļo̧k lo̧n̄iin im kar jino kōnono n̄an er, im ba: Ro jera im ro jeiū im jatū, ro nukū im armej ro aō, ikōņaan bar kūr kom̧ n̄an eltok, bwe kom̧in maron̄ ron̄ im meļeļe bwein naan ko aō ko inaaj kōnono n̄an kom̧.

5 Bwe lo, eļan̄n̄e jeļā eo kōn em̧m̧an an Anij ilo iien in eaar karuj kom̧ n̄an juon kile kōn jejtokjān eo ami, im ami waan im jekjek eo ami ejerata—

6 Ij ba n̄an kom̧, eļan̄n̄e kom̧ ar itok n̄an juon jeļāļo̧kjeņ kōn em̧m̧an eo an Anij, im kajoor eo An emake wōt, im An mālōtlōt, im An kem̧m̧aanwa, im An meanwōd n̄an ro nejin armej; im barāinwōt, pinmuur eo kar kōpooje jān ļon̄tak ko an laļ, bwe lo̧mo̧o̧r en maron̄ itok n̄an e eo enaaj likūt an lōke ilo Irooj, im enaaj tiljek ilo kōjparok kien ko An, im wōnm̧aanļo̧k ilo tōmak eo em̧ool n̄an jem̧ļo̧kin an mour, meļeļe eo aō mour eo an ānbwinnin kanniōk—

7 Ij ba, en̄in ej armej eo ej bōk lo̧mo̧o̧r, kōn pinmuur eo kar kōpooje jān ļon̄tak ko an laļ n̄an armej otemjeļo̧k, ro rekar jān wōtlo̧k eo an Adam, ak ro rej, ak ro renaaj tok ālik, em̧ool n̄an jem̧ļo̧kin laļ.

8 Im en̄in ej wāween eo lo̧mo̧o̧r ej itok. Im ebar ejjeļo̧k lo̧mo̧o̧r. Im ebar ejjeļo̧k lo̧mo̧o̧r ijello̧kun wōn in kar kōnono kake; im ejjeļo̧k jabdewōt wāween ko armej remaron̄ mour ijello̧kun wōt wāween ko iaar jiron̄ kom̧.

9 Kom̧in lōke Anij; kom̧in tōmak bwe E emour, im bwe Eaar kōm̧anm̧an men otemjej, jim̧or ilo lan̄ im ilo laļ; kom̧in lōke bwe Ippān epād jeļā otemjeļo̧k, im kajoor otemjeļo̧k, jim̧or ilo lan̄ im ilo laļ; kom̧in lōke bwe armej ej jab jeļā aolep men ko Irooj E jeļā.

10 Im bar juon alen, kom̧in tōmak bwe kom̧ij aikuj ukeļo̧k jān jero̧wiwi ko ami im eļļo̧k jān i, im kōttāik kom̧ im̧aan Anij; im kajjitōk ilo m̧ool in bōro bwe Enaaj jeorļo̧k bōd ko ami; im kiiō, eļan̄n̄e kom̧ij tōmak aolep men kein lale bwe kom̧in kōm̧m̧ani.

11 Im ij bar ba n̄an kom̧ āinwōt iaar ba m̧oktaļo̧k, bwe āinwōt kom̧ ar itok n̄an jeļāļo̧kjeņ eo kōn aiboojoj an Anij, ak eļan̄n̄e kom̧ ar jeļā kōn em̧m̧an eo An im kar nemake iakwe eo An, im kar bōk jeorļo̧k in jero̧wiwi ko ami, eo eaar kōm̧m̧an m̧ōņōņō eo ekanooj ļap otem ļap ilo būruōmi, em̧ool āindein ikōņaan bwe kom̧in keememej, im iien otemjej bōk ilo ememļo̧kjeņ, ļap eo an Anij, im waan eo ami make, im An em̧m̧an im meanwōd n̄an kom̧, mennin mour ko rejjab tōllo̧ke, im kōttāik kom̧ em̧ool ilo m̧wilaļ ko in ettā, kūr ioon etan Irooj raan otemjej, im jutak pen ilo tōmak kōn men eo enaaj itok, eo kar kōnono kake jān lo̧n̄iin enjeļ eo.

