Lokola esalemeli na makomi, komikaba ezali koyoka mpasi ya etumbu ya lisumu, na nzela wana kolongola malandi ya lisumu lina uta na mosumuki oyo alingi koyambola mpe kopesaka nzela ete azongisama boyokani na Nzambe. Yesu Klisto azalaki se ye moko oyo akokaki kosala bomikabi ya bobongi nie mpo na bato nyonso. Akokaki kosala bongo mpo na boponi na ye, bokulisi na Ye yambo na mbotama kati na Lisanga Monene liboso ete mokili esalema (Etel. 3:14; Mose 4:1–2; Abal. 3:27), mpo na Bomwana mobali na Ye ya bonzambe, mpe bomoi na Ye ezanga masumu. Bomikabi na Ye oyo esalemi kati na mpasi na Ye mpo na masumu ya bato nyonso, bosopi ya makila na Ye, mpe kufa na Ye mpe bosekwi elandanaki na ye uta na lilita (Yis. 53:3–12; Luk. 22:44; Mos. 3:5–11; Alma 7:10–13; Mal&May 19:16–19). mpo na Bomikabi, bato nyonso bakolamuka uta na liwa na nzoto ya kozanga kufa (1 Kol. 15:22). Bomikabi epesi lisusu nzela ete tolimbisama na masumu na biso mpe tozala ntango nyonso na Nzambe. Kasi moto oyo asili kokokisa mobu ya boyanoli mpe koyamba mobeko akoki kozwa mapamboli oyo bobele soki azali na bondimi na Yesu Klisto, ayamboli masumu na ye, azwi makuli ya lobiko, mpe atosi mitindo ya Nzambe. Baye wana bakokisi te mobu ya boyanoli mpe baye wana bazangi mobeko basikolami na nzela ya Bomikabi (Mos. 15:24–25; Mor. 8:22). Makomi malakisi polele ete soki Klisto amikabaki te mpo na masumu na biso, mobeko moko te, bokuli, soki te mbeka moko te ekokaki kosepelisa masengami ya boyengebene, mpe moto akokaki lisusu te kozonga na miso ya Nzambe (2 Nef. 2; 9).