1 Mpe sikawa, esalemaki ete ntango mokonzi Benyamina asilisaki koloba boye na bato na ye, atindaki bato na kati na bango, kozalaka na mposa ya koyeba uta na bato na ye soki bandimaki maloba oyo alobelaki bango.

2 Mpe bango nyonso bagangaki na mongongo moko, kolobaka: Iyo, tondimi maloba nyonso oyo olobelaki biso; mpe lisusu, toyebi bozangi ntembe mpe bosolo na yango, na ntina ya Molimo ya Nkolo ya Nguya nyonso, oyo asali mbongwana ya makasi kati na biso, soki te na mitema na biso, ete tozali lisusu na bobendami mpo na kosala mabe te, kasi mpo na kosala bolamu ntango nyonso.

3 Mpe biso, biso moko, lisusu, na nzela ya bolamu boye ezanga ndelo ya Nzambe, mpe mamonisi ya Molimo na ye, tozali na mamoni monene ya oyo ekoya; mpe soki ezalaka elongobani, tokokaki kosakola makambo nyonso.

4 Mpe ezali bondimi boye tozwi likolo ya makambo oyo mokonzi na biso alobelaki biso oyo ememeli biso boyebi monene boye, na boye wapi tozali kosepela na bosepeli monene koleka ya lolenge oyo.

5 Mpe tozali kolinga kokota kati na liyokani na Nzambe na biso mpo na kosala bolingi na ye, mpe kozala na botosi na mitindo na ye na makambo nyonso oyo akotinda biso, mpo na ntango etikali ya mikolo na biso nyonso, ete tokoka te komema likolo na biso moko monioko oyo mosukaka mokolo moko te, lokola elobamaki na anjelu, ete tokoka te komela nkeni ya nkele ya Nzambe.

6 Mpe sikawa, oyo ezali maloba oyo mokonzi Benyamina azalaki na yango mposa uta na bango; mpe boye alobaki epayi na bango: Bolobi maloba oyo nazalaki na yango mposa; mpe liyokani oyo bosali ezali liyokani ya sembo.

7 Mpe sikawa, mpo na liyokani oyo bosali bokobiangama bana ya Klisto, bana mibali na ye, mpe bana basi na ye; mpo tala, na mokolo oyo aboti bino na molimo; mpo bolobi ete mitema na bino mibongwani na nzela ya bondimi na nkombo na ye; boye, bobotami na ye mpe bokomi bana mibali mpe bana basi na ye.

8 Mpe na nse ya moto oyo bokomisami bansomi, mpe ezali na moto mosusu te na nzela ya oyo wapi bokoki kokoma bansomi. Ezali na nkombo mosusu te epesami na nzela ya oyo wapi lobiko ekoya; boye, nalingi ete bokamata likolo na bino nkombo ya Klisto, bino nyonso oyo bokoti kati na liyokani na Nzambe ete bokozala bato ya botosi kino na nsuka ya bomoi na bino.

9 Mpe ekosalema ete oyo nyonso akosala oyo akomonana na loboko ya mobali ya Nzambe, mpo akoyeba nkombo oyo wapi abiangami; mpo akobiangama na nkombo ya Klisto.

10 Mpe sikawa ekosalema ete, oyo nyonso akokamata te likolo na ye nkombo ya Klisto asengeli kobiangama na nkombo mosusu; boye, akomimona na loboko ya mwasi ya Nzambe.

11 Mpe nalingi ete bomikundola lisusu, ete oyo ezali nkombo oyo nalobaki ete nakopesa epayi na bino oyo ekolongolama ata mokolo moko te, longola se soki ezali na nzela ya bobuki mobeko; boye, bosala keba ete bobuka mobeko te, ete nkombo yango elongolama mpenza te uta na mitema na bino.

12 Nalobi epayi na bino, nalingi ete bomikundola kosimba nkombo yango ekomami ntango nyonso na mitema na bino, ete bomonana te na loboko ya mwasi ya Nzambe, kasi ete boyoka mpe boyeba mongongo oyo wapi bokobiangama, mpe lisusu, nkombo oyo wapi akobianga bino.

13 Mpo lolenge nini ekoyeba moto nkolo oyo asaleli te, mpe oyo azali mopaya epayi na ye, mpe azali mosika uta na makanisi mpe mikano ya motema na ye?

14 Mpe lisusu, moto akamataka bampunda oyo ezali ya moto ya penepene na ye, mpe abombi yango? Nalobi epayi na bino, Te; akopesa nzela kutu te ete eleyisama na kati ya bibwele na ye, kasi akobimisa ye libanda, mpe akobengana ye. Nalobi epayi na bino, ete ekozala kutu boye na kati na bino soki boyebi nkombo oyo wapi bobiangami te.

15 Boye, nalingi ete bozala ngwi mpe molende, kotondaka ntango nyonso na misala malamu, ete Klisto, Nkolo Nzambe ya Nguya nyonso, akoka kokanga bino kozala baoyo ya ye, ete bokoka komemama na lola, ete bokoka kozwa lobiko ya libela mpe bomoi ya seko, na bwania, mpe nguya, mpe boyengebene, mpe boboto na ye oyo akelaki biloko nyonso, na lola mpe na mabele, oyo azali Nzambe likolo ya nyonso. Amene.