Buku ya Enosa

1 Tala, esalemaki ete ngai, Enosa, koyebaka ete Tata na ngai azalaki moto ya boyengebene—mpo ateyaki ngai na lokota na ye, mpe lisusu na lolenge ya koleisa mpe ya kopalela ya Nkolo—Mpe nkombo ya Nzambe na ngai epambolama mpo na yango—

2 Mpe nakolobela bino na ntina ya etumba oyo nazalaki na yango liboso ya Nzambe, yambo nazwa bolimbisi ya masumu na ngai.

3 Tala, nakendaki bokila ya banyama na zamba; mpe maloba oyo nayokaki Tata na ngai koloba mbala na mbala mpo na oyo etali bomoi ya seko, mpe bosepeli ya basantu, makotaki na bozindo kati na motema na ngai.

4 Mpe molimo na ngai moyokaki nzala; mpe nafukamaki na nse liboso ya Mozalisi na ngai, mpe nabelelaki epayi na ye na losambo mpe libondeli ya makasi mpo na molimo na ngai moko; mpe na bolayi ya mokolo mobimba nabelelaki epayi na ye; iyo, mpe ekomaki butu nazalaki se kotombola lisusu mongongo na ngai likolo ete ekomaki na lola.

5 Mpe mongongo eyaki epayi na ngai, kolobaka: Enosa, masumu na yo elimbisami, mpe okopambolama.

6 Mpe ngai, Enosa, nayebaki ete Nzambe akokaki te kokosa; yango wana, elindo na ngai esukwamaki nie.

7 Mpe nalobaki: Nkolo, esalemi lolenge nini?

8 Mpe alobaki epayi na ngai: Mpo na bondimi na yo na Klisto, oyo naino omonaki mpe oyokaki mokolo moko te liboso. Mpe mibu mingi milekaki yambo amimonisa ye moko na mosuni; boye, kende, bondimi na yo ebikisi yo.

9 Sikawa, esalemaki ete ntango nayokaki maloba oyo nabandaki koyoka mposa mpo na bolamu ya bandeko na ngai, Banefi; boye, nasopaki motema na ngai mobimba epayi ya Nzambe mpo na bango.

10 Mpe wana ezalaki ngai kobunda na molimo, tala, mongongo ya Nkolo eyaki kati na mayele na ngai lisusu, kolobaka: Nakoya kotala bandeko na yo engebene na molende na bango na kobatelaka mitindo na ngai. Napesaki epayi na bango mboka oyo, mpe ezali mboka esantu; mpe nalakeli yango mabe te longola se soki ezali mpo na ntina ya mabe na bango; boye, nakoya kotala bandeko na yo engebene na oyo nalobaki; mpe bobuki mobeko na bango nakokitisa mawa likolo ya mitu na bango moko.

11 Mpe esilaki ngai, Enosa, koyoka maloba oyo, bondimi na ngai ebandaki kozala sikisiki na Nkolo; mpe nasambelaki epayi na ye na kobundaka ntango mingi mpe molai mpo na bandeko na ngai, Balamani.

12 Mpe esalemaki ete esilaki ngai kosambela mpe kosala na molende nyonso, Nkolo alobaki epayi na ngai: Nakopesa epayi na yo engebene na mposa na yo, na ntina ya bondimi na yo.

13 Mpe sikawa tala, oyo ezalaki mposa oyo nazalaki na yango uta na ye—ete soki ezalaki bongo, ete bato na ngai, Banefi, bakweya kati na bobuki mobeko, mpe na nzela moko to mosusu babebisama, mpe Balamani babebisama te, ete Nkolo Nzambe alinga kobatela lisolo ya makomi ya bato na ngai, Banefi; kutu soki ezali boye na nguya ya loboko na ye ya santu, ete ekoka kotindama na mokolo moko ekoya epayi ya Balamani, ete, mbele, bakoka komemama na lobiko—

14 Mpo na ntango oyo bitumba na biso ezalaki mpamba na kozongisaka bango na bondimi ya solo. Mpe balapaki ndai na nkele na bango ete, soki ekokaki kosalema, bakobebisa masolo ya makomi na biso mpe biso, mpe lisusu mimesano nyonso ya batata na biso.

15 Boye, lokola nayebaki ete Nkolo Nzambe akokaki kobatela masolo ya makomi na biso, nabelelaki epayi na ye ntango nyonso, mpo alobaki epayi na ngai: Eloko nyonso kani okosenga na bondimi, kondimaka ete okozwa yango na nkombo ya Klisto, okozwa yango.

