1 Ao ngkai, e koro bukina bwa e a tia te uea ae Beniamina n taetae nakoia ana botanaomata, ao e kanakoa te rongorongo nakoia, ni kan ataia mai irouia ana botanaomata bwa a kakoauai taeka ake e a tia n taekin nakoia ke a aki.

2 Ao a takarua n te bwanaa ae ti teuana ni kangai: Eng, ti kakoauai taeka ni kabane ake ko a tia n taekin nakoira; ao riki ti atai tonutonuia ma koauaia, mai iroun Tamnein te Uea ae Moan te Mwaaka, are e a tia ni karika te bitaki ae moan te korakora iroura, ke i nanora, n te aro are akea te nano ni kan karaoa ae buakaka, ma n teimatoa ni karaoa ae raoiroi.

3 Ao ngaira, i bon iroura naba, rinanon raoiroin te Atua ae aki totoki ma ana kairiri Tamneina, a reke iroura atatai ibukin bwaai aika a na roko; ao ngkana e riai, ti kona naba n taetae ni burabetin bwaai ni kabane.

4 Ao ti bon onimaki ni bwaai ake e a tia n taekin ara uea nakoira are e a reke iai nakoira te atatai ae korakora aio, mangaia ae ti kimwareirei i nanon te kimwareirei ae moan te bati.

5 Ao ti a tauraoi ni karaoa te berita ae tabu ma Atuara bwa ti na karaoa nanona, ao ti na ongeaba nakon ana tua ni kabane ni bwaai ni kabane ake e na anga ana tua iai nakoira, ni karokoa tokin bongin maiura, bwa ti aonga n aki karekea te rekenikai ae aki totoki nakoira, n aron are e a tia n taekinaki iroun te anera, bwa ti aonga n aki mooi man te mwangko are raanganako mai iai unin te Atua.

6 Ao ngkai, aikai taeka ake e kan ongo te uea ae Beniamina mai irouia; mangaia ae e kangai nakoia: Kam a tia n taekin taeka aika I kan ongo mai iroumi; ao te berita ae tabu are kam a tia ni karaoia bon te berita ae tabu ae raoiroi.

7 Ao ngkai, ibukin te berita ae tabu are kam a tia ni karaoia, kam na aranaki bwa natin Kristo, natina mwaane, ao natina aine; bwa taraia, n te bong aio ao e a tia ni manga bungia tamneimi; bwa kam taekinna bwa a bitaki nanomi rinanon onimakinan arana; mangaia ae kam a bungiaki irouna ao kam a riki bwa natina mwaane ao aine ngkami.

8 Ao kam a kainaomataki i aan te ara anne, ao akea te ara riki teuana are kam kona ni kainaomataki iai. Bon akea te ara riki teuana are e na reke mai iai te kamaiuaki; mangaia ae I tangiringkami bwa kam na katoka i aomi aran Kristo, ngkami ni kabane ake kam a tia ni karaoa te berita ae tabu ma te Atua bwa kam na ongeaba ni karokoa tokin maiumi.

9 Ao e na koro bukina bwa ane karaoa aio ao e na kuneaki i angatain te Atua, bwa e na ataa te ara are e na anganaki; bwa e na aranaki n te ara ae Kristo.

10 Ao ngkai e na koro bukina bwa ngkana iai ae e aki katoka iaona aran Kristo ao e na aranaki n te ara riki teuana; mangaia ae e na kuneaki bwa e mena n angamaingin te Atua.

11 Ao I tangiringkami bwa kam na uringnga naba, bwa aio te ara are N na katoka i aomi are e na aki manga kamaunaki, ma tii rinanon riaon te tua; mangaia ae tarataraingkami bwa kam na aki riaon te tua, bwa e aonga n aki kamaunaki te ara aio mai nanomi.

12 I kangai nakoimi, I tangiringkami bwa kam na uringnga n taua arana ao e na koreaki n taainako inanomi, bwa kam aonga n aki kuneaki i angamaingin te Atua, bwa kam aonga n ongo ao ni kinaa te ara are kam na weteaki iai, ao riki, te ara are e na weteingkami iai.

13 Bwa e na kangaa te aomata ni kinaa te toka are e tuai ma ni beku irouna, ae te iruwa nakoina, ao e raroa nako man ana iango ma ana kaantaninga?

14 Ao riki, e kona te aomata n anaa te aati ae ana man kaain rarikina, ni kawakinna? I kangai nakoimi, E aki; e na aki ti karaoa aio ma e na bon aki kariaia naba bwa e na amwarake irarikiia ana tiibu, ma e na kaea nako, ao e na katinanikua. I kangai nakoimi, e na riki naba aio nakoia tabemwaang mai buakomi ngkana kam aki ataa te ara are kam na weteaki iai.

15 Mangaia ae I tangiringkami bwa kam na nanomatoa ao n aki kamwaeieaki, n tei n taainako ni mwakuri aika a raoiroi, bwa e aonga Kristo, ae te Uea ae te Atua ae Moan te Mwaaka ni kabaeingkami bwa ana aomata bwa kam aonga ni kairaki nako karawa, bwa e aonga n reke iroumi te kamaiuaki ae aki totoki ao te maiu ae akea tokina, rinanon te wanawana, ma te mwaaka, ma te motiraoi, ma ana nanoanga teuare e kariki bwaai ni kabane, i karawa ao n te aonaba, are te Atua iaoia ni kabane. Amen.