1 Ac inge, tukun ma inge tukun tohkohsrah Mosiah el tahfwelah na in mihs ke lusen yac tolu, el kena etuh ke mwet ma som muhta fin acn Lehi-Nephi, kuh ke siti Lehi-Nephi; tuh mwet lal tiac lohng selos ke pacl se elos som liki acn Zarahemla; ohinge, elos ahktohtohyacllah ke ahktuhfal lalos.

2 Ac tukun ma inge tohkohsrah Mosiah el lwelah tuh singuculohnkohsr sin mukul fokoko lalos in kuh in som nuh fin acn Lehi-Nephi, in lohlngohk ke mwet wiyaclos.

3 Ac tukun ma inge ke lwen litu uh elos muhtwacwacack in som nuh we, weluhlos pa Ammon, el sie mukul kuh ac fokoko, ac sie fihlin mwet lal Zarahemla; ac el oacyacpac mwet kol lalos.

4 Ac inge, elos tiac etuh ke inkacnek elos fah fuhfahsryucsr we ke innimac in som nuh fin acn Lehi-Nephi; ohinge elos forfor ke lwen pucspucs ke innimac, finne ke lwen angngaul elos forfor.

5 Ac ke elos forfor lwen angngaul elos tuhkuh nuh ke soko inging, ma oan lacyacn nuh acir fin acn Shilom, ac we elos kaskiyac lohm nuknuk selos.

6 Ac Ammon el eis tolu sin mwet wiyacl, ac inelos pa Amaleki, Helem, ac Hem, ac elos illac som nuh fin acn Nephi.

7 Ac liye, elos ohsun nuh sin tohkohsrah luhn mwet ma muhta fin acn Nephi, ac fin acn Shilom, ac elos rauniyucklac sin mwet topang lal tohkohsrah, ac srohoh eltahl, ac kapriyucki ac utucklac nuh ke nien srohoh.

8 Ac tukun ma inge ke elos muhta ke nien srohoh ke lwen luo elos sifilpac na utucklac nuh yohrohl tohkohsrah, ac kapihr kaclos taltallah; ac elos tu ye muhtahl tohkohsrah, ac ituckyang nuh selos, kuh sapkihnyuck, tuh elos in topuk kihsen siyuck suc el ac siyuck selos.

9 Ac el fahk nuh selos: Liye, nga pa Limhi, wen nahtuhl Noah, suc wen nahtuhl Zeniff, suc tuhkuh liki acn Zarahemla in usrui acn se inge, suc pa acn luhn pahpah tuhmwacsr, suc oreklac elan sie tohkohsrah ke puhsren mwet ah.

10 Ac inge, nga kena in etuh srihpac se oruh kowos arulacna puhlaik in tuhkuh fototo nuh ke pot luhn siti uh, ke nga, nga sifacna, wi mwet topang luhk lihkihn muhtuhnpot uh?

11 Ac inge, tuh ke srihpac se inge nga lwelah tuh kowos in painmoullac, tuh ngan kuh in kihsen siyuck suwos, kuh fin tiac ngwac oruh mwet topang luhk in unikowosi. Kowos lwelah in sramsram.

12 Ac inge, ke Ammon el liye tuh lwelah nuh sel in sramsram, el fahsryak nuh met ac epahsrlah ye muhtahl tohkohsrah; ac el sifil kweyak fahk: O tohkohsrah, nga arulacna kuloh nuh sin God ke lwen se inge tuh nga srack moul, ac lwelah nuh sihk in sramsram; ac nga fah srihke in sramsram ke puhlaik;

13 Tuh nga etuh lah fuhnuh kom etweyuc kom ac tiac lwelah tuh nga in orekmakihn mwe kapihr inge. Tuh nga pa Ammon, ac nga sie fihlin mwet lal Zarahemla, ac tuhkuh liki acn Zarahemla in kihsen siyuck ke mwet wiyuck, suc Zeniff el uslah liki acn we.