16 Mpe nazalaki na bondimi, mpe nabelelaki epayi ya Nzambe ete akobatela masolo ya makomi; mpe ayokanaki elongo na ngai ete akokomisa yango epayi ya Balamani na ntango esengeli ya ye moko.

17 Mpe ngai, Enosa, nayebaki ekozala engebene na liyokani oyo asilaki kosala; boye molimo na ngai mopemaki.

18 Mpe Nkolo alobaki epayi na ngai: Batata na yo mpe lokola basengaki ngai likambo oyo; mpe ekosalema epayi na bango engebene na bondimi na bango; mpo bondimi na bango ezalaki lokola ya yo.

19 Mpe sikawa esalemaki ete ngai, Enosa, nakendaki nzinganzinga na kati ya bato ya Nefi, kosakolaka makambo ekoya, mpe kotatolaka na ntina ya makambo oyo nayokaki mpe namonaki.

20 Mpe napesi litatoli ete bato ya Nefi balukaki na molende kozongisa Balamani na bondimi ya solo ya Nzambe. Kasi misala na biso ezalaki mpamba; boyini na bango ezalaki ya ngwi, mpe bakambamaki na ezalela na bango ya mabe ete bakomaki bato ya nko, mpe ya loma, mpe bato na mposa ya makila, batonda na kokumbamela banzambe ya bikeko mpe bosoto; koliaka banyama oyo eliaka banyama ya zamba; kofandaka na biema, mpe koyenga-yengaka nzinganzinga na esobe na mokaba moko ya mokuse na mposo ya nyama nzinganzinga na nketo na bango mpe mitu na bango kolokolo; mpe mayele na bango ezalaki na kosalelaka litimbo, mpe mompanga mogumbama, mpe ekoko. Mpe mingi na bango bazalaki kolia eloko te longola se nyama ya mobesu; mpe bazalaki ntango nyonso kolukaka kobebisa biso.

21 Mpe esalemaki ete bato ya Nefi basalaki bilanga, mpe bakolisaki ndenge nyonso ya mboto, mpe ya mbuma, mpe bibwele ya matonga, mpe bibwele ya ndenge nyonso ya nyama ya ndenge na ndenge, mpe ntaba, mpe ntaba ya zamba, mpe lisusu bampunda mingi.

22 Mpe ezalaki na baprofeta mingi mpenza na kati na biso. Mpe bato bazalaki bato na matoyi mangongi, na kokoso mpo na kososola.

23 Mpe ezalaki na eloko moko te longola se soki ezalaki maloba maluti makasi, mateya mpe masakoli ya bitumba, mpe boweli, mpe bobebisami, mpe ntango nyonso kokundolaka bango liwa, mpe bowumeli ya seko, mpe bosambisi mpe nguya ya Nzambe, mpe makambo oyo nyonso—kolamusaka bango ntango nyonso na bobangi ya Nkolo. Nalobi ezalaki na eloko moko te longola se makambo oyo, mpe polele monene mpenza ya maloba, nde elingaki kobatela bango uta na kokita na lombangu na bobebisami. Mpe na lolenge oyo nakomi mpo na oyo etali bango.

24 Mpe namonaki bitumba kati na Banefi mpe Balamani na botamboli ya mikolo na ngai.

25 Mpe esalemaki ete nabandaki kokoma mobange, mpe mibu nkama na ntuku sambo na libwa milekaki uta ntango oyo tata na biso Lehi atikaki Yelusaleme.

26 Mpe namonaki ete nasengeli kala mingi te kokita na lilita na ngai, mpe natambwisamaki na nguya ya Nzambe ete nasengelaki koteya mpe kosakola epayi ya bato oyo, mpe kosakola liloba engebene na bosolo boye ezali na Klisto. Mpe nayebisaki yango na mikolo na ngai nyonso, mpe nasepelaki na yango koleka oyo ya mokili.

27 Mpe kala mingi te nakeyi na esika ya bopemi na ngai, oyo esika na Mosikoli na ngai; mpo nayebi ete na ye nakopema. Mpe nakosepela na mokolo kufa na ngai ekolata bozangi bokufi, mpe ekotelema liboso na ye; nde nakomona elongi na ye na elengi, mpe akoloba na ngai: Yaka epayi na ngai, yo oyo opambolami; ezali na esika oyo elengelami mpo na yo na bifandelo ya Tata na ngai. Amene.