Eliya

Profeta ya Boyokani ya Kala oyo azongaki na mikolo ya nsuka mpo na kopesa bafungola ya nguya ya bokangi likolo ya Joseph Smith mpe Oliver Cowdery. Na mikolo na ye, Eliya asalaki mosala na ye na Bokonzi ya Nordi ya Yisalaele (1 Mik. 17–22; 2 Mik. 1–2). Azalaki na bondimi makasi na Nkolo mpe ayebani mpo na makamwisi na ye ya mingi. Na bosenga na ye, Nzambe Akangaki mvula mpo na eleko ya mibu misato na ndambo. Alamusaki elenge mobali moko uta na liwa mpe akitisaki moto uta na lola (1 Mik. 17–18). Bayuda bazali se kozela bozongi ya Eliya, lokola esakolaki Malaki ete akozonga (Mki. 4:5). Atikali se mopaya oyo bazelaka na Biyenga ya Pasika ya Bayuda, wapi ekuke moko efungwami mpe efandeli ya pamba ezelaka ntango nyonso se ye.

Profeta Joseph Smith alobaki ete Eliya azalaki na nguya ya bokangi ya Bonganganzambe ya Melikisedeki mpe azalaki profeta ya nsuka ya kosala bongo liboso ya ntango ya Yesu Klisto. Amonanaki likolo ya Ngomba ya Bobongolami elongo na Mose mpe bapesaki bafungola ya bonganganzambe na Petelo, Yakobo, mpe Yoane (Mat. 17:3). Amonanaki lisusu, elongo na Mose mpe basusu, mokolo ya 3, sanza ya minei ya mobu 1836, na Tempelo ya Kirtland, Ohio mpe apesaki bafungola se moko wana likolo ya Joseph Smith mpe Oliver Cowdery (Mal&May 110:13–16). Nyonso oyo ezalaki na bolengeli ya Boyei ya Mibale ya Nkolo, lokola elobami na Malaki 4:5–6.

Nguya ya Eliya ezali nguya ya bokangi ya bonganganzambe na oyo wapi biloko oyo ekangisami to oyo efungolami na mabele ekangisami to efungolami mpe na lola (Mal&May 128:8–18). Basali baponami ya Nkolo likolo ya mabele lelo oyo bazali na nguya ya bokangi mpe bazali kosala makuli ya lobiko ya nsango malamu mpo na bato na bomoi mpe bakufi (Mal&May 128:8).