14 Ac inge, tukun ma inge tuh tukun Limhi el lohng kahs lal Ammon, el arulacna engan, ac fahk: Inge, nga etuh na pwacye lah mwet wiyuck suc oasr fin acn Zarahemla srwackna moul. Ac inge, nga fah kaksak; ac lwen litu uh nga fah oruh tuh mwet luhk in oacyacpac kaksak.

15 Tuh liye, kuht muhta in srohoh sin mwet Laman, ac moli sie molo suc arulacna upac. Ac inge, liye, mwet wiyacsr fah uskuhtlac liki srohoh lasr, kuh liki poun mwet Laman, ac kuht fah mwet kuhmahkihnyuck lalos; tuh wo tuh kuht in mwet kuhmahkihnyuck luhn mwet Nephi likina kuht in moli molo se nuh sin tohkohsrah luhn mwet Laman.

16 Ac inge, tohkohsrah Limhi el sapkihn nuh sin mwet topang lal tuh elos in tiac sifil kaprel Ammon kuh mwet wiyacl, tuhsruhk in oruh tuh elos in som nuh ke inging ma oan nuh acir fin acn Shilom, ac us mwet wiyaclos nuh ke siti uh, tuh ohinge elos in kuh in mongo, ac nihm, eis monglac ke kwemkahtuh in fuhfahsryucsr lalos; tuh elos kweok ke ma pucspucs; elos kweok ke masrinsrwacl, maluh, ac tohtohlah.

17 Ac inge, tukun ma inge ke lwen litu uh tohkohsrah Limhi el suhpwaclah sie mwe fahkwack inmahsrlon mwet lal nuhkwewa, tuh ohinge elos in kuh in tuhkweni nuh sie ke tempuhl, in lohng kahs suc el fah sruhmuhn nuh selos.

18 Ac tukun ma inge ke elos tuhkweni nuh sie tuh elan sramsram nuh selos ke ohiyac se inge, in fahk: O kowos, mwet luhk, kweyak nuh lucng ac enganwack; tuh liye, pacl apkuhran me, kuh tiac loes, ke kuht fah tiac sifilpac muhta ye poun mwet lokoalok lasr, finne ke mwe tikuclkucl pucspucs lasr, suc tiac tui; tuhsruhk nga luhlahlfongi muh oasr sie ohiyacn tikuclkucl wo kuh in orek.

19 Ke ma inge, kweyak nuh lucng, ac kaksak, ac likiyac luhlahlfongi lowos sin God, sin God se Suc God lal Abraham, ac Isaac, ac Jacob; ac oacyacpac, God se Suc use tuhlihk nuhtin Israel liki acn Egypt, ac oruh tuh elos in kuh in fahsr sahslah ke Meoa Sruhsrah ke acn paho, ac kihtaclos ke macna tuh elos in kuh in tiac misac ke yen mwesis; ac ma pucspucs pac ma El oruh nuh selos.

20 Ac sifilpac, God se pacna ma use pahpah tuhmwacsr liki acn Jerusalem, ac liyacacng ac karihngihn mwet Lal finne ne ingena; ac liye, ma ke srihpen ma koluk lasr ac ma sruhngwacyuck kacsr tuh El uskuhtme nuh ke srohoh.

21 Ac kowos nuhkwewa mwet lohoh ke lwen se inge, lah Zeniff, suc oreklac tohkohsrah nuh sin mwet inge, el rahpkuhi na pwacye in usrui acn luhn pahpah tuhmwacl, ohinge kiyacpweyucklac ke ohiyac suhlallacl ac usrnguck lal tohkohsrah Laman, suc ilyak nuh ke sie olwelah nuh sel tohkohsrah Zeniff, ac fuhlweacng nuh in pahol in srukyac sie ipin acn ah, kuh finne siti Lehi-Nephi, ac siti Shilom; ac acn raunweack—

22 Ac ma inge nuhkwewa el oruh, ke srihpac sefanna uh pa in sang mwet inge in sruokyucki kuh in srohoh. Ac liye, ke pacl se inge kuht moli nuh sin tohkohsrah luhn mwet Laman, ke luhpah se ke tahfuhn corn lasr, ac barley lasr, ac finne ke kain in grain nuhkwewa lasr, ac tahfuhn un sip ac kosro nahtuhsr; ac finne tahfuh ke ma nuhkwewa lasr kuh ma suc tohkohsrah luhn mwet Laman elos eis sesr, kuh ke moul lasr.

