Esode

Buku moko ekomamaki na Mose kati na Boyokani ya Kala oyo ezali kolimbolaka bobimi ya Bayisalaele libanda ya Ejipito. Mambi ya kala ya Yisalaele lokola ekomami kati na Esode ekoki kokabolana na biteni misato: (1) bowumbu ya bato na Ejipito, (2) bobimi na bango uta na Ejipito na nse ya bokambi ya Mose, mpe (3) bomipesi na bango na mosala ya Nzambe mpe bomoi na bango ya eyamba mpe ya politiki.

Ndambo ya yambo, mikapo 1:1–15:21, milimboli monyokoli ya Yisalaele kati na Ejipito; mambi ya kala ya ebandeli mpe bobiangi ya Mose; Bobimi mpe bobandami ya Pasika; mpe botamboli na Mbu Etane, ebomi ya mampinga ya Falo, mpe nzembo ya elonga ya Mose.

Ndambo ya mibale, mikapo 15:22–18:27, milobeli bosikoli ya Yisalaele mpe makambo masalemaki na nzela ya mobembo uta na Mbu Etane kino na Sinai; mai ya bololo ya Mala, bopesi ya bandeke ya kai mpe mana, botosi ya Saba, likabo ya makamwisi ya mai na Lefidimi, mpe etumba na esika wana na Baamaleki; boye ya Yetelo na nganda mpe toli na ye etali boti ya mbulamatari ya bana mboka mpo na bato.

Ndambo ya misato, mikapo 19–40, ezali kotalela bobulisi ya Yisalaele na mosala ya Nzambe na ntango ya makambo ya lipombo na Sinai. Nkolo atiaki bato mpembeni lokola bokonzi ya banganganzambe mpe ekolo esantu; Apesaki Mibeko Zomi; mpe Apesaki malakisi na ntina ya tabelenakele, biloko ya ndako na yango, mpe kokumbamela kuna na kati. Nsima elandaki lisolo ya lisumu ya bato na kokumbamelaka mwana ngombe ya wolo, mpe na nsuka lisolo ya botongi ya tabelenakele mpe bopesi nyonso mpo na misala na yango.