12 Im lo, ij ba n̄an kom̧ bwe eļan̄n̄e kom̧ij kōm̧m̧ane men in kom̧ naaj m̧ōņōņō iien otemjej, im naaj obrak kōn iakwe eo an Anij, im iien otemjej bōk jeorļo̧k eo kōn jero̧wiwi ko ami; im kom̧ naaj eddek ilo jeļāļo̧kjeņ eo kōnaiboojoj an eo Eaar kōm̧anm̧an eok, ak ilo jeļāļo̧kjeņ kōn men eo ejim̧we im m̧ool.

13 Im kom̧ ban kar kōņaan n̄an kōmetak bar juon, ak n̄an mour ilo aenōm̧m̧an, im n̄an leļo̧k n̄an aolep armej ekkar n̄an men eo ej tōllo̧ke im ej an.

14 Im kom̧in jab naaj kōtļo̧k bwe ro nejimi ren kwōle, ak keelwaan; im barāinwōt kom̧in jab kōtļo̧k bwe ren rupi kien ko an Anij, im ire ak aitwerōk ippān doon, im jerbal n̄an devil, eo ej karo an jero̧wiwi, ak eo ej Jetōb nana eo kar kōnono kake jān ro jemād, kōnke e ej rikōjdat n̄an aolep jim̧we.

15 A kom̧ naaj katakin er n̄an etetal ilo iaļ ko rem̧ool im rejim̧we; kom̧ naaj katakin er n̄an iakwe doon, im n̄an jipjipan̄ doon.

16 Im barāinwōt, kom̧ make naaj jipan̄ ro rej pād ilo aer aikuji ami jipan̄; kom̧ naaj jakiļo̧k men ko m̧weiemi n̄an eo ej pād ilo aikuj; im kom̧ jamin naaj kōtļo̧k riowar eo bwe en lewōj kajjitōk eo an n̄an eok ilo waan, im ukōt e ļo̧k n̄an jako.

17 Bōlen kom̧ naaj ba: Armej in eaar bōktok ioon make an en̄taan; kōn menin, inaaj kabbōjrak peiū, im naaj jamin leļo̧k n̄an e m̧ōttan m̧ōn̄ā ko kijō, ak leļo̧k n̄an e m̧ōttan men ko m̧weiō bwe en maron̄ jab en̄taan, bwe kaje ko an rejim̧we—

18 A ij ba n̄an kom̧, O armej, jabdewōt eo ej kōm̧m̧an e men in ejja in wōt eļap unin bwe en ukeļo̧k; im ijello̧kun wōt n̄e ej ukeļo̧k jān men eo eaar kōm̧m̧ane ej jako indeeo, im ejjeļo̧k an ļapļo̧k ilo aelōn̄ in Anij.

19 Bwe lo, jej jab aolep riowar ke? Jej jab aolep atartar ioon wōt ejja Armej in ke, em̧ool Anij, kōn aolep m̧weiuk ko ad, kōn jim̧or m̧ōn̄ā im balle, im kōn gold, im kōn silver, im kōn aolep m̧weie ko ad otemjeļo̧k?

20 Im lo, em̧ool ilo iien in, kom̧ ar kūr ioon Etan, im owar kōn jeorļo̧k in jero̧wiwi ko ami. Im Eaar kōtļo̧k ke bwe kom̧in kar owar ilo waan? Jaab; Eaar lutōkleplep jetōb eo An ioomi, im eaar kōm̧m̧an bwe būruōmi en obrak kōn m̧ōņōņō, im kar kōm̧m̧an bwe lo̧n̄iūmi en bōjrak bwe kom̧in maron̄ jab kwaļo̧k jabdewōt ainikien, āindein kar ļap otem ļap in m̧ōņōņō eo ami.

21 Im kiiō, eļan̄n̄e Anij, eo eaar kōm̧anm̧an eok, eo ioon kom̧ij kōjatdikdik kōn mour ko ami im kōn aolep men ko ewōr ippemi im kom̧ij, ej lewōj n̄an kom̧ jabdewōt kom̧ij kajjitōk im ejim̧we, ilo tōmak, im lōke bwe kom̧ naaj bōk, O innām, ekōjkan ami aikuj in ajeji men ko m̧weiōmi im ewōr ippemi ippān doon.