23 Ac inge, yac ma inge tiac upac in usus? Ac yac ma se inge tiac, ma upac yohk, lasr? Inge liye, yohk srihpac kuht in ahsor.

24 Ahok, nga fahk nuh suwos, yohk srihpac suc kuht enenuh in ahsorkihn; tuh liye pihsac suc se sin mwet wiyacsr acnwucki, ac srahlos kahklah ke wacngihn srihpac, ac ma inge nuhkwewa sikyak ke srihpen ma koluk.

25 Tuh fin mwet inge tiac puhtatyang nuh ke ma koluk Leum El fah tiac lwelah tuh ma koluk yohk se inge in tuhkuh nuh faclos. Tuh liye, elos tiac lohng kahs Lal; tuhsruhk oasr fohs sikyak inmahsrlolos, yohk na oruh elos ahkkahkyelah srah inmahsrlolos sifacna.

26 Ac mwet pahluh se luhn Leum elos uniyac; ahok, sie mukul sollac sin God, suc fahk nuh selos ke ma koluk lalos ac ma sruhngwacyuck lalos, ac palye ke ma pucspucs suc ac fah tuhkuh, ahok, finne tuhkuh luhn Kraist.

27 Ac ke srihpen el fahk nuh selos lah Kraist pa God, Pahpah tuhmwacn ma nuhkwewa, ac fahk lah El ac eis nuh facl luhman mukul se, ac e fah oacna luhmah se tukun mwet suc oreklac e ke muhtwacwacack ah; kuh ke kuhtwena kahs, El fahk lah mukul uh oreklac ke luhmahn God, ac lah God El ac oactui nuh inmahsrlon tuhlihk nuhtin mwet, ac eis ikoac ac srah nuh kacl, ac som apuhnlah muhtuhn facluh—

28 Ac inge, ke srihpen El fahk ma se inge, elos unilyac; ac ma pucspucs pac elos oruh ma pwacnwacng karsrkuhsrak luhn God tuhkuh nuh faclos. Ohinge, suc motko lah efuh elos oasr in srohoh, ac tuh elos kweokkihn ma koluk upac?

29 Tuh liye, Leum El fahk: Nga fah tiac kahsruh mwet luhk ke pacl in tahfonglac lalos; tuhsruhk nga fah kohsraclah inkacnek lalos tuh elos in tiac kuhtanglah; ac oruh lalos in fah mwe tikuclkucl se ye muhtahlos.

30 Ac sifilpac, el fahk: Mwet luhk fin tahknwelihk ma fohkfohk elos fah kosrwacni mwacta ohinge suc oasr lun eng for; ac ma tuhkuh kac uh ohinge pa pwacsin.

31 Ac el sifil pac na fahk: Mwet luhk fin tahknwelihk ma fohkfohk elos fah kosrwacni eng ma tuhkuh lacyacn kuhtuhlacp, ma sang kuhnahoslah na sa.

32 Ac inge, liye, olwelah luhn Leum ahkpwacyeiyuck, ac kowos srihngihlyuck ac kweokkihn.

33 Tuhsruhk kowos fin fohlohk nuh yurun Leum ke inse pwacye, ac likiyac luhlahlfongi lowos in El, ac kuhlwacnsap nuh Sel ke nuhnkowos nohfohn, kowos fin oruh ma se inge, El ac, fal nuh ke kena ac luhngse Lal sifacna, ac uskowoslac liki srohoh.