Buku ya Mormon

Moko ya maboke minei ya makomi oyo endimami na Eklezia ya Yesu Klisto ya Basantu ba Mikolo mya Nsuka. Ezali masolo ya makomi ya na boko bafandi ya kala ya Baamerika oyo etiamaki na bokuse na profeta moko ya kala na nkombo ya Mormon. Ekomamaki mpo na kotatola ete Yesu azali Klisto. Mpo na oyo etali nkoma oyo, Profeta Joseph Smith, oyo abongolaki yango na nzela ya likabo mpe nguya ya Nzambe, alobaki ete, “Nayebisaki bandeko bandimi ete Buku ya Mormon ezalaki malamu koleka buku nyonso likolo ya mabele, mpe libanga likonzi ya eyamba na biso, mpe moto akoki kobeleme penepene na Nzambe na kowumelaka na malako ya yango, koleka buku nyonso mosusu” (tala boyingisi na ebandeli ya Buku ya Mormon).

Buku ya Mormon ezali lisolo ya makomi ya eyamba ya mangomba misato ya bato baye bakendaki mobembo na mboka bapaya uta Mokili ya Kala na mabele ya Amerika. Mangomba oyo makambamaki na baprofeta oyo bakomaki mambi ya kala ya eyamba mpe ya bule te likolo ya bapalaki ya libende. Buku ya Mormon ezali kokundola bokei ya Yesu Klisto oyo akendaki kotala bato bazalaki na Baamerika nsima ya Bosekwi na Ye. Eleko ya mibu nkama mibale ya kimia elandaki kotala oyo Klisto akendaki kotala bango.

Moroni, profeta ya nsuka na kati ya bakomi-mambi ya kala ya Banefi, akangaki masolo ya makomi na bokuse ya bato baye mpe abombaki mango na mobu penepene na 421 ya Mobu ya Nkolo. Na mobu 1823, mosekwi Moroni ayaki kotala Joseph Smith mpe nsima apesaki ye masolo ya makomi oyo ya kala mpe ya bule mpo ete ebongolama mpe matindama na mokili lokola litatoli mosusu ya Yesu Klisto.