22 Im eļan̄n̄e kom̧ij ekajete armej eo ej lewōj kajjitōk eo an n̄an kom̧ kōn m̧weiuk ko ami bwe en jab jako, im liaakeļo̧k e, ekōjkan an jim̧weļo̧k naaj liaakeļo̧k eo ami kōn ami dāpij m̧weiuk ko m̧weiōm̧i, ko rejjab ami ak rej an Anij, eo n̄an e mour eo ami ej barāinwōt An; im mekarta men in kom̧ij jab eo̧ron̄ jabdewōt kajjitōk, ak ukeļo̧k jān men in kom̧ ar kōm̧m̧ane.

23 Ij ba n̄an kom̧, wo n̄an armej in, bwe m̧weiuk ko m̧weien renaaj jako ippān; im kiiō, ij ba men kein n̄an ro rej m̧weie āinwōt rej dien men ko an laļ in.

24 Im bar juon alen, ij ba n̄an ro rijeram̧ōl, kom̧ eo ejjeļo̧k ippemi im mekarta ebwe ippemi, bwe kom̧ij mour wōt jān raan n̄an raan; meļeļe in aō aolep kom̧ ro raar kaarmejjete riowar, kōnke ejjeļo̧k ippemi; ikōņaan bwe kom̧in ba ilo būruōmi bwe: ij jab leļo̧k kōnke ejjeļo̧k ippa, ak eļan̄n̄e eaar wōr ippa inaaj kar leļo̧k.

25 Im kiiō, eļan̄n̄e kom̧ij ba men in ilo būruōmi kom̧ij pād wōt ilo an ejjeļo̧k ruōmi, eļan̄n̄e jaab naaj liaakeļo̧k kom̧; im liaakeļo̧k eo ami e jim̧we bwe kom̧ij ankoņake men eo kom̧ ar jab bōk.

26 Im kiiō, kōn kilaan men kein iaar kōnono n̄an kom̧—En̄in, kōn kilaan dāpij jeorļo̧k eo kōn jero̧wiwi ko ami jān raan n̄an raan, bwe kom̧in maron̄ etetal ilo ejjeļo̧k ruōmi im̧aan Anij—ikōņaan bwe kom̧in leļo̧k m̧ōttan m̧weiuk ko ami n̄an ro rijeram̧ōl, kajjojo armej ekkar n̄an men eo ewōr ippān, āinwōt naajdik rikwōle, kanuknuk rikeelwaan, loļo̧k rinan̄inmej im leļo̧k n̄an aer rōļo̧k, jim̧or ilo jetōb im ilo kanniōk, ekkar n̄an kōņaan ko aer.

27 Im lale bwe aolep men kein rej kōm̧m̧an ilo ļoļātāt im koņ; bwe e jab aikuj bwe juon armej en ettōr m̧ōkajļo̧k jān kajoor eo an. Im bar juon alen, emennin aikuj bwe en tiljek, bwe en maron̄ tōblaļ e wōņāān eo; kōn menin aolep men kein rej aikuj kōm̧m̧an ilo koņ.

28 Im ikōņaan bwe kom̧in keememej, bwe jabdewōt eo ilubwiljimi ej m̧uri jān riturin ej aikuj kōro̧o̧l men eo eaar m̧uriki, ekkar n̄an āinwōt eaar errā, n̄e kom̧ ab jero̧wiwi; im bōlen kom̧ naaj kōm̧m̧an bwe riturumi en jero̧wiwi barāinwōt.

29 Im āliktata, ij jab maron̄ ba n̄an kom̧ aolep men ko kom̧ maron̄ jero̧wiwi ie; bwe ewōr iaļ ko im wāween ko, em̧ool āindein elōn̄ bwe ij jab maron̄ bwini.

30 A jon̄an in imaron̄ ba n̄an kom̧, bwe eļan̄n̄e kom̧ij jab lale kom̧ make, im ļōmņak ko ami, im naan ko ami, im kōm̧m̧an ko ami, im pokake kien ko an Anij, im wōnm̧aanļo̧k ilo tōmak kōn ta kom̧ ar ron̄ kōn itok eo an Irooj, em̧ool n̄an jem̧ļo̧kin mour ko ami, kom̧ aikuj mej. Im kiiō, O armej, keememej, im jab mej.